ភ្នំពេញ ៖ នាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ បានប្រាប់ឧត្តមសេនីយ៍ទោ Jacob Gideon Kingu នាយកសាកលវិទ្យាល័យការពារជាតិ ប្រទេសតង់សានៀ ឱ្យដឹងថា សង្គ្រាមទាំងអស់ មិនអាចបញ្ចប់ បានដោយកម្លាំងយោធានោះទេ គឺនៅចុងបញ្ចប់ត្រូវតែមានការចរចា ផ្លូវនយោបាយមួយ ដើម្បីសម្របសម្រួលរកសន្តិភាព ដោយឈរលើគោលការណ៍ សមភាពខាងសេដ្ឋកិច្ច និងផលប្រយោជន៍។
នៅអគ្គបញ្ជាការដ្នាន ថ្ងៃទី១២ ខែមិថុនា ឆ្នាំ២០១៨ នាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ បានទទួលស្វាគមន៍យ៉ាងកក់ក្តៅ ចំពោះគណៈប្រតិភូសាកលវិទ្យាល័យ ការពារជាតិតង់សានៀ ដឹកនាំដោយ លោកឧត្តមសេនីយ៍ទោ Jacob Gideon Kingu នាយកសាកលវិទ្យាល័យការពារជាតិ តង់សានៀ ដែលបានអញ្ជើញ បំពេញទស្សនកិច្ច នៅព្រះរាជាណាចក្រកម្ពុជា រយៈពេល៨ថ្ងៃ គឺចាប់ពីថ្ងៃទី៩ ដល់ថ្ងៃទី១៦ ខែមិថុនា ឆ្នាំ២០១៨។
នាយឧត្តមសេនីយ៍ ប៉ុល សារឿន ក៏បានជម្រាបជូនគណៈប្រតិភូថា រាជរដ្ឋាភិបាល ក្រោមការដឹកនាំប្រកបដោយ គតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យប្រទេសជាតិ មានសុខសន្តិភាពពេញបរិបូណ៌ និងមានការអភិវឌ្ឍ រីកចម្រើនលើគ្រប់វិស័យ។ ប្រទេសកម្ពុជា មានសន្តិភាពេញលេញ ក្នុងរយៈពេលជាង២០ឆ្នាំ កន្លងមកនេះ គឺតាមរយៈការអនុវត្ត នយោបាយឈ្នះឈ្នះ របស់សម្តេចតេជា ហ៊ុន សែន ដែលបានរំលាយ អង្គការចាត់តាំង នយោបាយ និងយោធាខ្មែរក្រហម ហើយនាំមកនូវសន្តិភាព ជូនប្រទេសជាតិ នៅចុងឆ្នាំ១៩៩៨។ សន្តិភាព គឺជាមូលដ្ឋានគ្រឹះដ៏រឹងមាំ ក្នុងការអភិវឌ្ឍប្រទេសជាតិ។ រីឯសង្គ្រាម គឺបំផ្លាញ សង្គ្រាមបញ្ចប់ដោយការចរចា សង្គ្រាមមិនបញ្ចប់ដោយសង្គ្រាមនោះឡើយ។ ក្នុងន័យនេះ ទោះក្នុងតម្លៃណាក៏ដោយ កម្ពុជា ត្រូវថែរក្សាការពារ ឱ្យបានរឹងមាំនូវសន្តិភាព ដើម្បីបន្តការអភិវឌ្ឍប្រទេសជាតិ ឱ្យកាន់តែរីកចម្រើនថែមទៀត។ យើងជាកងទ័ព សូមប្រឆាំងដាច់ខាត ចំពោះសកម្មភាពណាមួយ ឬក្រុមណាមួយ ដែលមានចរិតជាបដិវត្តន៍ពណ៌។
លោកឧត្តមសេនីយ៍ទោ Jacob បានថ្លែងអំណរគុណ និងកោតសរសើរ ដល់ការរីកចម្រើន យ៉ាងឆាប់រហ័ស របស់ព្រះរាជាណាចក្រកម្ពុជា។ គោលបំណងនៃដំណើរទស្សនកិច្ចនេះ ដើម្បីផ្លាស់ប្តូរបទពិសោធន៍ និងស្វែងយល់អំពីសម្បត្តិ វប្បធម៌ប្រពៃណី និងការ អភិវឌ្ឍរីកចម្រើនរបស់ប្រទេសកម្ពុជា។ ឧត្តមសេនីយ៍ទោ Jacob បានបញ្ជាក់ថា សាកលវិទ្យាល័យការពារជាតិតង់សានៀ បានបង្កើតឡើងនៅឆ្នាំ២០១២ ដែលបានបណ្តុះបណ្តាល សិក្ខាកាមចំនួន ៥វគ្គរួចមកហើយ។ ក្រុមដែលអញ្ជើញមកនេះ គឺវគ្គទី៦ ឆ្នាំសិក្សា ២០១៧-២០១៨ មានសិក្ខាកាមចំនួន៣៣នាក់ ក្នុងនោះ សិក្ខាកាម១២នាក់ មកពីបណ្តាប្រទេសជាមិត្ត ដែលមានតួនាទីជាកងទ័ព នគរបាល និងជាមន្រី្តរាជការ ស៊ីវិល។ នាយកសាកលវិទ្យាល័យបានបន្តថា ប្រទេសតង់សានៀក៏ត្រូវការរក្សាសុខសន្តិភាព ស្ថិរភាព។ ដូច្នេះការសិក្សាចាំបាច់ត្រូវផ្តោតសំខាន់លើសុខសន្តិភាពក្នុងតំបន់ និងក្រៅតំបន់។ ហើយនេះជាការអនុវត្តមេរៀនជាក់ស្តែងក្នុងការសិក្សា ស្វែងយល់បទពិសោធន៍នៅប្រទេសកម្ពុជា ៕ ដោយ ៖ បញ្ញាស័ក្តិ