តំណាងរាស្ត្ររុស្ស៊ី Pletnyova បានទូន្មានតាមវិទ្យុដល់ស្ត្រីរុស្ស៊ីទាំងឡាយថា ពុំត្រូវទាក់ទងជាមួយជនបរទេសក្នុងអំឡុងពេលប្រព្រឹត្តទៅនៃ World Cup ២០១៨ នេះ ។ ស្ត្រីតំណាងរាស្ត្ររូបនេះលើកឡើងថា ៖ “នឹងមានក្មេងស្រីរុស្ស៊ីជាច្រើន ដែលដាច់យប់ជាមួយភ្ញៀវបរទេស ហើយនឹងមានគភ៌ ។ ក្មេងទាំងនោះនឹងរងស្នាមរបួសផ្លូវចិត្ត ដោយសារត្រូវបោះបង់ចោល ខណៈពេលដែលម្តាយពួកវាក្លាយទៅជាស្ត្រីមេម៉ាយ ។
អ្នកស្រី Pletnyova តំណាងរាស្ត្ររុស្ស៊ីថា មិនគួរទាក់ទងជាមួយភ្ញៀវបរទេសឡើយ ។
ប៉ុន្តែប្រធានគណៈកម្មាធិការកីឡាទេសចរណ៍ និងយុវជននៃរដ្ឋសភារុស្ស៊ី Mikhail Degtyarev បានទាត់ចោលទស្សនៈខាងលើ ហើយបានថ្លែងថា ៖ គួរតែមានឲ្យបានច្រើននូវរឿងស្នេហា រដូវ World Cup ពោលគឺគួរតែមានយុវជនប្រុសស្រីដែលគួរតែពេញចិត្តពេញថ្លើមគ្នាក្នុងរដូវកាលនេះ ។
លោកសង្កត់ធ្ងន់ថា ក្មេងដែលកើតឡើងទាំងនោះថ្ងៃក្រោយ វានឹងដឹងថា ខ្លួនឯងវាគឺជាលទ្ធផលនៃចំណងស្នេហាចាប់ផ្តើមពី World Cup ២០១៨ ។ កុំឃាត់វាអី ! ចូរទុកឲ្យ World Cup សាងឡើងនូវរឿងស្នេហាគូស្វាមីភរិយាឆ្លងដែន… ៕ សូយន
