ប្រធានាធិបតីអាមេរិកដូណាល់ ត្រាំ ថ្លែងក្នុងសន្និសីទសារព័ត៌មាននៅថ្ងៃទី ៧ ខែមិថុនា ជាមួយនាយករដ្ឋមន្ត្រីជប៉ុន Shinzo Abe នៅសេតវិមាន ប្រធានាធិបតីអាមេរិកដូណាល់ ត្រាំ និយាយថា អាមេរិកត្រៀមជាស្រេចនឹងអញ្ជើញមេដឹកនាំកូរ៉េខាងជើងមកទស្សនកិច្ចអាមេរិក ប្រសិនជំនួបកំពូលអាមេរិក-កូរ៉េខាងជើង នៅប៉ុន្មានថ្ងៃខាងនេះទទួលបានលទ្ធផលល្អប្រសើរនោះ។
ទន្ទឹមនោះប្រធានាធិបតីអាមេរិកដូណាល់ ត្រាំ ឲ្យដឹងថា លោកនិងមេដឹកនាំកូរ៉េខាងជើង គីម ជុងអ៊ុន អាចទទួលបាននូវកិច្ចព្រមព្រៀងបញ្ចប់សង្គ្រាមកូរ៉េខាងជើង ក្នុងជំនួបកំពូលដែលតាមគំរោងនឹងប្រព្រឹត្តទៅនៅថ្ងៃទី ១២ ខែមិថុនាខាងមុខ ។
ខណៈពេលនោះដែរ នាយករដ្ឋមន្ត្រី Zhinzo ឲ្យដឹងថា លោកត្រៀមជាស្រេចដើម្បីចរចាជាមួយកូរ៉េខាងជើង ហើយនេះជាកិច្ចប្រឹងប្រែងមួយដើម្បីដោះស្រាយបញ្ហាពលរដ្ឋជប៉ុនត្រូវចាប់ជំរិត និងការកែសម្រួលទំនាក់ទំនងជាមួយក្រុងព្យុងយ៉ាង ។ លោកអះអាងថា ជប៉ុនពុំមានការប្រែប្រួល គោលនយោបាយអ្វីឡើយ ចំពោះបញ្ហាសន្តិភាពពិតប្រាកដមួយនៅតំបន់ឥសាន្តទ្វីបអាស៊ីនេះ ។ លោកក៏នៅបានលើកឡើងថា ប្រសិនបើកូរ៉េខាងជើង ត្រៀមខ្លួននឹងបោះជំហានតាមទិសដៅត្រឹមត្រូវមួយនោះ ពួកគេនឹងមានអនាគតដ៏ភ្លឺស្វាង ។ ក្នុងសន្និសីទសារព័ត៌មានលោកត្រាំ ក៏បានសន្យានឹងលើកឡើងនូវបញ្ហាដែលជប៉ុនចង់បានដើម្បីប្រាប់ទៅមេដឹកនាំកូរ៉េខាងជើង គីម ជុងអ៊ុន នៅក្នុងជំនួបកំពូលខាងមុខ ៕ សូយន
