កំពង់ស្ពឺ ៖ ករណីតខ្សែភ្លើងយកទៅឆក់ត្រី បែរជាឆក់ខ្លួនឯង បណ្ដាលឲ្យស្លាប់បាត់បង់ជីវិត ចោលប្រពន្ធកូន ថ្ងៃសុក្រ ទី១៥ ខែ មិថុនា ឆ្នាំ ២០១៨ វេលាម៉ោង ៣:១០នាទីទៀបភ្លឺ នៅភូមិព្រៃផ្ដៅ ឃុំត្រពាំងគង ស្រុកសំរោងទង។
ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា បុរសម្នាក់ឈ្មោះ ឌួង វណ្ណី ភេទប្រុស អាយុ ៣៤ឆ្នាំ និងឈ្មោះ គង់ ប៊ុនធឿន ភេទប្រុស អាយុ ២៥ឆ្នាំ រស់នៅភូមិព្រៃផ្ដៅ ឃុំត្រពាំងគង ស្រុកសំរោងទង បាននាំគ្នាតខ្សែភ្លើងចេញពីផ្ទះខ្លួនឯង ចម្ងាយ ៣០ម៉ែត្រ យកទៅឆក់ត្រីនៅត្រពាំងខាងជើងភូមិ ចៃដន្យដើរជាន់ខ្សែតំណ បណ្ដាលឲ្យឆក់ឈ្មោះ ឌួង វណ្ណី ស្លាប់នៅនឹងកន្លែងកើតហេតុ ចំណែកឈ្មោះ គង់ ប៊ុនធឿន រងរបួសធ្ងន់ បញ្ជូនយកទៅព្យាបាលនៅមន្ទីរពេទ្យខេត្ដ។ ចំពោះសាកសពជនរងគ្រោះខាងលើ ក្រុមគ្រួសារបានទទួលស្គាល់ ពិតជាករណីឆក់ខ្សែភ្លើង មកពីការឆក់ត្រី ហើយបណ្ដាលឲ្យឆក់ស្លាប់ពិតប្រាកដមែន។
នគរបាលខេត្តកំពង់ស្ពឺ បានសំណូមពរ សមត្ថកិច្ច អាជ្ញាធរ សូមអង្វរដល់បងប្អូន ប្រជាពលរដ្ឋទាំងអស់ សូមមេត្ដាបញ្ឈប់សកម្មភាពឆក់ត្រីបែបនេះទៅ ទោះបីរូបភាពណាក៏ដោយ ឆក់ដោយឧបករណ៍អាគុយ ខ្សែភ្លើង ឬឧបករណ៍រំសេវបោកត្រី ថ្មស្អុយ ព្រោះនេះជាបទល្មើសដែលអាចផ្ដន្ទាទោស និងឈានដល់ការបង់អាយុជីវិតបាន ជាក់ស្ដែងដូចករណីខាងលើនេះស្រាប់៕ ដោយ៖បញ្ញាស័ក្តិ
