ឯកអគ្គរដ្ឋទូតអាមេរិកប្រចាំ UN លោក Nikki Haley នៅថ្ងៃទី ១៩ ប្រកាសថា អាមេរិកដកខ្លួនចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ ក្រោមមូលហេតុថា ស្ថាប័ននេះ មានការរើសអើងចំពោះអ៊ីស្រាអែល ។
ក្នុងសន្និសីទកាសែតជាមួយប្រមុខការទូតអាមេរិក Mike Pompeo នៅវ៉ាស៊ីនតោន អ្នកស្រី Haley ពោលថា ៖ យើងខ្ញុំសម្រេចចិត្តធ្វើបែបនេះ ព្រោះការសន្យារបស់យើងពុំអនុញ្ញាតឲ្យខ្លួនឯងបន្តក្លាយជាផ្នែកមួយនៃអង្គការមួយដែលមានសីលធម៌ក្លែងក្លាយ និងអំនួត ព្រមទាំងលេងសើចនឹងរឿងសិទ្ធិមនុស្ស ។
អង្គការឃ្លាំមើលសិទ្ធិមនុស្ស បានរិះគន់ចំពោះការសម្រេចចិត្តខាងលើរបស់អាមេរិក ហើយព្រមានថា បញ្ហាដែលក្រុងវ៉ាស៊ីនតោនអវត្តមានក្នុងស្ថាប័ននេះ វានឹងច្រានបន្ទុកទទួលខុសត្រូវទៅឲ្យរដ្ឋាភិបាលប្រទេសដទៃ ដោះស្រាយបណ្តាបញ្ហាសិទ្ធិមនុស្សយ៉ាងធ្ងន់ធ្ងរបំផុតរបស់ពិភពលោក ។
គួររំលឹកថា ចាប់តាំងពីលោកត្រាំឡើងកាន់អំណាច អាមេរិក បានដកខ្លួនថយចេញពីស្ថាប័នវប្បធម៌ UNESCO កាត់បន្ថយជំនួយហិរញ្ញវត្ថុឲ្យ UN ព្រមទាំងប្រកាសអំពីផែនការដកខ្លួនចេញពីសន្ធិសញ្ញាប៉ារីស ស្តីពីការប្រែប្រួលធាតុអាកាសផ្តួចផ្តើមឡើងដោយអង្គការសហប្រជាជាតិ ៕ សូយន