ការរកឃើញមន្ត្រីជាន់ខ្ពស់ម្នាក់គឺជាអតីតចារបុរសអ៊ីរ៉ង់ ពិតជាការទះកំផ្លៀងយ៉ាងទម្ងន់លើមុខមាត់រដ្ឋាភិបាលអ៊ីស្រាអែល ។
អតីតរដ្ឋមន្ត្រីថាមពល និងហេដ្ឋារចនាសម្ព័ន្ធអ៊ីស្រាអែល Gonen Segev (កណ្តាល) ។
តាម RT អតីតរដ្ឋមន្ត្រីថាមពល និងហេដ្ឋារចនាសម្ព័ន្ធអ៊ីស្រាអែល Gonen កាលពីថ្ងៃសុក្រ សប្តាហ៍មុនទើបត្រូវបានចោទប្រកាន់ទោសពីបទធ្វើចារកម្មជួយដល់សត្រូវក្នុងសម័យសង្គ្រាម ។ ជាក់ស្តែងគឺបានលួចបញ្ជូនព័ត៌មានសម្ងាត់បំផុតឲ្យអ៊ីរ៉ង់ ដែលជាសត្រូវ “សួរពូជ” ជាមួយអ៊ីស្រាអែល ។ តាមស្ថាប័នសន្តិសុខផ្ទៃក្នុង Shin Bet របស់អ៊ីស្រាអែល នោះតាំងពីឆ្នាំ ២០១២ ចារកម្មអ៊ីរ៉ង់ បានអូសទាញ រួចប្រើប្រាស់ស្ថានទូតអ៊ីរ៉ង់នៅនីហ្សេរីយ៉ា Gonen Segev បានចាប់ផ្តើមធ្វើការឲ្យអ៊ីរ៉ង់ ។ ស្ថាប័ននេះបានបញ្ជាក់ច្បាស់ថា ៖ “Segev បានផ្តល់ព័ត៌មានទាក់ទងវិស័យថាមពល បណ្តាទីតាំងសន្តិសុខ អគារសំខាន់ៗ មន្ត្រីកំពូលៗ ក្នុងវិស័យការបរទេស សន្តិសុខជាតិ និងវិស័យដទៃទៀតជាច្រើន ។ ជននេះក៏បានជួបជាមួយមន្ត្រីជាន់ខ្ពស់របស់អ៊ីស្រាអែលជាច្រើន ដើម្បីស្តាប់បញ្ហា រួចរាយការណ៍ឲ្យអ៊ីរ៉ង់ ។
នៅខណៈពេលត្រូវចាប់ខ្លួន លោក Segev កំពុងធ្វើសកម្មភាពចារកម្មឲ្យអ៊ីរ៉ង់ ពេលនេះអតីតរដ្ឋមន្ត្រីវ័យ ៦២ឆ្នាំខាងលើ កំពុងឃុំខ្លួន ក្នុងមូលដ្ឋានពិសេសមួយរង់ចាំការកាត់ទោស៣សប្តាហ៍ទៀតពីសំណាក់តុលាការ ៕ សូយន
