ប្រធានាធិបតីអាមេរិក Donald Trump បាននិយាយថា លោកចង់ឲ្យប្រជាជន «អង្គុយត្រង់ត្រាប់ស្តាប់ដោយយកចិត្តទុកដាក់» នៅពេលលោកថ្លែង ដែលធ្វើយ៉ាងណាឲ្យស្រដៀងនឹងអ្វីដែលពលរដ្ឋកូរ៉េខាងជើងធ្វើ នៅពេលដែលមេដឹកនាំរបស់ពួកគេ គឹម ជុងអ៊ុន ថ្លែងទៅកាន់ប្រជារាស្ត្រ ។
លោក Trump បាននិយាយជាមួយ “Fox & Friends” នៅក្បែរសេតវិមានកាលពីថ្ងៃសុក្រ ដោយបានសរសើរលោក គឹម ជាខ្លាំង ចំពោះភាពដឹកនាំរបស់គាត់ ។
លោក Trump បន្តថា៖ «ហេ! គាត់ (គឹម ជុងអ៊ុន) គឺជាប្រមុខដឹកនាំប្រទេសមួយរូប ហើយខ្ញុំចង់មានន័យថា គាត់គឺជាមេដឹកនាំដ៏រឹងមាំ ហេតុដូច្នេះ សូមកុំគិតអ្វីៗផ្សេងពីនេះ» ។
គាត់បន្ថែមថា៖ «គាត់បានថ្លែង… ហើយពលរដ្ឋរបស់គាត់បានក្រោកឈរឡើងដោយយកចិត្តទុកដាក់បំផុត ។ ហេតុនេះ ខ្ញុំចង់ឲ្យពលរដ្ឋរបស់ខ្ញុំធ្វើដូចនេះដែរ បានទេ!!» ។
ការកត់សម្គាល់នេះបានធ្វើឲ្យមានការភ្ញាក់ផ្អើលនៅលើបណ្តាញអ៊ិនធើរណេត ប៉ុន្តែ ក្រោយមក គាត់បាននិយាយជាមួយអ្នកយកព័ត៌មានបន្ទាប់ Fox បានធ្វើបទសម្ភាសន៍ ដោយលោក Trump ទទួចថា គាត់កំពុងបង្កើតភាពសប្បាយរីករាយមួយ ។
នៅពេលអ្នកសារព័ត៌មានម្នាក់បានសួរគាត់ថា៖ «តើលោកចង់មានន័យយ៉ាងម៉េច នៅពេលដែលលោកនិយាយថា លោកមានបំណងឲ្យជនជាតិអាមេរិកាំងក្រោកឈរដោយយកចិត្តទុកដាក់ នៅពេលលោកថ្លែង?» ។
លោក Trump បានឆ្លើយតបថា៖ «ខ្ញុំកំពុងនិយាយលេងសើចប៉ុណ្ណោះ ។ អ្នកមិនយល់ពីភាពសើចចំអកទេអី ។ តើអ្នកមកពីខាងណា? អ្នកមកពី CNN មែន? ហេ! លោកនេះអាក្រក់មែនហ្មង!!» ៕ ឧត្តម