ឡានក្រុងមួយបានផ្ទុះនៅភាគខាងត្បូងចិន កាលពីយប់ថ្ងៃទី ១៨ ខែមិថុនា បណ្តាលឲ្យអ្នកដំណើរ ១២នាក់ និងអ្នកដំណើរតាមផ្លូវ ៣នាក់ទៀតរងរបួស ។ ពួកអ្នកដំណើរដែលជាប់គាំងនៅខាងក្នុងបានលូនចេញតាមបង្អួច ខណៈពេលដែលរថយន្តក្រុងនេះ គ្រប់ដណ្តប់ទៅដោយអគ្គិភ័យនៅ ឡេហាន់ ខេត្តស៊ីឈួន ។
ករណីផ្ទុះនេះបានធ្វើឲ្យអ្នកដំណើរមួយចំនួនចុះពីរថយន្ត និងអ្នកដើរក្បែរនោះត្រូវខ្ទាតចេញយ៉ាងឆ្ងាយ ។ នេះបើតាមការចេញផ្សាយតាមរលកធាតុអាកាសនៃស្ថានីយ៍ទូរទស្សន៍ចិន CCTV ។ ស្នងការនគរបាលឡេហាន់ ឲ្យដឹងថា ពួកគេកំពុងធ្វើការស៊ើបអង្កេតជន សង្ស័យអាយុ ៣១ឆ្នាំម្នាក់ ប៉ុន្តែពុំប្រាប់អ្វីផ្សេងទៀត ។ ចំណែកអ្នករងរបួស ១៥នាក់កំពុងព្យាបាលនៅមន្ទីរពេទ្យ ក្នុងនោះមានម្នាក់រងរបួសធ្ងន់ ៕ សូយន
