សុភាពនារីណាក៏យល់ដែរថាអាចម៍រុយវាបង្កសម្ពាធធំធេងចំពោះស្បែកមុខ ទោះបីស្បែកមុខសម៉ត់ខៃយ៉ាងណាក៏ដោយ ខាងក្រោមនេះជារបៀបកម្ចាត់អាចម៍រុយដ៏មានប្រសិទ្ធភាព ៖
១.របៀបទី ១
វត្ថុធាតុផ្សំ ៖
-ស៊ុតមាន់ ១គ្រាប់
-ទឹកខ្មេះផ្លែប៉ោម ១ក្រឡតូច (ល្មមពន្លិចស៊ុតមាន់នោះ)
-ទឹកដោះគោឆៅគ្មានស្ករ ២ស្លាបព្រាបាយ
-ចាន និងស្លាបព្រា
យកស៊ុតមាត់ទៅត្រាំក្នុងទឹកខ្មេះរួចបន្ទាប់មកទើបលាយជាមួយទឹកដោះឆៅ ។
របៀបធ្វើ ៖
-លាងពងមាន់ឲ្យស្អាត រួចដាក់ទៅក្នុងក្រឡទឹកខ្មេះបិទឲ្យជិត ទុករយៈពេល ១ខែ ។
-មួយខែក្រោយពងមាន់នេះវានឹងរលាយក្នុងទឹកខ្មេះ ។ អ្នកដួស១ស្លាបព្រាបាយដាក់ចូលក្នុងចាន ។
-ចាក់ទឹកដោះគោឆៅគ្មានស្ករទៅក្នុងចានទឹកខ្មេះនោះ រួចកូរវាឲ្យខាប់ ។
របៀបអនុវត្ត ៖
-ដំបូងឡើយលាងសម្អាតមុខជាមួយទឹកក្តៅ ដើម្បីឲ្យរន្ធញើសរីក ។
-យកសារធាតុដែលលាយហើយមកលាបនៅតំបន់ដែលមានអាចម៍រុយ យកដៃញីស្រាលៗតាមទិសដៅទ្រនិចនាឡិកា ដោយប្រើពេល៣-៥ ដើម្បីឲ្យសារជាតិនោះចូលជ្រៅទៅក្នុងស្បែក។
-លាបសារធាតុនេះពីលើស្បែក ហើយទុកវារហូតដល់ស្ងួត ។
-រក្សាសារធាតុចម្រុះនេះពី ១៥-២០នាទី រហូតដល់ពេលវាស្ងួត សឹមយកទឹកក្តៅឧណ្ហមកលាងសម្អាត ។ បន្ទាប់មកត្រូវយកទឹកត្រជាក់មកលាងសំអាតដើម្បីឲ្យរន្ធញើសរឹតបន្តឹង ។
-យកទឹកត្រាំដោយផ្កាកូឡាប ឬឡេរក្សាសំណើមស្បែកមកលាបជាកិច្ចបញ្ចប់ ។
ចំណាំ ៖ គប្បីប្រើសារធាតុនេះ ពី ២-៣ ដង នោះ១ខែក្រោយអ្នកនឹងទទួលបានលទ្ធផលជាទីគាប់ចិត្ត ។
២.របៀបទី២
ព្យាបាលអាចម៍រុយឲ្យផុតពូជ ដោយខ្ទឹមបារាំង
វត្ថុធាតុផ្សំ ៖
-ខ្ទឹមបារាំងមួយមើម
-ទឹកខ្មេះប៉ោម ប្រមាណ ១ស្លាបព្រាបាយ
-កូនកន្សែងតូចមួយ
-ស្លាបព្រាមួយ
របៀបធ្វើ ៖
-បកសម្បកខ្ទឹមបារាំងខាងក្រៅចេញ បន្ទាប់មកកាត់វាតូចៗ ដូចក្នុងរូប ។
-បន្ទាប់មកយកមើមខ្ទឹមបារាំងនោះដាក់លើកន្សែង ហើយយកស្លាបព្រាសង្កត់ឲ្យខ្លាំង ឡើងម៉ត់ ។
-យកទឹកខ្មេះប៉ោមមួយស្លាបព្រាបាយមកលាយចូលគ្នាឲ្យក្លាយជាល្បាយ ។
របៀបអនុវត្ត ៖
-ក្រោយពីលាងសម្អាតមុខនឹងទឹកក្តៅឧណ្ឌ យកល្បាយដែលលាយមកលាបលើស្នាមជាំ យកដៃម៉ាស្សាស្រាលៗដើម្បីឲ្យសារធាតុនេះជ្រាបចូលជ្រៅទៅក្នុងស្បែកដើម្បីកម្ចាត់ចោលអាចម៍រុយនោះ ។
-រក្សាសារធាតុនេះ ១៥នាទី រួចលាងសម្អាតមុខដោយទឹកត្រជាក់ ។
-គប្បីធ្វើបែបនេះពី ២-៣ដងក្នុង១សប្តាហ៍ ហើយបណ្តាសារធាតុធ្វើឲ្យជាំខ្មៅ melanin វានឹងថយចុះបន្តិចម្តងៗ ហើយនឹងបាត់ស្រមោលតែម្តង ។
ខាងលើនេះជាវិធីកម្ចាត់អាចម៍រុយពីរបែប អាចអនុវត្តបានចំពោះតែមនុស្សពេញវ័យប៉ុណ្ណោះ។ ចំពោះក្មេងៗមិនទាន់ពេញវ័យមានរបៀបកម្ចាត់អាចម៍រុយ ៤បែបដូចខាងក្រោម ៖
១.ការប្រើម្សៅរមៀត
-យកម្សៅរមៀតមកលាយជាមួយទឹកក្នុងសមាមាត្រខាប់ស្អិត រួចលាបលើតំបន់ដែលមានអាចម៍រុយ។
-ទុកពី ១៥-២០នាទី ទើបលាងចេញដោយទឹកក្តៅឧណ្ហ ។
២.កម្ចាត់អាចម៍រុយដោយវីតាមីនអ៊ី
-យកវីតាមីនអ៊ីមកលាបពីលើស្បែកមុខរបស់ក្មេងដែលមានអាចម៍រុយ ទុកពី ១៥-២០ ទើបលាងចេញជាមួយនឹងទឹកត្រជាក់។
៣.របៀបកម្ចាត់អាចម៍រុយដោយទឹកឃ្មុំ
-យកទឹកឃ្មុំពី 2-3 ស្លាបព្រាកាហ្វេ លាយជាមួយផ្នែកសនៃស៊ុត១គ្រាប់ កូរវាឲ្យសព្វ ។ យកសារធាតុនេះមកលាបលើតំបន់ដែលមានអាចម៍រុយ ទុក ១៥-២០ នាទី ទើបលាងចេញ។
៤.របៀបកម្ចាត់អាចម៍រុយជាមួយក្រូចឆ្មារ និងទឹកឃ្មុំ
-យកទឹកក្រូចឆ្មារ ១ស្លាបព្រាកាហ្វេ មកលាយជាមួយទឹកឃ្មុំ១ស្លាបព្រាកាហ្វេ លាបដោយផ្ទាល់លើតំបន់ដែលមានអាចម៍រុយ ទុក ១៥-២០នាទី ទើបលាងចេញដោយទឹកត្រជាក់ ៕ លីសា
