តាំងពីបុរាណកាលមក គេតែងប្រើដើមព្រះខ្លប ដើម្បីព្យាបាលជំងឺគេងមិនលក់ ប៉ុន្តែថ្មីៗនេះ គេបានរកឃើញនូវប្រសិទ្ធភាពរបស់វា ក្នុងការព្យាបាលជំងឺសន្លាក់រ៉ាំរ៉ៃ ។
លក្ខណៈឱសថ តាមឱសថសាស្ត្របុរាណព្រះខ្លប មានរសជាតិរាងផ្អែម មានប្រសិទ្ធភាពធ្វើឲ្យស្ងប់អារម្មណ៍ ប្រឆាំងការរលាក បន្ថយការឈឺចាប់ បន្ថយសម្ពាធឈាម និងធ្វើធ្វើឲ្យនោមច្រើន ។
ការស្រាវជ្រាវក្នុងសម័យទំនើបនេះ បញ្ជាក់ថា ដើមព្រះខ្លបមានប្រសិទ្ធភាពក្នុងការធ្វើឲ្យស្ងប់ប្រព័ន្ធសរសៃប្រសាទកណ្តាល ហើយក៏អះអាងតាមបែបវិទ្យាសាស្ត្រថា មនុស្សបុរាណប្រើប្រាស់វាសម្រាប់ព្យាបាលជំងឺគេងមិនលក់ ។
រូបមន្តក្នុងការព្យាបាលជំងឺដេកពុំលក់គឺ ៖ មែករបស់វាហាន់ជាចំណិតស្តើងៗ ហាលឲ្យស្ងួត រួចយកទៅដាំទឹកផឹក ចំណែកស្លឹកវាគេច្រើនយកទៅស្ងោជាមួយសាច់ រួចពិសារវានឹងជួយឲ្យអារម្មណ៍ស្ងប់កម្ចាត់ជាតិពុល ជួយព្យាបាលជំងឺរលាកពោះវៀន ក្រពះ ។ មែក និង ស្លឹក ក៏អាចយកមកបុកឲ្យម៉ត់បំពោកលើរបួស ព្យាបាលខ្ទុះ ។ ប្រើបរិមាណដើមពី ១០-១៥ ក្រាម/១ថ្ងៃ ដាំជាមួយទឹក រួចផឹក ។
ទន្ទឹមនោះការស្រាវជ្រាវក៏បង្ហាញពីប្រសិទ្ធភាពក្នុងការព្យាបាលជំងឺឈឺសន្លាក់រ៉ាំរ៉ៃ ។
របៀបធ្វើ ៖ យកដើមព្រះខ្លបមកហាន់ជាចំណិតស្តើងៗរួចហាលឲ្យស្ងួត ក្នុង១ថ្ងៃយកវា ១២០ ក្រាម មកលីង ក្រោយមកព្រួសស្រាពីលើឲ្យសើម រួចលីងសារឡើងវិញ បន្ទាប់មកយកទឹក ៦០០មីលីលីត្រ ដាំឲ្យពុះ រួចយកដើមព្រះខ្លបដែលលីងហើយមកដាក់ដាំនៅសល់ទឹកពី ២០០-៣០០ មីលីលីត្រ រួចរំលែកជា ៣ ចំណែក ផឹក ៣ដង ក្នុង១ថ្ងៃ ។
ធ្វើបែបនេះក្នុងរយៈពេល ៤-៥ ថ្ងៃ នឹងឃើញប្រសិទ្ធភាព ៕ លីសា
