ភ្នំពេញ ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានមានប្រសាសន៍ស្នើដល់ព្រះសង្ឃនិងពុទ្ធបរិស័ទនិងសប្បុរជន
ជួយកសាងវត្តឲ្យមានការរីកចម្រើនទៅទៅទៀត ស្របតាមការរីកចម្រើននៃប្រទេសជាតិ ជាពិសេសព្រះសង្ឃ ត្រូវអនុវត្តន៍ឲ្យបានម៉ឺងម៉ាត់ ចំពោះវិន័យសង្ឃ និងទប់ស្កាត់ការយកសាសនា ទៅអាជីវកម្ម ដែលនាំឲ្យប៉ះពាល់ ដល់ជំនឿរបស់ប្រជាជនចំពោះព្រះពុទ្ធសាសនា ។
សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា និងលោកឃួង ស្រេង អភិបាលរាជធានីភ្នំពេញនៅព្រឹកថ្ងៃទី១៣ ខែមិថុនា ឆ្នាំ២០១៨នេះ បានអញ្ជើញជាអធិបតីភាព សម្ពោធឧបដ្ឋានសាលា និងសមិទ្ធផល ក្នុងវត្តចំការខ្សាច់ស្ថិតនៅក្នុងសង្កាត់ស្ពានថ្ម ខណ្ឌដង្កោ ដែលមានតម្លៃជាង៦០ម៉ឺនដុល្លារ ដើម្បីបំរើក្នុងវិស័យព្រះពុទ្ធសាសនា។
សម្តេចវិបុលសេនាភក្តី បានថ្លែងជំរុញឲ្យការកសាងវត្ត ឲ្យក្លាយជាមណ្ឌល នៃជីវភាពខាងស្មារតី ដែលចូលរួមយ៉ាងសកម្មក្នុងការអភិវឌ្ឍសង្គមជាតិ អភិវឌ្ឍន៍ផ្នែកវប្បធម៌ អប់រំ សុខាភិបាល សង្គមកិច្ច និងសីលធម៌សង្គម។ ស្នើដល់ព្រះគ្រប់អង្គនិងពុទ្ធបរិស័ទថែរក្សាសាមគ្គីភាព និងភាពសុខដុមរមនា ជាមួយសាសនិកដទៃទៀត ដែលមាននៅក្នុងមូលដ្ឋាន របស់យើងទៅតាមគោលនយោបាយ សុខដុមនីយកម្មសាសនា របស់រាជរដ្ឋាភិបាល។
ក្នុងពិធីនេះដែរ លោកឃួង ស្រេង បានមានប្រសាសន៍លើកឡើងថា នៅក្នុងរាជធានីភ្នំពេញ ដោយមានការគាំទ្រយ៉ាងពេញទំហឹងពីសម្តេចតេជោ ប្រមុខរាជរដ្ឋាភិបាល និងមានការចូលរួមយ៉ាងសកម្មខ្លាំងក្លា របស់ថ្នាក់ដឹកនាំព្រះពុទ្ធសាសនា ពុទ្ធបរិស័ទគ្រប់មជ្ឈដ្ឋានបានធ្វើឲ្យវិស័យព្រះពុទ្ធសាសនា មានភាពរីកចម្រើនទៅមុខគួរឲ្យកត់សម្គាល់។ រាជធានីភ្នំពេញ មានវត្តអារ៉ាមសរុបចំនួន១៤៩វត្តមានព្រះសង្ឃគង់អាស្រ័យចំនួន៨១៩៥អង្គ គណៈកម្មការវត្តចំនួន១០៤៥នាក់ សីលវន្តសីលវតីចំនួន១៥៤៣នាក់។
លោកបន្តថា វត្តចំការខ្សាច់ ជាវត្តក៏ចំណាស់មួយរបស់កម្ពុជា គឺបានកសាងឡើងតាំងពីឆ្នាំ១៥០៤ មកម្ល៉េះ គិតមកដល់បច្ចុប្បន្ន នេះមានអាយុកាល៥១៤ឆ្នាំហើយ ។ សព្វថ្ងៃ វត្តចំការខ្សាច់ ស្ថិតនៅក្នុងភូមិម៉ឺន្ត្រា សង្កាត់ស្ពានថ្ម ខណ្ឌដង្ក រាជធានីភ្នំពេញ ហើយត្រូវបានព្រះសង្ឃ ពុទ្ធបរិស័ទ បានរួមគ្នាអភិវឌ្ឍន៍វត្តនេះ ឲ្យមានការរីកចម្រើន គួរឲ្យគត់សម្គាល់ គឺមានលក្ខណៈសមជាទីសក្ការៈបូជារហូតមក។ ប៉ុន្តែនៅចន្លោះឆ្នាំ១៩៧២ ដល់១៩៧៩ ទីវត្តនេះបានក្លាយទៅជាទីតាំងសមរភូមិរវាងកងទ័ព ដែលដឹកនាំដោយសេនាប្រមុខលន់នល់ និងចលនារំដោះជាតិខ្មែរក្រហមបានបំផ្លាញសមិទ្ធផលនានា ក្នុងវត្តទាំងស្រុង។
វត្តចំការខ្សាច់ ត្រូវបានបើកឲ្យប្រជាពលរដ្ឋចូលគោរពបូជា ឡើងវិញ នៅក្នុងឆ្នាំ១៩៨២។ ចាប់ពីឆ្នាំ១៩៨២ រហូតមក ដល់ពេលនេះមានព្រះចៅអធិការចំនួន១០អង្គហើយ។ បច្ចុប្បន្ននេះ ព្រះតេជគុណ ឈឿន ឈូក ជាព្រះចៅអធិការនិងមានព្រះសង្ឃគង់អាស្រ័យចំនួន២០អង្គ។ ហើយសមិទ្ធផលនានាជាច្រើនត្រូវបានកសាងសង់ និងជួលជុលជាបន្តបន្ទាប់ក្នុងនោះរួមមាន រោងភត្ត បូជណីយដ្ឋាន ព្រះពុទ្ធបដិមាស្ពាន់ ឆព្វណ្ណរង្សី រូបសំណាកព្រះបាទជយវរ្ម័នទី៧ កសាងកុដិថ្មី១ខ្នងចាក់ដីបំពេញទីធ្លាវត្ត ចាក់សាប បន្ទប់ទឹក រៀបចំសួនច្បារ បង្គោលភ្លើង ជីកអណ្តូងទឹក៣កន្លែង ប្រព័ន្ធទឹកប្រើប្រាស់ក្នុងវត្ត និងកសាងឧបដ្ឋានសាលា សាលាពុទ្ធិកបឋមសិក្សា ដែលមានទំហំបណ្តោយ ប្រវែង៣០ម៉ែត្រ ទទឹងប្រវែង២២ម៉ែត្រ កម្ពស់២៤ម៉ែត្រ ចាប់ផ្តើមកសាងចាប់ពីថ្ងៃទី១០ ខែធ្នូឆ្នាំ២០១៤ និងបានបញ្ចប់ជាស្ថាពរនៅថ្ងៃទី៣០ខែឧសភា ឆ្នាំ២០១៨។
សមិទ្ធផលទាំងអស់នេះ គឺបានកើតចេញពីមនុញ្ញផល នៃការអភិវឌ្ឍជាតិមាតុភូមិ ដើម្បីទ្រទ្រង់លើកស្ទួយវិស័យព្រះពុទ្ធសាសនានិងផ្តើមចេញពីកម្លាំងមហាសាមគ្គីរបស់រាជរដ្ឋាភិបាល អាជ្ញាធរដែនដី ព្រះសង្ឃ លោកយាយ លោកតា ពុទ្ធបរិស័ទចំណុះជើងវត្តបងប្អូនប្រជាពលរដ្ឋ ព្រមទាំងសប្បុរជនទាំងក្នុងនិងក្រៅប្រទេស ដែលបានចំណាយថវិកាសរុបចំនួន៦០៣.១៩០ដុល្លារ ។
ឧបដ្ឋានសាលានិងសមិទ្ធផលនានាជាច្រើនទៀតក្នុងទីវត្តចំការខ្សាច់ នឹងក្លាយជាប្រយោជន៍សម្រាប់ព្រះថេរនុថេត្ថេរៈគ្រប់ព្រះអង្គបំពេញសង្ឃកម្មតាមពុទ្ធោវាទនិងជាទីសេនាសនៈដ៏គត់មត់ សម្រាប់សីលវន្ត សីលវតី និងបងប្អូនពុទ្ធបរិស័ទទាំងអស់ ប្រណិប័តន៍ព្រះធម៌ ព្រះវិន័យ ទុកជាធម្មទានដ៏ល្អក្នុងវិស័យព្រះពុទ្ធសាសនា៕ ដោយ ៖ បញ្ញាស័ក្តិ
