ភ្នំពេញ៖ ក្រសួងទេសចរណ៍នៃព្រះរាជាណាចក្រកម្ពុជា សហការជាមួយស្ថានទូតសាធារណរដ្ឋឥណ្ឌាប្រចាំនៅព្រះរាជាណាចក្រកម្ពុជា និងស្ថាប័នពាក់ព័ន្ធនឹងរៀបចំ “ទិវាយោគៈអន្តរជាតិ” លើកទី៤ នៅរាជធានីភ្នំពេញ ខេត្តព្រះសីហនុ ខេត្តសៀមរាប និងខេត្តបាត់ដំបង។
ដោយបានទទួលការអនុញ្ញាតជាគោលការណ៍ពីរាជរដ្ឋាភិបាល ក្រសួងទេសចរណ៍នៃព្រះរាជាណាចក្រកម្ពុជា សហការជាមួយស្ថានទូតសាធារណរដ្ឋឥណ្ឌា ប្រចាំនៅព្រះរាជាណាចក្រកម្ពុជា និងស្ថាប័នពាក់ព័ន្ធនឹងរៀបចំ “ទិវាយោគៈអន្តរជាតិ” លើកទី៤ (4th International Day of Yoga) ដែលគ្រោងធ្វើឡើងនៅថ្ងៃទី១៦ និងថ្ងៃទី១៧ ខែមិថុនា ឆ្នាំ២០១៨ នៅទីតាំងចំនួន ៤ដូចខាងក្រោម៖ ១.រាជធានីភ្នំពេញ ថ្ងៃទី១៦ ខែមិថុនា ឆ្នាំ២០១៨ វេលាម៉ោង០៧ :០០នាទីព្រឹក នាបរិវេណ ពហុកីឡដ្ឋាន ជាតិអូឡាំពិក ។ ២.ខេត្ត ព្រះសីហនុ ថ្ងៃទី១៦ ខែមិថុនា ឆ្នាំ២០១៨ វេលាម៉ោង០៧ :០០នាទី នាបរិវេណមុខឆ្នេរសុខា ៣.ខេត្តសៀមរាប ថ្ងៃទី១៧ មិថុនា ឆ្នាំ២០១៨ វេលាម៉ោង០៧:០០នាទីព្រឹក នាបរិវេណមុខប្រាសាទអង្គរវត្ត ៤.ខេត្តបាត់ដំបង ទី១៧ មិថុនា ឆ្នាំ២០១៨ វេលាម៉ោង ០៧ :០០នាទីព្រឹក នាបរិវេណមុខសាលាខេត្ត ។
ទិវាយោគៈអន្តរជាតិធ្វើឡើងក្នុងគោលបំណងដើម្បីផ្សព្វផ្សាយពីការធ្វើលំហាត់ប្រាណសមាធិទាំងផ្លូវកាយ ផ្លូវចិត្ត និងសម្រួលចលនាសាច់ដុំ ចលនាសរសៃឈាមឲ្យស្រួលសម្រាប់សុខភាពរាងកាយរបស់យើងទាំងអស់គ្នា។
ដោយយល់ឃើញថា ទិវានេះមានសារប្រយោជន៍សម្រាប់យើងទាំងអស់គ្នា ក្រសួងទេសចរណ៍សូម អញ្ជើញភ្ញៀវទេសចរជាតិនិងអន្តរជាតិ ចូលរួមធ្វើលំហាត់កាយសុខភាពក្នុងព្រឹត្តិការណ៍ខាងលើឲ្យបានកុះករ និងដោយសេរី។
របៀបហាត់ប្រាណបែបសមាធិ ដែលហៅថា យោគៈ (YOGA) មានប្រភពដើមមកពីឥណ្ឌា ហើយត្រូវបានផ្សព្វផ្សាយទូទាំងពិភពលោក។ យោគៈ បានទាក់ទាញការចូលរួមពីមនុស្សម្នាជាច្រើន ដោយហេតុថា វាជាវិធីមួយដែលអាចជួយសម្រួលស្មារតី គ្រប់គ្រងអារម្មណ៍ និងនាំមកនូវសុខភាពទៀតផង។
តាមសេចក្តីអធិប្បាយរបស់គ្រូបង្ហាត់យោគៈជនជាតិឥណ្ឌាបញ្ជាក់ថា យោគៈ គឺជាការអនុវត្ត កាយ វិញ្ញាណ បែបបុរាណដែលជាប់ពាក់ព័ន្ធទៅនឹងការធ្វើសមាធិ និងការផ្តោតទៅលើចលនានៃការដកដង្ហើមចេញនិងចូល ដែលមានដើមកំណើតនៅក្នុងប្រទេសឥណ្ឌាហើយ ការអនុវត្តលំហាត់ប្រាណបែបនេះមានអាយុកាលរាប់ពាន់ឆ្នាំមកហើយ។
មន្ត្រីទំនាក់ទំនងនៃស្ថានទូតឥណ្ឌាប្រចាំកម្ពុជា លោក SUDHIR GOSWAMI បញ្ជាក់ថា តាមពិតទៅទិវាយោគៈអន្តរជាតិ ត្រូវបានកំណត់ជាផ្លូវការគឺនៅថ្ងៃទី២១ ខែមិថុនា រៀងរាល់ឆ្នាំ តែដោយសារឆ្នាំនេះពេលវេលាមិនអំណោយផល ទើបទិវាយោគៈអន្តរជាតិនៅលើទឹកអង្គរសៀមរាប ត្រូវរៀបចំឡើងនៅថ្ងៃទី១៨ ខែមិថុនាវិញ។
តាមការស្រាវជ្រាវពីអ្នកជំនាញបុរាណវិទ្យានៃអាជ្ញាធរជាតិអប្សរាបានបង្ហាញថា យោគៈ និងប្រាសាទអង្គរមានទំនាក់ទំនងគ្នាច្បាស់លាស់ ដូចជារូបចម្លាក់នៅប្រាសាទបន្ទាយស្រី និងតាមរយៈសិលាចារឹកនិយាយថានៅសតវត្សទី១០ មានព្រះរាជគ្រូបានដឹកនាំធ្វើយោគៈនៅតំបន់អង្គរផងដែរ។ មិនតែប៉ុណ្ណោះ ក្រៅពីនាំមកនូវសុខភាពផ្លូវកាយផ្លូវចិត្ត របៀបហាត់ប្រាណបែបយោគៈ ដែលប្រារព្ធឡើងនៅលើទឹកដីអង្គរសៀមរាបនេះគឺជាផ្នែកមួយដែលជួយទាក់ទាញភ្ញៀវទេសចរណ៍អន្តរជាតិមកកាន់កម្ពុជាជាបន្តទៀត៕ ដោយ៖បញ្ញាស័ក្តិ
