បុរសជាអ្នកទេសចរសញ្ជាតិអូស្ត្រាលីម្នាក់អាយុ ២១ ឆ្នាំ បានរងរបួសត្រូវ១កាំបិតយ៉ាងចុកចាប់ បន្ទាប់ពីរូបគេបានប្រព្រឹត្តទង្វើមិនសមរម្យ យកដៃស្ទាបគូស្ត្រីម្នាក់នៅក្នុងក្លឹបរាត្រីមួយកន្លែង នៅក្នុងប្រទេសថៃ ។
សារព័ត៌មាន Daily Mail បានចុះផ្សាយឲ្យដឹងថា Jaydon Sienkiewicz បានចូលទៅលេងជប់លៀងសប្បាយជាមួយឪពុករបស់គាត់ជាជនជាតិអូស្ត្រាលី និងម្តាយចុងជាជនជាតិថៃឈ្មោះ Khumkhun Songnagrong និងមនុស្ស ៨ នាក់ ផ្សេងទៀត នៅក្លឹប Mixx Discotheque ដែលមានទីតាំងស្ថិតនៅតាមបណ្តោយផ្លូវថ្មើរជើងមួយកន្លែង ក្នុងទីក្រុងប៉ាតាយ៉ា នៅវេលាម៉ោង ៤ ទៀបភ្លឺ កាលពីថ្ងៃទីព្រហស្បតិ៍ ។
Sienkiewicz ស្ថិតក្នុងស្ថានភាពស្រវឹង បានទៅប្រើប្រាស់បន្ទប់ទឹក ហើយកាមេរ៉ាឃ្លាំមើល បានបង្ហាញឲ្យឃើញបុរសវ័យក្មេងនេះឈរនៅទល់មុខនឹងស្ត្រីថៃម្នាក់ ដែលបានយកដៃឱបបុរសម្នាក់ផ្សេងទៀត ដែលគេជឿថាជាមិត្តប្រុសនាង ។ ប៉ុន្តែ នៅពេលនោះ ស្រាប់តែ Sienkiewicz បានយកដៃទៅចាប់ច្របាច់គូទស្ត្រីនោះតែម្តង ។
ខណៈស្រីនោះប្រតិកម្មនឹងទង្វើមិនសមរម្យនេះ ភ្លាមៗនោះ មិត្តប្រុសរបស់នាងត្រូវបានឃើញស្ទុះចេញពីនាង និងដកកាំបិតចាក់ទៅលើ Sienkiewicz ១កាំបិតតែម្តង ។ ក្រោយការវាយប្រហារ អ្នកទេសចរខិលខូចនេះបានលាត់អាវរកឃើញរបួស១កាំបិត និងដើរចេញទៅកាន់តុឪពុម្តាយរបស់គាត់ ។
Sienkiewicz ដែលឥឡូវនេះស្ថិតក្នុងស្ថានភាពស្ថិរភាព ត្រូវបានយកទៅកាន់មន្ទីរពេទ្យ Pattya Hospital ទីកន្លែងដែលគាត់ត្រូវបានព្យាបាលសម្រាប់ការបាត់បង់ឈាម និងខូចសរីរាង្គ ។ ម្តាយរបស់ចុងរបស់គាត់បានប្រាប់ប៉ូលីសថា នាងពុំដឹងថាមូលហេតុអ្វី បានជានរណាម្នាក់ធ្វើឲ្យកូនចុងរបស់នាងរងរបួសបែបនេះនោះទេ ។
ឥឡូវនេះ ប៉ូលីសថៃ បានកំពុងប្រើប្រាស់វីដេអូកាមេរ៉ា ដើម្បីកំណត់អត្តសញ្ញាណបុរសម្នាក់ ដែលជាមិត្តប្រុសរបស់ស្ត្រីរងការបៀតបៀនកេរ្តិ៍ខ្មាស ពីសំណាក់ Sienkiewicz ផងដែរ ។
Sienkiewicz ត្រូវបានផ្តល់ជំនួយជាទឹកប្រាក់ចំនួន ៥ ពាន់បាត (ស្មើនឹង ១៥៦.២០ ដុល្លារ) សម្រាប់ការព្យាបាលរបួសរបស់គាត់ ទោះបីរូបគាត់បានប្រព្រឹត្តនូវទង្វើមិនសមរម្យទៅលើស្ត្រីម្នាក់នោះក៏ដោយ, នេះបើយោងតាម The Sun ។
ប៉ូលីសបានចេញដីកាចាប់ខ្លួនជនសង្ស័យដែលពុំស្គាល់អត្តសញ្ញាណម្នាក់នោះ ដែលគេជឿថាជាជនបស្ចឹមប្រទេស ដែលអាចបានគេចខ្លួនពីប្រទេសថៃ កាលពីថ្ងៃអង្គារ រួចទៅហើយ ៕ ចន្ទី