កណ្ដាល ៖ រថយន្តក្រុងដឹកអ្នកដំណើរមួយគ្រឿង របស់ក្រុមហ៊ុននីកាខូអិលធីឌី ដែលលួចលាក់ដឹកឈើប្រណីតប្រភេទសុក្រំចំនួន៥៩ដុំ ត្រូវបាននគរបាល បង្ក្រាបបាន នៅវេលាម៉ោង២និង៣០នាទីយប់ ថ្ងៃទី៩ ខែមិថុនា ឆ្នាំ២០១៨ តាមបណ្ដោយផ្លូវជាតិលេខ៥ ស្ថិតក្នុងភូមិទួលអំពិល ឃុំពញាឮ ស្រុកពញាឮ ខេត្តកណ្ដាល ។
មន្ត្រីនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្ដាលបានឲ្យដឹងថា ប្រតិបត្តិការបង្ក្រាបនេះធ្វើឡើងដោយនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្ដាល ដោយមានការចង្អុលបង្ហាញ ពីលោកឧត្តមសេនីយ៍ទោ អាវ ចំរើន ស្នងការនគរបាលខេត្តកណ្តាល និងមានការឯកភាពពីព្រះរាជ្ញាអមសាលាដំបូងខេត្តកណ្តាល ចុះបង្ក្រាបពួនស្ទាក់ឃាត់ទុក និងដកហូតឈើប្រណិតចំនួន៥៩ដុំនោះ នៅក្នុងរថយន្តក្រុងដឹកនាំអ្នកណើរមួយគ្រឿង ម៉ាក KAI ពណ៌សលាយខៀវ ពាក់ស្លាកលេខភ្នំពេញ 3D-9377 ។ សមត្ថកិច្ចបានដកហូតវត្ថុតាងរួមមាន ឈើប្រណិតចំនួន៥៩ដុំ ជាប្រភេទឈើសុក្រំ ស្លាកលេខរថយន្តក្លែងក្លាយភ្នំពេញ3C-6871 ចំនួន២បន្ទះ និងនាមប័ណ្ណក្រុមហ៊ុននីកាខូអិលធីឌី ចំនួន៣៧សន្លឹក ។
មុននឹងឈានដល់ធ្វើការបង្ក្រាបបទល្មើសដឹកជញ្ជូនឈើប្រណិតដោយខុសច្បាប់នេះ នគរបាលជំនាញ បានទទួលបញ្ជាពីលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្ដាលថា មានរថយន្ដក្រុងមួយមួយគ្រឿង ដឹកឈើប្រណិតខុសច្បាប់មួយគ្រឿងកំពុងធ្វើដំណើរ ឆ្លងកាត់ក្នុងភូមិសាស្ត្រស្រុកពញាឮ ភ្លាមនោះកម្លាំការិយាល័យជំនាញ បានធ្វើការចុះបង្ក្រាបពួនស្ទាក់ រួចកសាងឯកសារ ដកហូតយកមកស្នងការដ្ឋាននគរបាលខេត្តកណ្ដាល ដើម្បីចាត់ការតាមនីតិវិធីច្បាប់ ។
នគរបាលបានចោទប្រកាន់ និងកសាងឯកសារ លើរថយន្តដឹកឈើប្រណិតខុសច្បាប់ខាងលើនេះ គឺជាប់ពាក់ព័ន្ធបទល្មើសចំនួន២ករណី ទី១-បទល្មើសដឹកឈើប្រណិតដោយខុសច្បាប់ និងទី២-ប្រើប្រាស់ស្លាកលេខក្លែងក្លាយ ៕ ដោយ ៖ បញ្ញាស័ក្តិ
