កំពូលតារាអ្នកលេងអុកជនជាតិឥណ្ឌា បានសម្រេចចិត្តដកខ្លួនចេញពីការប្រកួតជើងឯកអន្តរជាតិ ដែលនឹងប្រព្រឹត្តទៅនៅក្នុងប្រទេសអ៊ីរ៉ង់ ដើម្បីតវ៉ាប្រឆាំងនឹងការពាក់កន្សែងអ៊ិស្លាម ។
អតីតម្ចាស់ជើងឯកផ្នែកនារី នាង Soumya Swaminathan បានធ្វើការថ្កោលទោសចំពោះច្បាប់ស្លៀកពាក់ នៅក្នុងព្រឹត្តិការណ៍ប្រកួតលេងអុក «Asian Nations Chess Cup» ដែលជាការរំលោភលើសិទ្ធមនុស្សរបស់នាង ។
ជើងអុកដ៏ចំណានវ័យ ២៩ ឆ្នាំ រូបនេះបានធ្វើសេចក្តីប្រកាសមួយនេះ តាមរយៈហ្វេសប៊ុក កាលពីថ្ងៃសៅរ៍ ។
នាង Swaminathan បានសរសេរថា៖ «ខ្ញុំបានរកឃើញច្បាប់ពាក់កន្សែងអ៊ិស្លាមដ៏កំហិតរបស់អ៊ីរ៉ង់នេះ ដែលជាការរំលោភលើសិទ្ធិមនុស្សជាមូលដ្ឋាន ដែលក្នុងនោះរួមទាំងសិទ្ធិសេរីភាពក្នុងការបញ្ចេញមតិ និងសិទ្ធិសេរីភាពក្នុងការគិត, ការយល់ដឹង និងសាសនា» ។ នាងបន្តថា៖ «វាហាក់ដូចជាស្ថិតក្រោមកាលៈទេសៈបច្ចុប្បន្នពេកហើយ ហេតុនេះ វាគ្រាន់តែជាវិធីតែមួយគត់ សម្រាប់ខ្ញុំការពារសិទ្ធិរបស់ខ្ញុំមិនទៅអ៊ីរ៉ង់» ។
អ៊ីរ៉ង់បានតម្រូវឲ្យស្ត្រីពាក់ «កន្សែងគ្របក្បាល» នៅទីកន្លែងសាធារណៈ ចាប់តាំងពីបដិវត្តអ៊ិស្លាមឆ្នាំ ១៩៧៩ មកម្លេះ ។ ចាប់តាំងពីពេលនោះមក ស្ត្រីត្រូវបានអនុវញ្ញាតបង្ហាញត្រឹមមុខ, ដៃ និងជើង នៅទីកន្លែងសាធារណៈ ស្ថិតក្រោមច្បាប់អ៊ីរ៉ង់ ។ ពួកគេក៏ត្រូវបានអនុញ្ញាតឲ្យស្លៀកពាក់ជាមួយសម្លៀកបំពាក់ពណ៌តិចតួចប៉ុណ្ណោះ ។
គោលការណ៍បែបនេះ បានអនុវត្តតាមរយៈព្រឹត្តិការណ៍ Asian Nations Chess Cup ក៏នាំឲ្យកើតជាបញ្ហាស្រដៀងគ្នានេះ ពាក់ព័ន្ធដល់អ្នកលេងអុកអន្តរជាតិជាច្រើនរូប នៅអតីតកាលផងដែរ ។
នៅក្នុងឆ្នាំ២០១៦ ជើងឯកអុកអាមេរិកឈ្មោះ Nazi Paikidze-Barnes ក៏បានបដិសេធពាក់កន្សែងក្បាលនេះផងដែរ ដែលធ្វើឲ្យនាងធ្វើពហិការមិនចូលរួមប្រកួតព្រឹត្តិការណ៍ជើងឯកនៅក្នុងទីក្រុងតេអេរ៉ង់ ។
ទន្ទឹមនោះផងដែរ ស្តេចអុកអ៊ីរ៉ង់ឈ្មោះ Dorsa Derakhshani ក៏ត្រូវបានហាមឃាត់ដោយសហព័ន្ធអុកអ៊ីរ៉ង់ នៅឆ្នាំ២០១៧ បន្ទាប់ពីចូលរួមការប្រកួតប្រជែងអន្តរជាតិនៅបរទេស ដោយមិនពាក់កន្សែងក្បាល ។
ការសម្រេចចិត្តរបស់ Swaminathan សុខចិត្តបោះបង់ការប្រកួតដ៏សំខាន់មួយនេះ ត្រូវបានធ្វើឡើងជាមួយនឹងការសរសើរជាសកលលើបណ្តាញសង្គម ៕ ឧត្តម
