នេះគឺជាខណៈពេលស្ទើរគាំងបេះដូង ដែលបង្ហាញឲ្យឃើញអ្នកវិទ្យាសាស្ត្រជនជាតិឥណ្ឌាអាយុ ៤០ ឆ្នាំ ម្នាក់ ត្រូវលង់ទឹកយ៉ាងអាណោចអាធម ខណៈកំពុងដើរលេងជាមួយគ្រួសារ និងមិត្តភក្តិរបស់គាត់ នៅរមណីយដ្ឋានទឹកជ្រោះមួយ ។
ជនរងគ្រោះត្រូវបានបញ្ជាក់មានឈ្មោះ Somashekar មកពីរដ្ឋ Haryana ភាគខាងជើងនៃប្រទេសឥណ្ឌា រួមជាមួយគ្រួសារ និងមិត្តភក្តិជាច្រើន បាននាំគ្នាទៅលេងកន្លែងទឹកធ្លាក់ Chunchanakatte ជាទីកន្លែងទឹកជ្រោះដ៏ល្បាញមួយនៅលើទន្លេ Cauvery នៅក្នុងទីក្រុង Mysuru រដ្ឋ Karnataka ស្ថិតនិរតីនៃប្រទេសឥណ្ឌា កាលពីថ្ងៃអាទិត្យ ។
នៅវេលាម៉ោង ៤ និង ៣០ នាទីល្ងាច កម្រិតទឹកស្រាប់តែកើនឡើងយ៉ាងគំហក់ភ្លាម នៅក្នុងដងទន្លេ ដោយសារតែការបញ្ចេញចោលពីស្ថានីយ៍ថាមពលវារីអគ្គិសនីខ្នាតតូច ពីខ្សែទឹកខាងលើ ។ ទោះបីជាអង្គភាពវារីអគ្គិសនីបានបន្លឺសម្លេងស៊ីរ៉ែន និងបានផ្តល់សញ្ញាព្រមានក៏ដោយ ប៉ុន្តែ ភ្ញៀវទេសចរជាច្រើនដែលចូលចិត្តលេងទឹក អាចស្តាប់បានទេ ។ ពួកគេចាប់ផ្តើមរំកិលខ្លួនចេញ នៅពេលពួកគេចាប់ផ្តើមមានអារម្មណ៍កម្រិតឡើង ។ ទោះយ៉ាងណា អ្នកទេសចរជាច្រើនដែលក្នុងនោះរួមមានទាំងលោក Somashekar ក៏ត្រូវជាប់ប៉ែលប៉ោលនៅទន្លេផងដែរ ។
ទិដ្ឋភាពដ៏សែនរន្ធត់ បានបង្ហាញឲ្យឃើញអ្នកស្ម័គ្រជួយសង្គ្រោះស្ត្រីទេសចរម្នាក់ពីទន្លេ ដោយប្រើខ្សែពួរ ។ ពួកគេអាចត្រូវបានឃើញបោះខ្សែពួរទៅកាន់លោក Somashekar និងព្យាយាមសង្គ្រោះគាត់ ប៉ុន្តែ មុនពេលគាត់អាចត្រូវបានទាញចេញពីកន្លែងប្រឈមគ្រោះថ្នាក់ គាត់បានបាត់បង់លំនឹង ហើយក៏ត្រូវបានខ្សែទឹកហូរដ៏ខ្លាំងក្លានាំយកទៅតែម្តង ។
គួរបញ្ជាក់ថា ជនរងគ្រោះកំពុងធ្វើការជាអ្នកវិទ្យាសាស្ត្រ នៅវិទ្យាស្ថានស្រាវជ្រាវបច្ចេកវិទ្យាអាហារកណ្តាល (CFTRI) នៅ Mysuru ។
សាក្សីម្នាក់និយាយថា៖ «សមាជិកគ្រូសាររបស់ Somashekar និងក្រុមអ្នកសង្គ្រោះ បានព្យាយាមយ៉ាងសស្រាក់សស្រាំបំផុតបំផុត ដើម្បីសង្គ្រោះគាត់ ប៉ុន្តែ គាត់អស់ដៃពុំអាចកាន់ខ្សែពួរតទៅទៀតបាន ក៏ត្រូវហូរទៅតាមខ្សែទឹកដ៏ខ្លាំងក្លា» ។
ក្រុមសេវាសង្គ្រោះបន្ទាន់ និងអគ្គីភ័យ ពុំអាចរកឃើញសាកសពរបស់ Somashekar បានទេ នៅថ្ងៃអាទិត្យ នោះ ប៉ុន្តែ ត្រូវបានរកឃើញដោយក្រុមអ្នកនេសាទនៅព្រឹកថ្ងៃអាទិត្យ ។
ភ្ញៀវទេសចរជាច្រើនដែលបានទៅលេងនៅទីនោះ បានទទួចដល់អាជ្ញាធរថា សុំឲ្យពួកគេតម្លើងស៊ីរ៉ែនៅក្បែរទន្លេនោះ ដើម្បីចៀសវាងហេតុការណ៍កើតឡើងដ៏ស្លុតរន្ធត់បែបនេះ ៕ ឧត្តម