ខេត្តព្រះសីហនុ ៖ មន្ត្រីរាជការ ភ្ញៀវទេសចរ និងប្រជាពលរដ្ឋរស់នៅខេត្តព្រះសីហនុ បានឲ្យដឹងថា សំណង់ការដ្ឋានសង់សណ្ឋាគារលំដាប់ផ្កាយ មានទីតាំងនៅឆ្នេរអូរឈើទាល ទល់មុខវិមានលំហែ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលពលរដ្ឋគិតថា ត្រូវបានសម្តេចតេជោ បញ្ជាឲ្យអាជ្ញាធររដ្ឋបាលក្រុង-ខេត្តព្រះសីហនុ ចុះបិទ និងវាយកំទេចរបងហ៊ុមព័ទ្ធចោលកាលពីពេលថ្មីៗនេះ បច្ចុប្បន្នឃើញការរដ្ឋានសំណង់មួយនេះ ត្រូវបានគេហ៊ុមព័ទ្ធរបងបាំងជុំជិតជាថ្មីឡើងវិញ។
បញ្ហានេះ ទាំងភ្ញៀវទេសចរ មន្ត្រីរាជការថ្នាក់ទាប ពិសេសប្រជាពលរដ្ឋរស់នៅខេត្តព្រះសីហនុ មានចម្ងល់ថា ហេតុអ្វីបានជាការដ្ឋានសំណង់លំដាប់ផ្កាយ និងរបងហ៊ុមព័ទ្ធ មានទីតាំងនៅឆ្នេរអូរឈើទាលដែលអាច សម្តេច ហ៊ុន សែន បញ្ជាឲ្យរដ្ឋបាលក្រុងចុះបិទ និងរុះរើរបងហ៊ុមព័ទ្ធចោល កាលពីដើមខែមីនា ឆ្នាំ២០១៨ ប៉ុន្តែពេលនេះឃើញមានរបងដែកហ៊ុមព័ទ្ធបិទជិតបរិវេណការដ្ឋានសំណង់លំដាប់ផ្កាយនោះជាថ្មីឡើងវិញហើយ។
ទាក់ទិនបញ្ហានេះ កាលពីថ្ងៃទី២ ខែមីនា ឆ្នាំ២០១៨ អភិបាលក្រុងព្រះសីហនុ បានចេញលិខិតបិទការដ្ឋានសំណង់មួយកន្លែង ដោយលើកហេតុផលថា បានសង់អត់ច្បាប់អនុញ្ញាត មានទីតាំងនៅឆ្នេរអូរឈើទាល មានទីតាំងនៅខាងមុខផ្លូវម្ខាង នៃគេហដ្ឋានលំហែកាយ របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លិខិតចុះថ្ងៃទី២ ខែមីនា ឆ្នាំ២០១៨ មានចុះហត្ថលេខា និងបោះត្រា លោក អ៊ី សុខឡេង អភិបាលក្រុងព្រះសីហនុ បានជម្រាបជូន លោក លី ឡាយ ជាម្ចាស់ការដ្ឋានសំណង់នៅផ្លូវអូរឈើទាល ស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ ដែលកំពុងដាក់គ្រឿងចក្រគ្រោងសាងសង់សំណង់ ដោយពុំមានច្បាប់អនុញ្ញាតសាងសង់ ពីក្រសួងរៀបចំដែនដី នគររូបនីយកម្ម និងសំណង់ និងស្ថាប័នពាក់ព័ន្ធទេ។ ដូច្នេះរដ្ឋបាលក្រុងព្រះសីហនុ សូមបិទការដ្ឋានគម្រោងសាងសង់សំណង់គ្រប់ប្រភេទ របស់លោក លី ឡាយ ចាប់ពីថ្ងៃទី២ ខែមីនា ឆ្នាំ ២០១៨តទៅ ហើយម្ចាស់សំណង់ខាងលើ ត្រូវអនុវត្តតាមលក្ខខណ្ឌដូចខាងក្រោម៖
១- ត្រូវបញ្ឈប់គម្រោងការសាងសង់សំណង់គ្រប់ប្រភេទជាបន្ទាប់។
២- ត្រូវរុះរើរបងព័ទ្ធការដ្ឋានលើដីចំណីឆ្នេរ និងលើដីចិញ្ចើមផ្លូវសាធារណៈចេញ។
៣- ត្រូវដឹកគ្រឿងចក្រ និងសម្ភារៈផ្សេងៗ ដែលផ្គត់ផ្គង់ដល់ការសាងសង់ចេញពីការដ្ឋាន។
បន្ថែមលើនេះ រដ្ឋបាលក្រុងបានព្រមានក្នុងលិខិតថា ក្នុងករណីលោក លី ឡាយ មិនព្រមអនុវត្តតាមខ្លឹមសារលិខិតខាងលើនេះទេ រដ្ឋបាលក្រុងព្រះសីហនុ នឹងចុះរឹបអូស និងដកហូតគ្រឿងចក្រ និងសម្ភារៈផ្សេងៗ ដែលផ្គត់ផ្គង់ដល់ការសាងសង់សំណង់ យកមករក្សាទុកនៅសាលាក្រុង ដោយមិនទទួលខុសត្រូវ នូវការខូចខាត និងបាត់បង់ព្រទ្យសម្បត្តិរបស់លោកឡើយ។
បន្ទាប់ពីបានចេញលិខិតផ្អាកការដ្ឋានសំណង់លំដាប់ផ្កាយខាងលើ គេសង្កេតឃើញថា ចាប់ពីព្រលឹមថ្ងៃសៅរ៍ ទី៣ ខែមីនា ឆ្នាំ២០១៨ ឃើញមានសកម្មភាពរុះរើការដ្ឋានសំណង់ខាងលើយ៉ាងឆាប់រហ័យ ដោយមានវត្ត លោក អ៊ី សុខឡង អភិបាលក្រុងព្រះសីហនុ និងមន្ត្រីស្ថាប័នពាក់ព័ន្ធនៃរដ្ឋបាលខេត្តនេះជាច្រើនទៀត បានចូលរួមពិនិត្យមើលលើការរុះរើសំណង់ទាំងនោះ។
ករណីនេះ ប្រភពមួយចំនួនឲ្យដឹងថា ការឈានដល់រដ្ឋបាលក្រុងព្រះសីហនុ ចេញលិខិតភ្លាមៗបិទការដ្ឋានសំណង់លំដាប់ផ្កាយ ដែលមានអ្នកវិនិយោគជាជនជាតិចិនខាងលើនេះ គឺកន្លងមកដីទីតាំងនេះ ជាកម្មសិទ្ធិ របស់ លោកឧកញ៉ា គិត ម៉េង។
ការបិទការដ្ឋានសំណង់នេះ គឺបានកើតឡើងក្រោយពេល សម្តេចតេជោ ហ៊ុន សែន កាលពីល្ងាចថ្ងៃទី២ ខែមីនា ឆ្នាំ២០១៨ បានធ្វើដំណើរលំហែនៅតាមឆ្នេរអូរឈើទាល ហើយទំនងជាឃើញសំណង់កំពុងសាងសង់នៅជាប់ឆ្នេរសមុទ្រ ឆ្នេរអូរឈើទាលនេះ កំពុងសាងសង់នៅលើដីចំណីឆ្នេរសមុទ្រ និងប៉ះពាល់ដល់បរិស្ថានឆ្នេរ ទើបឈានដល់អាជ្ញាធរចេញលិខិតបិទការដ្ឋានសំណង់មួយនេះភ្លាមៗ។
ប្រភពឲ្យដឹងទៀតថា ការចេញលិខិតបិទការដ្ឋានសំណង់ របស់លោក លី ឡាយ ខាងលើទំនងជាត្រូវ សម្តេច នាយករដ្ឋមន្ត្រី ហ៊ុន សែន បានដាក់បទបញ្ជាក្តៅទៅរដ្ឋបាលក្រុងព្រះសីហនុ ឲ្យបិទការដ្ឋានសំណង់សណ្ឋាគារលំដាប់ផ្កាយប្រាំមួយនេះជាបន្ទាន់ហើយមើលទៅ ទើបបានជារដ្ឋបាលក្រុងព្រះសីហនុ ចេញលិខិតជាបន្ទាន់មួយ បញ្ឈប់សកម្មភាពការដ្ឋានសំណង់ ដែលមានម្ចាស់ឈ្មោះ លី ឡាយ មានភាពតក់ក្រហល់បំផុត ដោយសំអាងថា ការដ្ឋានសំណង់ខាងលើ សង់គ្មានច្បាប់អនុញ្ញាតពីក្រសួងស្ថាប័នពាក់ព័ន្ធ។
កាលណោះ ទាំងអ្នកឃ្លាំមើលសង្គម ភ្ញៀវទេសចរជាតិ មន្ត្រីរាជការ និងប្រជាពលរដ្ឋ ខេត្តព្រះសីហនុ បានស្វាគមន៍រដ្ឋបាលក្រុងព្រះសីហនុ ចំពោះការបិទការដ្ឋានសំណង់សណ្ឋាគារលំដាប់ផ្កាយប្រាំ ដែលសង់នៅលើដីចំណីឆ្នេរសមុទ្រឆ្នេរអូរឈើទាល និងសង់គ្មានច្បាប់អនុញ្ញាតនាមូលដ្ឋានខេត្តព្រះសីហនុ។
បន្ថែមលើនេះកាលណោះ ពួកគេក៏បានសំណូមពរដល់ សម្តេច ហ៊ុន សែន ឲ្យជួយបិទការដ្ឋានសកម្មភាពសង់សំណង់សណ្ឋាគារធំៗជាច្រើនទៀត ដែលសង់សង់រំលោភដីចំណីឆ្នេរសមុទ្រ និងប៉ះពាល់ដល់បរិស្ថានឆ្នេរសមុទ្រធ្ងន់ធ្ងរ នាំឲ្យបាត់បង់ ឬរួមតូចឆ្នេរសាធារណៈ សម្រាប់ផ្តល់ជូនភ្ញៀវទេសចរជាតិ-អន្តរជាតិ ពិសេសប្រជាពលរដ្ឋខ្មែរចូលទៅលំហែតាមឆ្នេរសមុទ្រនាថ្ងៃអនាគត។
ជាងនេះទៀត ទាំងភ្ញៀវទេសចរ មន្ត្រីរាជការ ពិសេសប្រជាពលរដ្ឋរស់នៅខេត្តព្រះសីហនុ ថែមទាំងបានសំណូមពរស្នើដល់ សម្តេចប្រមុខដឹកនាំរាជរដ្ឋាភិបាល ឲ្យយកទីធ្លាបរិវេណដីការដ្ឋានសំណង់លំដាប់ផ្កាយ មានទីតាំងនៅអតីតទីបញ្ជាការដ្ឋានកងរាជអាវុធហត្ថខេត្តព្រះសីហនុ នៅឆ្នេរអូរឈើទាលខាងលើនេះ ដើម្បីអភិវឌ្ឍទៅជាសួនច្បារសាធារណៈ ទុកជូនភ្ញៀវទេសចរជាតិ-អន្តរជាតិចូលទៅកម្សាន្តនាថ្ងៃអនាគតជំនួសវិញ។
យ៉ាងនេះក្តី បច្ចុប្បន្ននេះទាំងភ្ញៀវទេសចរ មន្ត្រីរាជការថ្នាក់ទាប និងពលរដ្ឋរស់នៅខេត្តព្រះសីហនុ មានចម្ងល់ថា ហេតុអ្វីបានជាការដ្ឋានសំណង់លំដាប់ផ្កាយ មានទីតាំងនៅឆ្នេរអូរឈើទាល ទល់មុខវិមានលំហែកាយ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលរដ្ឋបាលក្រុងព្រះសីហនុ ចេញលិខិតបិទការសាងសង់និងបញ្ជាឲ្យរុះរើរបងបាំងព័ទ្ធជុំវិញឲ្យអស់ កាលពីថ្ងៃទី២ ខែមីនា ឆ្នាំ២០១៨ ប៉ុន្តែពេលនេះ ត្រូវបានគេហ៊ុមព័ទ្ធរបងដែករឹងមាំនៅជុំវិញបរិវេណការដ្ឋានសំណង់លំដាប់ផ្កាយនោះជាថ្មីឡើងវិញបែបនេះទេ៕ ដែន សីមា