ភ្នំពេញ ៖ រដ្ឋមន្ត្រីក្រសួងកសិកម្ម បានបញ្ជាក់ថា ទន្ទឹមនិងសមិទ្ធភាពដ៏ធំធេង ដែលទទួលបានកន្លងមក វិស័យកសិកម្ម នៅមានបញ្ហាប្រឈមជាច្រើន ដែលទាមទារឲ្យមានការដោះស្រាយ និងធ្វើកំណែទម្រង់លើគ្រប់អនុវិស័យឲ្យបានល្អប្រសើរ មានប្រសិទ្ធភាព ប្រសិទ្ធផល និងទាន់ពេលវេលា។
នៅថ្ងៃសៅរ៍ទី៩ ខែមិថុនា ឆ្នាំ ២០១៨ នៅទីស្តីការក្រសួងកសិកម្ម រុក្ខាប្រមាញ់ និងនេសាទ មានរៀបចំកិច្ចប្រជុំផ្ទៃ ក្នុងដើម្បីពិនិត្យលើវឌ្ឍនភាព បញ្ហាប្រឈម យុទ្ធសាស្ត្រ និងការធ្វើកំណែទម្រង់លើវិស័យកសិកម្ម ក្រោមអធិបតីភាព លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីសំណាក់រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង និងថ្នាក់ដឹកនាំស្ថាប័ននានា និងមន្ត្រីរាជការក្រោមឱវាទប្រមាណជា៥០០នាក់។
លោកវេង សាខុន បានបញ្ជាក់ថា កិច្ចប្រជុំផ្ទៃ ក្នុងដើម្បីពិនិត្យលើវឌ្ឍនភាព បញ្ហាប្រឈម យុទ្ធសាស្ត្រ និងការធ្វើកំណែទម្រង់លើវិស័យកសិកម្ម ឆ្លើយតមតាមតម្រូវការជាក់ស្តែង នៃការអភិវឌ្ឍសេដ្ឋកិច្ចជាតិ កំណែលម្អកម្រិតជីវភាព កាត់បន្ថយភាពក្រីក្រ និងការធ្វើចំណាកស្រុក ជាពិសសសមស្របតាមនិន្នាការ នៃតម្រូវការទីផ្សារកសិផល ដែលមានគុណភាព សុវត្ថិភាព និងស្តង់ដារ របស់ទីផ្សារនាំចូល។
លោក ស្រី វុឌ្ឍី អគ្គលេខាធិការ ក្រសួងកសិកម្ម រុក្ខាប្រមាញ់ និងនេសាទ បានសម្តែងនូវមតិស្វាគមន៍ និងរាយការណ៍ជូនអង្គពិធីជ្រាបដោយសង្ខេបអំពីទី១៖ វឌ្ឍនភាពនៃវិស័យកសិកម្ម ទី២៖ បញ្ហាប្រឈមដែលបានជួបប្រទះក្នុងការអនុវត្តជាក់ស្តែង ទី៣៖ ការធ្វើកំណែទម្រង់ក្នុងវិស័យកសិកម្ម និងទី៤៖គោលនយោបាន និងផែនការអនុវត្តបន្តក្នុងនោះ មានគោលនយោបាននៃការធ្វើទំនើបកម្មកសិកម្ម សមស្របទៅតាមនិន្នាការនៃកំណើនសេដ្ឋកិច្ច បម្រែបម្រួលអាកាសធាតុ និងតម្រូវការទីផ្សារទាំងក្នុងនិងក្រៅស្រុក ផែនការជំរុញ គាំទ្រ និងលើកទឹកចិត្តដល់ការវិនិយោគលើការផលិត និងកែច្នៃគ្រប់ជ្រុង ជ្រោយ ផែនការកំណត់តំបន់ដាំដុះឲ្យបានសម ស្របតាមស្ថានភាព គុណភាពដី លក្ខខណ្ឌអំណោយផលទឹក និងរចនាសម្ព័ន្ធដឹកជញ្ជូន ស្តុកទុក និងកែច្នៃ។
លោករដ្ឋមន្ត្រី វេង សាខុន បានធ្វើការកោតសរសើរ និងវាយតម្លៃខ្ពស់ចំពោះថ្នាក់ដឹកនាំក្រសួង ថ្នាក់ដឹកនាំអង្គភាពជំនាញក្រោមឱវាទ មន្ត្រីរាជការគ្រប់ជាន់ថ្នាក់ ដែលបានខិតខំយកចិត្តទុកដាក់ យកអស់ស្មារតីទទួលខុសត្រូវបំពេញតួនាទី និងភារកិច្ចដែលថ្នាក់ដឹកនាំក្រសួង ក៏ដូចជារាជរដ្ឋាភិបាលបានប្រគល់ជូន ទទួលបានលទ្ធផលគួរជាទីមោទនៈ។
លោករដ្ឋមន្ត្រីបានផ្តល់អនុសាសន៍សំខាន់ជូនថ្នាក់ដឹកនាំ និងមន្ត្រីក្រោមឱវាទឲ្យ យកចិត្តទុកដាក់ទ្វេរឡើងថែមទៀត ក្នុងការបំពេញការងារ ក្នុងនោះមានអនុវិស័យកសិកម្ម (ការដាំដុះដំណាំ) គឺត្រូវធ្វើឲ្យបានល្អប្រសើរ តាមការអនុវត្តកសិកម្មតាមកិច្ចសន្យា ការអនុវត្តកសិកម្មល្អ (Good Agricultural Practices) ការកំណត់តំបន់ដាំដុះ ការផលិតពូជសុទ្ធល្អ ការលើកទឹកចិត្តដល់ការវិនិយោគលើការផលិត ការកែច្នៃ វេចខ្ចប់ និងនាំចេញ។
លោករដ្ឋមន្ត្រីបានជំរុញឲ្យបង្កើនកិច្ចសហការជាមួយ ដៃគូអភិវឌ្ឍន៍ និងវិស័យឯកជន ដើម្បីចូលរួមអភិវឌ្ឍវិស័យកសិកម្ម ឲ្យមានការរីកចម្រើនថែមទៀត ធានាបាននូវកំណើនសេដ្ឋកិច្ច និងសន្តិសុខស្បៀង។ ត្រូវបង្កើនការងារស្រាវជ្រាវ ផ្សព្វផ្សាយ និងលើកកម្ពស់ការងារគ្រប់គ្រងស្ថានីយ មជ្ឈមណ្ឌល កន្លែងពិសោធន៍ឲ្យមានសកម្មភាពឡើងវិញ ដើម្បីបំពេញតួនាទីជាអ្នកផលិតពូជសុទ្ធល្អ ផ្សព្វផ្សាយ និងបណ្តុះបណ្តាល។ ពង្រឹងនិងពង្រីកការអនុវត្តបច្ចេកទេសគ្រឿងយន្តកសិកម្មធានាបានគុណភាព សុវត្ថិភាព និងសមស្របទៅតាមលទ្ធភាពរបស់អ្នកប្រើប្រាស់។ អនុវិស័យសុខភាពសត្វនិងផលិតកម្មសត្វ អគ្គនាយកដ្ឋានត្រូវយកចិត្តទុកដាន់លើការផលិតដំណាំ ចំណីសត្វបំពេញបង្គ្រប់តម្រូវការក្នុងស្រុក កាត់បន្ថយការនាំចូល។ ពង្រឹង និងពង្រីកការផ្សព្វផ្សាយការ អនុវត្តផលិតកម្មសត្វល្អ (Good Animal Husbandry Practice, GHP) និងច្បាប់ស្តីពីសុខភាពសត្វ និងផលិតកម្មសត្វ អនុក្រឹត្យ និងសេចក្តីប្រកាសក្រោមច្បាប់ឲ្យមានប្រសិទ្ធភាព។ ពង្រឹង និងពង្រីកការត្រួតពិនិត្យសុខភាពសត្វ គុណភាពនិងសុវត្ថិភាពសាច់ និងផលិតផលសត្វ ដើម្បីធានាបានសុវត្ថិភាព សុខភាពសាធារណៈ។ វិស័យជលផលនិងព្រៃឈើ លោករដ្ឋមន្ត្រីបានជូនមតិឲ្យថ្នាក់ដឹកនាំ និងមន្ត្រីក្រោមឱវាទ ត្រូវខិតខំធ្វើកំណែទម្រង់វិស័យទាំងពីរនេះ ដូចជាកំណែទម្រង់ច្បាប់ ការគ្រប់គ្រងនិងអនុវត្តច្បាប់ ដើម្បីធានាបាននូវប្រសិទ្ធភាព នៃការអនុវត្តគោលនយោបាយ និងផែនការយុទ្ធសាស្ត្រ ជាពិសេសផ្តល់ជូនអគ្គលេខាធិការ ធ្វើការពិនិត្យ និងពិភាក្សាគ្នាឲ្យបានល្អិតល្អន់ ដើម្បីដាក់ស្នើសុំទៅប្រមុខរាជរដ្ឋាភិបាល ក្នុងការបង្កើតរាជបណ្ឌិតវិទ្យាសាស្ត្រកសិកម្ម ។ លើកកម្ពស់លើការគ្រប់គ្រងការផលិត ការកៃច្នៃ និងនាំចេញ ខិតខំនិងយកស្មារតីទទួលខុសត្រូវទប់ស្តាត់ នូវរាល់បទល្មើសឲ្យមានសប្រសិទ្ធភាព។ ត្រូវយកចិត្តទុកដាក់អភិវឌ្ឍសហគមន៍តាមរយៈការបង្កើតមុខរបរថ្មី ដើម្បីបង្កើនប្រាក់ចំណូលសហគមន៍ កាត់បន្ថយការពឹងផ្អែកលើផល និងអនុផលធនធានធម្មជាតិ។ ជារួមអនុវិស័យទាំងអស់ត្រូវបន្តពង្រឹង និងពង្រីកការប្រើប្រាស់ ការផ្សព្វផ្សាយព័ត៌មានវិទ្យាឲ្យបានត្រឹមត្រូវច្បាស់លាស់ មានប្រសិទ្ធភាព និងទាន់ពេលវេលាក្នុងការឆ្លើយតបទៅនឹងសេចក្តីត្រូវការរាល់បញ្ហាប្រឈម ដែលទាក់ទងនិងវិស័យកសិកម្មជូនប្រជាកសិករ៕ ដោយ៖បញ្ញាស័ក្តិ
