កំពង់ចាម៖ លោកប្រធានគ.ជ.ប បានបញ្ជាក់ថា ដើម្បីឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ត្រូវមានគោលការណ៍ចំនួន៥។ លោកស៊ិក ប៊ុនហុក ប្រធានគ.ជ.ប បានថ្លែងកាលពីថ្ងៃទី៧ខែមិថុនា នៅខេត្តកំពង់ចាម ក្នុងកម្មវិធីបញ្ជ្រាបការយល់ដឹងអំពីច្បាប់ស្តីពីការរៀបចំនិងការប្រព្រឹត្តទៅនៃគ.ជ.ប និងច្បាប់ស្តីពីការបោះឆ្នោតជ្រើសតាំងតំណាងរាស្ត្រ ។
ពាក់ព័ន្ធនឹងគោលការណ៍បោះឆ្នោត និងសារសំខាន់ការនៃការបោះឆ្នោត លោកប្រធាន បានពន្យល់ថា អំណាចដឹកនាំប្រទេសនៅកម្ពុជា គឺកើតឡើងពីការបោះឆ្នោតដោយសេរី ត្រឹមត្រូវ និងយុត្តិធម៌ យើងបោះឆ្នោតជ្រើសរើសមេដឹកនាំប្រទេស មិនមែនបានមកដោយឯកឯងទេ ប្រជាពលរដ្ឋជាម្ចាស់អំណាច។ ៥ឆ្នាំម្តង ការចេញទៅបោះឆ្នោតជ្រើសតាំងតំណាងរាស្ត្រ ជាសិទ្ធិស្របច្បាប់ របស់ប្រជាពលរដ្ឋដូចនេះ ប្រជាពលរដ្ឋត្រូវចេះប្រើសិទ្ធិ និងអំណាចរបស់ខ្លួន។ ដើម្បីឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ត្រូវមានគោលការណ៍ចំនួន៥គឺគោលការណ៍ជាសកល គោលការណ៍បោះឆ្នោតដោយសរី គោលការណ៍បោះឆ្នោតដោយផ្ទាល់ គោលការណ៍បោះឆ្នោតដោយស្នើភាព គោលការណ៍បោះឆ្នោតដោយសម្ងាត់។
លោកថា គ.ជ.ប មិនមែនជាស្ថាប័ននយោបានទេ គឺជាស្ថាប័នអនុវត្តន៍ច្បាប់សុទ្ធសាធ សមាជិកគ.ជ.ប ទោះចេញមកពីប្រភពណាក៏ដោយ ត្រូវអនុវត្តន៍សមត្ថកិច្ចរបស់ខ្លួន ដោយឯករាជ្យ អព្យាក្រឹត ឥតល្អៀង ហើយឈរលើគោលការណ៍គោរពច្បាប់ មិនទទួលការគាបសង្កត់ គំរាមកំហែង បំភិតបំភ័យ ឬការបង្គាប់បញ្ជាដោយផ្ទាល់ ឬដោយប្រយោលពីបុគ្គល ឬស្ថាប័នណាមួយឡើយ៕ ដោយ៖បញ្ញាស័ក្តិ
