រថយន្តតាក់ស៊ីពណ៌ទឹកក្រូចមួយគ្រឿងបានបោះពួយឡើងចិញ្ចើមថ្នល់ ខណៈពេលអ្នកដែលទៅទស្សនា World Cup កំពុងឈរថតរូប ស្ថិតនៅប្រមាណ ២០០ម៉ែត្រ ពីទីលានក្រហម ធ្វើឲ្យមនុស្ស ៧នាក់ រងរបួស បើកុំបានបង្គោលស្លាកសញ្ញាគមនាគមន៍ទប់ជាប់ទេនោះ មិនដឹងថាមានអ្នករងគ្រោះប៉ុន្មាននាក់ថែមទៀតទេ ។
អ្នកបើកបររថយន្តបានបើកទ្វារប៉ងរត់គេចខ្លួន ប៉ុន្តែត្រូវបានហ្វូងមនុស្សប្រដេញតាមចាប់ជាប់ វាមានសញ្ជាតិ Kyrgyzstan អាយុ ២៨ឆ្នាំ បានឆ្លើយថា ខ្លួនគេមិនមានបំណងបើកបំបុកលើហ្វូងមនុស្សទេ ។ ប៉ុន្តែព្រោះតែនឿហត់ពេកដោយត្រូវធ្វើការពីរថ្ងៃជាប់គ្នា ទើបជាន់ច្រឡំល្បឿនបន្ថែម ។
តាមចៅហ្វាយក្រុងមូស្គូ ឲ្យដឹងថា “មូលហេតុបឋមត្រូវបានកំណត់គឺអ្នកបើកបររូបនេះ មិនគ្រប់គ្រងដៃចង្កូតរថយន្តបាន” ។ ទោះយ៉ាងណាប៉ូលិសកំពុងធ្វើការស៊ើបការស៊ើបអង្កេតព្រហ្មទណ្ឌ រីឯអ្នករងរបួសត្រូវបានបញ្ជូនទៅកាន់មន្ទីរពេទ្យ ក្នុងនោះមានស្ត្រីម្នាក់រងរបួសធ្ងន់ ។ តាម RIA Novosti ឲ្យដឹងថា អ្នករងបួសមានពីរនាក់ជាពលរដ្ឋមិចស៊ីកូ ហើយនិង Azerbaijan ៕ សូយន