ពិតជាករណីដ៏កម្រ ហើយវាបានសាងភាពរំជួលចិត្តដល់ពលរដ្ឋចិន ខណៈពេលដែលខ្សែវីដេអូ បានថតជាប់ទិដ្ឋភាពដែលវេជ្ជបណ្ឌិតរូបនេះទន់ជើងដួល ក្រោយពីធ្វើការវះកាត់ជាបន្តបន្ទាប់ ៤លើក និងក្នុងពេលដែលនាងកំពុងមានគភ៌ ៥ ខែទៅហើយ។
ស្ត្រីវេជ្ជបណ្ឌិត Yi Xianyou ត្រូវបានពលរដ្ឋស្ងើចសរសើរយ៉ាងខ្លាំងពេលឃើញនាងជួយសង្គ្រោះអ្នកជំងឺដោយពុំអើពើនឹងសុខភាពរបស់ខ្លួន តួអង្គដ៏ល្បីល្បាញក្នុងសង្គមចិនពេលនេះគឺវេជ្ជបណ្ឌិត Yi Xianyou ធ្វើការនៅមន្ទីរពេទ្យមួយនាខេត្តគីណាន ។
ទោះបីនាងមានគភ៌នៅខែទី ៥ ក្តី តែវេជ្ជបណ្ឌិតរូបនេះ ពុំបានអើពើចំពោះបញ្ហាផ្ទាល់ខ្លួនទេ នាងបានធ្វើការវះកាត់ឲ្យអ្នកជំងឺ ៤នាក់ តាំងពីម៉ោង ៩ព្រឹក ដល់ម៉ោង ៤ល្ងាច ដោយពុំបានសម្រាកសោះឡើយ ។
រូបភាពមួយចំនួនដែលកាមេរ៉ាថតបានឃើញវេជ្ជបណ្ឌិតរូបនេះ អង្គុយផ្អែកជញ្ជាំងដកដង្ហើមវែងៗ ដើម្បីត្រៀមខ្លួនបន្តការវះកាត់ទៀត។
គិលានុប្បដ្ឋាយិកានិយាយប្រាប់ថា Xiong Chunbo ក្នុងអំឡុងពេលវះកាត់ ៤លើកនេះ គាត់បានត្រឹមតែលាងសំអាតដៃ លុបមុខ រួចបន្តពាក់ស្រោមដៃធ្វើការទៀត ។ ដោយមានគភ៌ផងនោះ ក្រោយការវះកាត់លើកទី ៤ នាងពុំអាចឈរនឹងបានទៀត ពួកខ្ញុំគឺជាអ្នកគ្រានាងឲ្យអង្គុយចុះដើម្បីសម្រួលដង្ហើម ។
ប្រធានក្រុមគិលានុប្បដ្ឋាយិកា Lin Wei បកស្រាយបន្ថែមថា “ជាវេជ្ជបណ្ឌិតវះកាត់ អ្នកមិនអាចញ័រដៃសូម្បីតែបន្តិច ពិសេសប្រសិនបើអ្នកកំពុងធ្វើការវះកាត់ដោយចោះបំពង់។ វេជ្ជបណ្ឌិត Xianyou ច្រើនវះកាត់ ៣-៤លើក ក្នុង១ថ្ងៃៗ ហើយជាមធ្យមពី ៨០-១០០ លើក/១ខែ” ។ ចំណែកវេជ្ជបណ្ឌិត Xianyou វិញហាក់ដូចជាមិនចាប់អារម្មណ៍នឹងពាក្យស្ងើចសរសើរនោះទេ ហើយនាងប្រាប់ថា “វេជ្ជបណ្ឌិតត្រូវមានការទទួលខុសត្រូវចំពោះអ្នកជំងឺ ។ នៅពេលវះកាត់អ្នកជំងឺចុងក្រោយរបស់ខ្ញុំ ខ្ញុំគ្រាន់តែអង្គុយចុះសម្រួលដង្ហើមមួយសន្ទុះ វានឹងធម្មតាវិញហើយ គ្មានអ្វីចម្លែកនោះទេ” ៕ លីសា