បុរសជនជាតិអាមេរិចម្នាក់ រស់នៅក្នុងទីក្រុង Atlanta បានចេញទៅសម្លាប់អ្នកជិតខាងខ្លួនអស់ ១២នាក់ ដោយសារតែបែកថ្នាំខ្លាំង បន្ទាប់ពីមើលរឿងខ្មោចឆៅ Walking Dead អស់រយៈពេល ៣៦ម៉ោង ខណៈខ្លួនកំពុងប្រើប្រាស់គ្រឿងញៀន ។ នេះបើតាមការចុះផ្សាយរបស់ World News Daily Report កាលពីដើមខែនេះ។
បើតាមការបញ្ជាក់របស់ប៉ូលីស បុរសនោះមានឈ្មោះថា Kevin Fogarty អាយុ ៣២ឆ្នាំ។ គាត់បែកថ្នាំយ៉ាងខ្លាំង ហើយវាធ្វើឲ្យគាត់គិតថា អ្នកដែលរស់នៅជុំវិញផ្ទះរបស់គាត់សុទ្ធតែជាខ្មោចឆៅ zombies។
បន្ទាប់ពីមើលរឿងអស់ច្រើនម៉ោង និងបែកថ្នាំផងនោះ បុរសខាងលើបានយកកាំភ្លើងវែង កាំភ្លើងខ្លី កាំបិត និងញញួរតាមខ្លួន ចេញទៅខាងក្រៅផ្ទះដើម្បីសម្លាប់មនុស្ស។
សាក្សីម្នាក់ដែលបានឃើញហេតុការណ៍នោះនិយាយថា “បុរសនោះបានដើរតាមបណ្តោយផ្លូវ ស្រែកខ្លាំងៗថា យើងមិនឲ្យពួកឯងស៊ីខួរបានទេ ពួកអាចង្រៃ និងបានបាញ់លើមនុស្សជាច្រើននាក់”។
បើតាមការបញ្ជាក់របស់ប៉ូលីស បុរសបែកថ្នាំនោះបានបាញ់លើមនុស្សចំនួន ៣១នាក់ បណ្តាលឲ្យមនុស្សចំនួន ១២នាក់ស្លាប់ និង ១៩នាក់រងរបួស។
សូមបញ្ជាក់ថា រឿង Walking Dead គឺជារឿងភាគដែលចង់និយាយពីពិភពលោក ត្រូវបានគ្រប់គ្រងដោយពួកខ្មោចឆៅ។ អ្នកដែលនៅរស់រានមានជីវិតព្យាយាមតស៊ូប្រឆាំងជាមួយពួកវា ដើម្បីឲ្យរួចផុតពីជីវិត៕ ដោយ ៖ សុភ័ក្ត្រ