លោក គីម ជុងអ៊ុន មានគម្រោងទៅកាន់សិង្ហបុរីនៅថ្ងៃស្អែក ខណៈពេលដែល “អ្នកដើរតួជំនួសលោកគីម ជុងអ៊ុន ត្រូវចាប់ឃាត់ខ្លួនបាននៅសិង្ហបុរី ។
មេដឹកនាំកូរ៉េខាងជើងគីម ជុងអ៊ុន
ប្រភពព័ត៌មានពីអ្នករៀបចំផែនការនៃដំណើរទស្សនកិច្ចរបស់កូរ៉េខាងជើងឲ្យដឹងថា មេដឹកនាំប្រទេសនេះ លោកគីម ជុងអ៊ុន មានគម្រោងនឹងទៅដល់អាកាសយានដ្ឋាន Changi សិង្ហបុរី នៅថ្ងៃទី ១០ ខែមិថុនា គឺមុនជំនួបកំពូលជាមួយប្រធានាធិបតីអាមេរិក ដូណាល់ ត្រាំ -នេះបើតាម Reuter ។ ស្ថាប័នអាកាសចរណ៍សិង្ហបុរីពុំមានយោបល់អ្វីចំពោះព័ត៌មានចំពោះព័ត៌មាននេះទេ ។
ចំណែកសេតវិមានវិញបញ្ជាក់ថា លោកត្រាំ នឹងចាកចេញពីសន្និសីទកំពូល G7 នៅ Charlevoix, Quebec, Canada នៅថ្ងៃទី ៩ ខែមិថុនា បន្ទាប់មកនឹងឆ្ពោះមកកាន់សិង្ហបុរី ហើយតាមគម្រោង នឹងមានវត្តមាននៅទីនោះ នាថ្ងៃទី ១០ ខែមិថុនា ។ ក្នុងបរិបទមួយផ្សេងទៀត អ្នកដើរតួបន្លំលោកគីម ជុងអ៊ុន បានត្រូវគេចាប់ឃាត់ខ្លួននាព្រលានយន្តហោះសិង្ហបុរី ។
Howard X អ្នកជំនាញដើរតួលោកគីម ជុងអ៊ុន
Howard X គឺជាតារាកំប្លែងសញ្ជាតិអូស្ត្រាលី ដែលច្រើនដើរតួបន្លំជាមេដឹកនាំកូរ៉េខាងជើងគីម ជុងអ៊ុន ឲ្យដឹងថា លោកត្រូវបានគេឃាត់ខ្លួនអស់រយៈពេល ២ ម៉ោង ហើយត្រូវសួរចម្លើយអស់ ៣០នាទី បន្ទាប់ពីលោកមកដល់ព្រលានយន្តហោះ Chagi នៅសិង្ហបុរីកាលពីថ្ងៃទី ៨ ខែមិថុនា ។
ពួកគេសួរខ្ញុំ នូវសំណួរជាច្រើន ៖ “ទស្សនៈនយោបាយរបស់ខ្ញុំគឺជាអ្វី? ហើយខ្ញុំមានទាក់ទងដល់បាតុកម្មនៅប្រទេសដែរឬទេ?” ។ លោកបញ្ជាក់បន្ថែមថា គេបានសំណូមពរលោកឲ្យចៀសចេញឆ្ងាយពីកោះ Sentosa ព្រមទាំងសណ្ឋាគារ Shangri-La ដែលជាកន្លែងប្រព្រឹត្តទៅ នូវសន្និសីទកំពូល ។ ពួកគេប្រាប់ទៀតថា ៖ នោះគឺជាសន្និសីទកំពូលត្រាំ-គីម ហើយការដែលលោកមកចំខណៈពេលនេះ ពិតជារំញោចណាស់! ។ ក្រោយមកគេក៏បានដោះលែងខ្ញុំវិញ ៕ សូយន