ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់ដល់ម្ចាស់និងនាយករោងចក្រ សហគ្រាស គ្រឹះស្ថានការងារទាំងអស់ ដើម្បីបង្កលក្ខណៈងាយស្រួលដល់កម្មករនិយោជិត ក្នុងការចូលរួមបោះឆ្នោត ជ្រើសតាំងតំណាងរាស្រ្តនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ម្ចាស់រោងចក្រ សហគ្រាស គ្រឹះស្ថានការងារទាំងអស់ ត្រូវអនុញ្ញាតឱ្យបុគ្គលិក និងកម្មករ-កម្មការិនីរបស់ខ្លួន បានឈប់សម្រាករយៈពេល៣ថ្ងៃ ចាប់ពីថ្ងៃទី២៨-៣០ ខែកក្កដា ឆ្នាំ២០១៨ ដោយរក្សាទុកប្រាក់ឈ្នួល និងប្រាក់រង្វាន់ធ្វើការទៀងទាត់ជូនកម្មករនិយោជិតដដែល។
បើតាមសេចក្ដីជូនដំណឹងរបស់ក្រសួងការងារ នៅថ្ងៃទី១៣ ខែមិថុនានេះ បានឱ្យដឹងថា ការតម្រូវឱ្យនិយោជក ឬម្ចាស់រោងចក្រ សហគ្រាស គ្រឹះស្ថានការងារអនុវត្តបែបនេះ គឺដើម្បីជួយសម្រួលដល់ការចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅរយៈពេល១ថ្ងៃពេញ នាថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខ ។ ក្រសួងការងារ ក៏បង្គាប់ម្ចាស់ និងនាយករោងចក្រ សហគ្រាស គ្រឹះស្ថាបទាំងអស់ អនុវត្តតាមសេចក្តីជូនដំណឹងនេះ ឲ្យមានប្រសិទ្ធភាព។
សេចក្តីជូនដំណឹងរបស់ក្រសួងការងារនេះ បានធ្វើឡើងដោយយោងតាមលិខិតលេខ៩៦១គ.ជ.ប ចុះថ្ងៃទី១២ ខែមិថុនា ឆ្នាំ២០១៨ របស់គណៈកម្មាធិការជាតិរៀបចំការបោះឆ្នោត៕ ដោយ ៖ កូឡាប
