ភ្នំពេញ ៖ ដើម្បីចូលរួមចំណែកដោះស្រាយបញ្ហាប្រឈមសម្រាប់ពលរដ្ឋខ្មែរកម្ពុជាក្រោមកំពុងរស់នៅក្នុងប្រទេសកម្ពុជា នាពេលបច្ចុប្បន្ននេះ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ រួមសហការជាមួយលេខាធិការដ្ឋាន អង្គការសមាគមខ្មែរកម្ពុជាក្រោម នឹងរៀបចំទិវាសិទ្ធិមនុស្សអន្តរជាតិខួបទី៦៩ឆ្នាំ ១០ធ្នូ ១៩៤៨-១០ធ្នូ២០១៧ ក្រោមប្រធានបទ ខ្មែរក្រោមគឺជាប្រជាពលរដ្ឋកម្ពុជាស្របច្បាប់ ដែលពិធីប្រារព្ធទិវាសិទ្ធិមនុស្សអន្តរជាតិ នឹងប្រព្រឹត្តទៅនៅថ្ងៃទី១០ខែធ្នូឆ្នាំ២០១៧នៅទីរួមខេត្តសៀមរាប។
បើតាមលិខិតអំពាវនាវរបស់សមាគមខ្មែរកម្ពុជាក្រោមដើម្បីសិទ្ធិមនុស្សនិងអភិវឌ្ឍន៍ កាលពីថ្ងៃទី៥ខែវិច្ឆិកាឆ្នាំ២០១៧ ដែលមានលោកសឺន យឿន ជាគណៈកម្មាធិការប្រតិបត្តិ បានឲ្យដឹងថា គោលបំណងនៃពិធីនេះ ដើម្បីផ្សព្វផ្សាយអំពីនីតិវិធី និងច្បាប់បទដ្ឋានពាក់ព័ន្ធនៃការចុះបញ្ជីសំបុត្រកំណើត ធ្វើលិខិតបញ្ជាក់កំណើត និងដំណើរការនៃការធ្វើអត្តសញ្ញាណប័ណ្ណ។ ការប្រារព្ធទិវាសិទ្ធិមនុស្សអន្តរជាតិនេះ ដោយចែកជូនផងដែរដល់អ្នកចូលរួមនូវច្បាប់កម្ពុជាដែលពាក់ព័ន្ធមានរដ្ឋធម្មនុញ្ញ ច្បាប់សញ្ជាតិ និងលិខិតូបករណ៍ពាក់ព័ន្ធមួយចំនួនទៀត ទាក់ទងទៅនឹងសញ្ជាតិខ្មែរនៅកម្ពុជា។ ក្នុងគោលបំណងសំខាន់ទៀតនោះ ដើម្បីស្វែងរកដំណោះស្រាយដ៏ល្អជាមួយអាជ្ញាធរមូលដ្ឋាន និងខ្មែរក្រោម ដើម្បីស្វែងយល់ពីអត្តសញ្ញាណខ្មែរនៅកម្ពុជាក្រោម ដោយមានការចូលរួមពីពលរដ្ឋខ្មែរក្រោម អាជ្ញាធរមូលដ្ឋាន និងស្ថាប័នមានសមត្ថកិច្ច។
សមាគមខ្មែរកម្ពុជាក្រោមដើម្បីសិទ្ធិមនុស្សនិងអភិវឌ្ឍន៍ ក៏ដូចជាលេខាធិការដ្ឋាន អង្គការ សមាគម ខ្មែរកម្ពុជាក្រោម បានអំពាវនាវដល់សប្បុរសជនទាំងក្នុងនិងក្រៅប្រទេស ចូលរួមវិភាគទានតាមសទ្ធា ដើម្បីជាចំណែកមួយនៃសិទ្ធិសេរីភាពសម្រាប់ប្រជាពលរដ្ឋខ្មែរគ្រប់ៗរូប។
តាមរយៈលិខិតនេះដែលបានផ្សព្វផ្សាយក្នុងផេកហ្វេសប៊ុនរបស់ខ្លួននោះ លោកសឺន យឿន បានបញ្ជាក់ថា ផ្អែកទៅតាមការសិក្សា និងទិន្នន័យដែលទទួលបាន ក្រុមការងារសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានកំណត់បញ្ហាប្រឈម និងស្ថានភាពលំបាកមួយចំនួនរបស់បងប្អូនខ្មែរកម្ពុជាក្រោម ដែលកំពុងរស់នៅតាមតំបន់មួយចំនួននៃព្រះរាជាណាចក្រកម្ពុជា។
បញ្ញាដែលកំពុងប្រឈមសំខាន់នោះ គឺពាក់ព័ន្ធទៅនឹងអត្តសញ្ញាណប័ណ្ណសញ្ជាតិខ្មែរ ដោយសារតែអាជ្ញាធរមូលដ្ឋាន មិនបានអនុញ្ញាតឲ្យខ្មែរក្រោមមួយចំនួនចុះបញ្ជីអត្រានុកូលដ្ឋាន ឬធ្វើលិខិតបញ្ជាក់កំណើត ខ្លះទៀតមិនត្រូវបានអនុញ្ញាតធ្វើអត្តសញ្ញាណប័ណ្ណ ទោះបីខ្មែរក្រោមមានឯកសារគ្រប់គ្រាន់ ដែលអាចបញ្ជាក់ថា នឹងអាចធ្វើអត្តសញ្ញាណប័ណ្ណបាន នឹងខ្លះទៀត ទោះបីខ្មែរក្រោមមានអត្តសញ្ញាណប័ណ្ណផុតកំណត់ តែក៏ត្រូវបានអនុញ្ញាតធ្វើសាជាថ្មីដែរ។ មូលហេតុនេះ ដោយហេតុថាអាជ្ញាធរមូលដ្ឋានមានការយល់ច្រឡំថាខ្មែរក្រោមជាជនអន្តោប្រវេសន៍វៀតណាម។ ចំនួនខ្មែរក្រោមដែលត្រូវបានបដិសេធដោយអាជ្ញាធរមូលដ្ឋាននេះ គឺមានរាប់ពាន់គ្រួសារដែលកំពុងរស់នៅតាមខេត្តមួយចំនួនដូចជា ខេត្តសៀមរាប តាកែវ កំពង់ឆ្នាំង និងនៅរាជធានីភ្នំពេញ៕ ដោយ៖បញ្ញាស័ក្តិ