បន្ទាយមានជ័យ៖ កម្លាំងនគរបាលឃាត់ខ្លួន បានចាប់ខ្លួនជនសង្ស័យ២នាក់ប្តីប្រពន្ធ ជាមេខ្លោងជួញដូរគ្រឿងញៀន និង១០នាក់ទៀត ជាអ្នកប្រើប្រាស់ និងបានកសាងសំណុំរឿង ដោយចោទប្រកាន់ពីបទ ជួញដូរគ្រឿងញៀន បញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី១៧ ខែមិថុនា ឆ្នាំ២០១៨។
លោកវរសេនីយ៍ទោ សៅ សារឿន អធិការនគរបាលស្រុកថ្មពួក បានឱ្យដឹងថា ជនសង្ស័យជាមេខ្លោង ទី១.ឈ្មោះ ម៉ូវ ស៊ឹង ហៅហម ស៊ឹង ភេទប្រុស អាយុ៤៨ឆ្នាំ ត្រូវជាប្តី ទី២.ឈ្មោះ គយ ច្រឹប ភេទស្រី អាយុ៥៨ឆ្នាំ ត្រូវជាប្រពន្ធ រស់នៅភូមិគោកព្រេច ឃុំគោករមៀត ស្រុកថ្មពួក និងជនសង្ស័យប្រើប្រាស់១០នាក់ទៀត។
លោកឧត្តមសេនីយ៍ត្រី សិទ្ធ ឡោះ ស្នងការរងនគរបាលខេត្តបន្ទាយមានជ័យ បានឱ្យដឹងថា នៅពេលកម្លាំងនគរបាលស្រុកថ្មពួក ឃាត់ខ្លួនជនសង្ស័យប្រុស ស្រី១២នាក់ គឺកម្លាំងជំនាញបានស្រាវជ្រាវ និងកំណត់មុខសញ្ញា បានចុះបង្ក្រាបឃាត់ខ្លួនជនសង្ស័យ១២នាក់ មាន២នាក់ប្តីប្រពន្ធ ជួញដូរគ្រឿងញៀន រឹបអូសដកហូតបានគ្រឿងញៀន មេតំហ្វេតាមីន ចំនួន២២ថង់តូច និងយ៉ាម៉ាចំនួន១៣៥គ្រាប់ ទូរស័ព្ទ៣គ្រឿង ដែកកេះ១ អាវុធកែច្នៃ១ដើម កូនកាំបិតស្នៀត២ ដែលបង្ក្រាប កាលពីថ្ងៃទី១៦ ខែមិថុនា ឆ្នាំ២០១៨ ភូមិគោកព្រេច ឃុំគោករមៀត ស្រុកថ្មពួក ៕ ដោយ៖បញ្ញាស័ក្តិ