តាមប្រភពរដ្ឋាភិបាលដែលមិនបញ្ចេញឈ្មោះ ទីភ្នាក់ងារព័ត៌មានរបស់ប្រទេសកូរ៉េខាងត្បូង បានរាយការណ៍ថា ការផ្អាកនេះគឺសំដៅលើការធ្វើសមយុទ្ធរួមគ្នាទ្រង់ទ្រាយធំមិនមែនលើការធ្វើសមយុទ្ធយោធាជាប្រចាំនោះទេ។
ការហ្វឹកហាត់យោធារវាង អាមេរិកនិងកូរ៉េខាងត្បូង។
កូរ៉េខាងត្បូង និងសហរដ្ឋអាមេរិកគ្រោងនឹងប្រកាសអំពីការផ្អាកការធ្វើសមយុទ្ធយោធា «ទ្រង់ទ្រាយធំ» របស់ខ្លួននៅក្នុងសប្ដាហ៍នេះ ដោយមានលក្ខខណ្ឌថាពួកគេនឹងចាប់ផ្ដើមការធ្វើសមយុទ្ធនេះឡើងវិញប្រសិនបើប្រទេសប្រទេសកូរ៉េខាងជើងមិនរក្សាការសន្យារបស់ខ្លួននៅក្នុងការលុបបំបាត់អាវុធនុយក្លេអ៊ែ។
កន្លងមក សមយុទ្ធទ្រង់ទ្រាយធំដែលមានឈ្មោះថា «អ្នកការពារសេរីភាព Ulchi» គ្រោងនឹងធ្វើឡើងនៅចុងរដូវក្ដៅនេះ។ កាលពីឆ្នាំមុន ទាហានអាមេរិកាំងចំនួន ១៧.៥០០នាក់ និងទាហានកូរ៉េខាងត្បូងចំនួន ៥ ម៉ឺននាក់បានចូលរួមនៅក្នុងសមយុទ្ធអ្នកការពារសេរីភាព Ulchi នេះ។
ប្រធានាធិបតីសហរដ្ឋអាមេរិកលោក Donald Trump បានធ្វើឲ្យមន្ត្រីរដ្ឋាភិបាលកូរ៉េខាងត្បូង និងមន្ត្រី រដ្ឋាភិបាលអាមេរិកមានការភ្ញាក់ផ្អើលនៅពេលដែលលោកបានសន្យាថានឹងបញ្ចប់ការធ្វើសមយុទ្ធយោធានេះបន្ទាប់ពីជំនួបរបស់លោកជាមួយនឹងមេដឹកនាំកូរ៉េខាងជើងលោក Kim Jong Un បានបញ្ចប់ទៅនៅក្នុងប្រទេសសិង្ហបុរីកាលពីសប្ដាហ៍មុន ៕ សូយន
