កំពង់ចាម ៖ ករណីរួមភេទជាមួយអនីតិជន អាយុក្រោម១៥ឆ្នាំ ដែលកម្លាំងអធិការដ្ឋាននគរបាលស្រុកស្ទឹងត្រង់ បានបង្ក្រាបបុរសម្នាក់ ត្រូវបានលោក សួន សំណាង ចៅក្រមស៊ើបសួរ សាលាដំបូងខេត្តកំពង់ចាម ចេញដីកាបង្គាប់ឱ្យឃុំខ្លួន លេខ ៣៤៦ ត.ព្រ ចុះថ្ងៃទី៨ ខែមិថុនា ឆ្នាំ២០១៨ ពីបទរួមភេទ ជាមួយអនីតិជន អាយុក្រោម១៥ឆ្នាំ ប្រព្រឹត្តនៅភូមិខ្ពបតាងួន ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម កាលពីថ្ងៃទី៥ ខែមិថុនា ឆ្នាំ២០១៨។
ជនជាប់ចោទ អ៊ុង ប៊ុង ត្រូវបានសមត្ថកិច្ចបញ្ជូន ទៅឃុំខ្លួននៅពន្ធនាគារ ខេត្តកំពង់ចាម រួចរាល់ហើយ នៅថ្ងៃទី៨ ខែមិថុនា ឆ្នាំ២០១៨ តាមបញ្ញត្តិច្បាប់ មាត្រា៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
ស្នងការដ្ឋាននគរបាលខេត្តកំពង់ចាម បានរំលឹកផងដែរថា កាលពីថ្ងៃទី៥ ខែមិថុនា ឆ្នាំ២០១៨ វេលាម៉ោង២និង៣០នាទី ទៀបភ្លឺ មានឈ្មោះ អ៊ុង ប៊ុង ភេទប្រុស អាយុ២០ឆ្នាំ ជនជាតិខ្មែរ នៅភូមិបឹងរៃ ឃុំឫស្សីកែវ ស្រុកព្រែកប្រសព្វ ខេត្តក្រចេះ បានលួចឡើងលើផ្ទះរបស់ជនរងគ្រោះ នៅភូមិខ្ពបតាងួន ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម និងបានរួមភេទ ជាមួយជនរងគ្រោះ ភេទស្រី អាយុ១៤ឆ្នាំ។ ពេលនោះ ឪពុករបស់ជនរងគ្រោះ ឡើងទៅទាន់ ក៏បានចាប់ខ្លួនឈ្មោះ អ៊ុង ប៊ុង ហើយរាយការណ៍ជូនសមត្ថកិច្ច។ ក្រោយពីទទួលបានព័ត៌មានភ្លាម កម្លាំងអធិការដ្ឋាននគរបាលស្រុកស្ទឹងត្រង់ បានចុះធ្វើការស្រាវជ្រាវ បង្ក្រាបឃាត់ខ្លួនជនសង្ស័យឈ្មោះ អ៊ុង ប៊ុង ដើម្បីចងក្រងសំណុំរឿងចាត់ការតាមផ្លូវច្បាប់៕ ដោយ ៖ បញ្ញាស័ក្តិ
