នេះគឺជាគ្រោះថ្នាក់ចរាចរណ៍ដ៏មហារន្ធត់មួយ ដែលគ្រួសារមួយមានគ្នា៤នាក់ ក្នុងនោះមានកូនតូចៗ២នាក់ បានត្រូវភ្លើងឆាបឆេះគួរឲ្យអាសូរ បន្ទាប់ពីរថយន្តរបស់ពួកគេម៉ាក Toyota Vios ពណ៌ខ្មៅ បានបុកគ្នាជាមួយរថយន្ត១គ្រឿងទៀត (រត់គេចខ្លួន) បណ្តាលឲ្យក្រឡាប់ និងភ្លើងឆាបឆេះយ៉ាងសន្ធោសន្ធៅ ។
យោងតាមប្រភពព័ត៌មានបានឲ្យដឹងថា ហេតុការណ៍គ្រោះចរាចរណ៍ដ៏រន្ធត់នេះ បានកើតឡើងនៅផ្លូវ Mittraphap ខេត្ត Nakhon Rachasima ប្រទេសថៃ ។
អ្នកលេងហ្វេសប៊ុកឈ្មោះ Udomdej Pracharchachai ដែលអាចកត់ត្រាហេតុការណ៍នេះទាំងស្រុង បាននិយាយថា ពលរដ្ឋដែលមានមានសន្តានចិត្តល្អ បានចេញមកជួយទាញជនរងគ្រោះទាំងឪពុកម្តាយនិងកូនតូចៗ ចេញពីក្នុងរថយន្តរបស់ពួកគេ ទាំងប្រថុយជីវិតបំផុត ខណៈរថយន្តកំពុងត្រូវភ្លើងឆាបឆេះយ៉ាងខ្លាំង ។
រូបភាពដ៏រន្ធត់មួយ បានបង្ហាញឲ្យឃើញស្ត្រីជាប្រពន្ធ ត្រូវភ្លើងឆាបឆេះគួរឲ្យអាសូរបំផុត នៅលើដងផ្លូវ ខណៈក្រុមជួយសង្គ្រោះទាញនាងចេញ ។
សាច់ញាតិជនរងគ្រោះបានឲ្យដឹងថា ប្តីប្រពន្ធនេះ បានបើករថយន្ត Toyota Vios ដឹកកូនតូចៗរបស់ពួកគេដែលមានអាយុ ១ ឆ្នាំ និង២ឆ្នាំ ទៅពិនិត្យសុខភាពនៅមន្ទីរពេទ្យ Maharaj ក្នុងខេត្ត Nakhorn Rachasima ។ ប៉ុន្តែ នៅពេលវិលត្រលប់មកផ្ទះវិញ ពួកគេក៏ជួបគ្រោះថ្នាក់ចរាចរណ៍បុកគ្នាជាមួយរថយន្ត១គ្រឿងទៀត ដែលបានបើករថយន្តគេចខ្លួន បណ្តាលឲ្យរថយន្តរបស់ពួកគេត្រូវក្រឡាប់ផ្ទុះឆេះយ៉ាងសាហាវបែបនេះ ៕ ឧត្តម