ភ្នំពេញ ៖ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានប្រកាសប្រាប់ដល់បងប្អូនប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ស្របពេលដែលផ្ទៃសមុទ្រនឹងមានខ្យល់បក់បោកខ្លាំង និងរលកខ្ពស់ៗ ដោយសារឥទ្ធិពលខ្យល់ព្យុះ។
ក្រសួងធនធានទឹក បានបញ្ជាក់ថា ចាប់ពីថ្ងៃទី៨ ដល់ថ្ងៃទី១៥ ខែមិថុនា ឆ្នាំ២០១៨ ភ្លៀងនឹងបន្ដធ្លាក់ខ្លាំងនៅកម្ពុជា ពិសេសតំបន់មាត់សមុទ្រ ក្នុងខេត្តកោះកុង និងខេត្តព្រះសីហនុ ដោយសារតែឥទ្ធិពលរបស់កូនព្យុះទី ៤ និងព្យុះទី៥។ ចំណែកបណ្តារាជធានី ខេត្តដទៃទៀត នឹងបានរបាយទឹកភ្លៀងនឹងថមថយចុះ ពិសេសរាជធានីភ្នំពេញ ខេត្តកំពត តាកែវ កំពង់ស្ពឺ និងខេត្តកណ្តាល អាចនឹងមានភ្លៀងធ្លាក់តិចតួច។
ស្ថានភាពអាកាសធាតុនេះ កើតឡើងដោយវិសម្ពាធដែលបានកើតឡើងនៅសមុទ្រចិនខាងត្បូង បានវិវត្តន៍ខ្លួនទៅជាកូនព្យុះទី៤ ឈ្មោះ អ៊ីវីនណៀ (EWINIAR) និងកំពុងស្ថិតនៅក្បែរឆ្នេរសមុទ្រភាគខាងត្បូង ប្រទេសចិន ។ ការព្យាករណ៍ កូនព្យុះអ៊ីវីនណៀ នឹងថយឥទ្ធិពលជាបន្តបន្ទាប់ មកជាវិសម្ពាធ និងជាសម្ពាធទាប នៅថ្ងៃទី៨ខែមិថុនា។ ដោយឡែកវិសម្ពាធថ្មីមួយទៀត ដែលបានកើតឡើងនៅភាគអាគ្នេយ៍ ប្រទេសហ្វីលីពីន ក៏នឹងវិវត្តន៍ទៅជាព្យុះទី៥ផងដែរ៕ ដោយ៖បញ្ញាស័ក្តិ
