នៅថ្ងៃទី ១៤ មិថុនា មន្ត្រីជាន់ខ្ពស់អាមេរិកម្នាក់ ឲ្យដឹងថា បណ្តាសមយុទ្ធយោធារវាងអាមេរិក និងកូរ៉េខាងត្បូង នឹងត្រូវផ្អាកគ្មានការកំណត់ ។
មន្ត្រីរូបនេះ បានលើកឡើងការប្រកាសខាងលើ បន្ទាប់ពីប្រធានាធិបតីអាមេរិក ដូណាល់ ត្រាំ ថ្លែងក្នុងជំនួបជាមួយអ្នកសារព័ត៌មាននៅក្រោយសន្និសីទកំពូលអាមេរិក កូរ៉េខាងជើង នៅសិង្ហបុរី កាលពីថ្ងៃទី ១២ ខែមិថុនា ។ ដោយឡែកប្រធានាធិបតីកូរ៉េខាងត្បូង Moon Jae-in នៅថ្ងៃទី ១៤ ខែមិថុនា បានប្រកាសថា ក្រុងសេអ៊ូល អាចពិនិត្យដើម្បីផ្អាកជាបណ្តោះអាសន្ននូវសមយុទ្ធរួមជាមួយអាមេរិក សំដៅកសាងជំនឿទុកចិត្តគ្នា ក៏ដូចជាកាត់បន្ថយភាពតានតឹងជាមួយក្រុងព្យុងយ៉ាង ។ លោកសង្កត់ធ្ងន់ថា ប្រសិនបើកូរ៉េខាងជើង អនុវត្តការរំសាយនុយក្លេអ៊ែរនោះ កូរ៉េខាងត្បូង ក៏នឹងបន្តធ្វើការចរចាបន្ថយចំណងទាក់ទងតានតឹង មុននេះឲ្យកាន់តែធូរស្រាលថែមទៀត ហើយកូរ៉េខាងត្បូង មានជំនឿថា ទំនុកចិត្តរវាងប្រទេសទាំងពីរតាមរយៈសេចក្តីថ្លែងការណ៍រួម Pamunjom នឹងត្រូវបានគោរព ។
ប្រធានាធិបតីកូរ៉េខាងត្បូងក៏បានបញ្ជាទៅកាន់សមាជិក NSC ដែលរួមមានរដ្ឋមន្ត្រីការពារជាតិ និងប្រមុខការទូតឲ្យសហការជិតស្និទ្ធជាមួយភាគីអាមេរិក ក្នុងបញ្ហាផ្អាកសមយុទ្ធនេះ ។
គួររំលឹកថា កូរ៉េខាងត្បូង អាមេរិក មានពលទាហាន ២៨.៥០០នាក់ នៅកូរ៉េខាងត្បូង ហើយជាប្រចាំពួកគេធ្វើសមយុទ្ធទ្រង់ទ្រាយតូចធំជាមួយកងទ័ពកូរ៉េខាងត្បូង ហើយនេះជាមូលហេតុដែលកូរ៉េខាងជើងមុននោះចោទប្រកាន់ថា ជាការគំរាមកំហែងចំពោះសន្តិសុខខ្លួន ៕ ចន្ទ្រា
