យោងតាមរបាយការណ៍បានឲ្យដឹងថា តារាម៉ូដែលមានប្រជាប្រិយភាពម្នាក់របស់អៀរឡង់ កំពុងត្រូវបានស៊ើបអង្កេតដោយប៉ូលីស ទាក់ទងនឹងករណីប្រូម៉ូតផ្សព្វផ្សាយអំពីបណ្តាគេហទំព័រភ្នាល់ល្បែងជាច្រើន ។
នាង Jessie Vard វ័យ ១៩ ឆ្នាំ ត្រូវបានគេនិយាយថាស្ថិតក្នុងចំណោមតារាម៉ូដែលយ៉ាងតិច ១៥ នាក់ ដែលត្រូវបានដាក់ចូលក្នុងបញ្ជីឈ្មោះដីការឃាត់ខ្លួន នៅក្នុងប្រទេសថៃ កាលពីដើមសប្តាហ៍នេះ ។
ស្រីស្អាតរូបនេះនឹងត្រូវបង្ហាញខ្លួននៅក្នុងតុលាការ ពីបទចោទប្រកាន់ផ្សព្វផ្សាយអំពីគេហទំព័រភ្នាល់ល្បែងមួយចំនួន ខណៈពេលដែលអាជ្ញាធរថៃកំពុងទទួចពលរដ្ឋរបស់ខ្លួន ឲ្យចៀសចាកឆ្ងាយពីរាល់សកម្មភាពចាក់ភ្នាល់ល្បែង មុនការប្រកួត World Cup 2018 នៅក្នុងប្រទេសរុស្ស៊ី ។
របាយការណ៍បានបញ្ជាក់ថា តារាម៉ូដែលទាំងនោះអាចរកប្រាក់បានរហូត ១០,០០០ ផោន (ជាង១ម៉ឺនដុល្លារ) ក្នុង១ខែ សម្រាប់សកម្មភាពប្រូម៉ូតសិនឲ្យវេបសាយភ្នាល់ល្បែងទាំងនេះ ។
តាមដីការ នោះតារាម៉ូដែលរងការចោទប្រកាន់ទាំងនេះ នឹងត្រូវឡើងតុលាការនៅថ្ងៃពុធ សប្តាហ៍ក្រោយនេះ ។
អ្នកនាំពាក្យម្នាក់របស់ប៉ូលីសថៃ ត្រូវបានដកស្រង់សម្តីដោយ Daily Star ដោយនិយាយថា៖ «តារាល្បី ឬ ស្រីស្អាត ដែលមានអ្នកតាមដានយ៉ាងច្រើននៅលើបណ្តាញសង្គម មិនត្រូវបានអនុញ្ញាតឲ្យផុសអ្វីៗដែលជាប់ទាក់ទងនឹងសកម្មភាពល្បែងស៊ីសងណាមួយនោះឡើយ» ៕ ចន្ទី
