តាកែវ៖ ហេតុការណ៏គ្រោះថ្នាក់ចរាចរណ៏ដ៏រន្ធត់មួយបានកើតឡើងនៅវេលាយប់ថ្ងៃទី ១៩ មិថុនា ២០១៨ នៅកំណាត់ផ្លូវខេត្តលេខ ១២A ឋិតនៅភូមិចុងថ្នល់ សង្កាត់បារាយណ៏ ក្រុងដូនកែវ ខេត្តតាកែវ បានធ្វើសិស្សសាលាពីរនាក់ដែលចេញពីរៀននៅវេលាម៉ោង ៧យប់វិលត្រឡប់មកផ្ទះរងរបួសធ្ងន់ស្រាល ដោយសាររថយន្តមួយគ្រឿងបើកបរក្នុងទិសដៅបញ្ច្រាសទិសគ្នា បែកកង់មុខរេចង្កូតចូលមកបុកយ៉ាងពេញទំហឹងនៅចិញ្ចឹមផ្លូវ បណ្តាលអោយជនរងគ្រោះដែលរងរបួសធ្ងន់នោះ បានរងរបួសបាក់ដៃ បាក់ជើង និងបែកក្បាលយ៉ាងធ្ងន់ធ្ងរ បញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ចំណែកជនរងគ្រោះម្នាក់ទៀតរងរបួសស្រាល ដេកសម្រាកព្យាបាលនៅផ្ទះ ។
លោក ឥន្ទ មណ្ឌល អធិការរងក្រុងដូនកែវ បានអោយដឹងថា រថយន្តបង្កហេតុនោះម៉ាក កាមេរី ឆ្លាម ពណ៌ដីឥដ្ឋ ពាក់ស្លាកលេខព្រៃវែង 2A-0879 អ្នកបើកបរមិនស្គាល់អត្តសញ្ញាណ ក្រោយពេលកើតហេតុបានរត់គេចខ្លួនបាត់ ។ ចំណែកជនរងគ្រោះជិះម៉ូតូម៉ាកគុបជ្រុង សេ៥០ ពណ៌ទឹកប៊ិក ពាក់ស្លាកលេខតាកែវ 1I-9801 បើកបរដោយឈ្មោះ ង៉ែត ប៊ុនហុង ភេទប្រុសអាយុ ១៧ឆ្នាំ មុខរបរជាសិស្ស រស់នៅភូមិឃុំកើតហេតុ ខាងលើ និងជនរងគ្រោះម្នាក់ទៀត ឈ្មោះ ឆាន់ ខុឌុន ភេទប្រុស អាយុ ១៨ឆ្នាំ មុខរបរជាសិស្ស បើកបរម៉ូតូម៉ាកហុងដា សេ១២៥ ព័ណខ្មៅ ពាក់ស្លាកលេខ តាកែវ 1B-4774 រងរបួសធ្ងន់ ។ក្រោយពេលកើតហេតុ ក្រុមមន្ត្រីជំនាញបានអោយរថយន្តសាមុយដឹកយកមកសង្គ្រោះបន្ទាន់នៅមន្ទីរពេទ្យបង្អែកខេត្តតាកែវ ដោយមានស្ថានភាពធ្ងន់ធ្ងរពេក ត្រូវបានគ្រូពេទ្យបញ្ជូនបន្តទៅរាជធានីភ្នំពេញ ។
អ្នកឃើញហេតុការណ៏នៅទីនោះបាននិយាយថា មុនពេលកើតហេតុ គេឃើញរថយន្តមួយគ្រឿងបើកបរមកពីទិសខាងជើង ទៅទិសខាងត្បូង រីឯម៉ូតូទាំងពីរគ្រឿងនោះបើកបរពីទិសត្បូងទៅទិសខាងជើង មកដល់ចំណុចកើតហេតុ ស្រាប់តែរថយន្តបង្កនោះបែកកង់មុខ រួចរេចង្កូតចូលមកបុកម៉ូតូពីគ្រឿងទៀតដែលនៅចិញ្ចឹមផ្លូវនេះតែម្តង បណ្តាលអោយអ្នកបើកបរម៉ូតូទាំងពីរគ្រឿងនោះ ១ខ្ទាតចេញទៅចិញ្ចើមផ្លូវ មួយទៀតបុកផ្ទប់ជាមួយនឹងកញ្ចក់រថយន្តតែម្តង ហើយក្រោយមកម្ចាស់រថយន្តក៏បាននាំប្រពន្ធ និងកូនរត់គេចខ្លួនទៅ ៕
តាកែវ