ខេត្តស្វាយរៀង៖លោក ហុង វិណុល ប្រធានក្រុមការងារចុះជួយឃុំដូង ស្រុករមាសហែក ខេត្តស្វាយរៀង កាលពីចុងសប្តាហ៍កន្លងទៅនេះបានធ្វើការណែនាំដល់ក្រុមជាងម៉ៅការសំណង់ទាំងអស់ត្រូវធ្វើយ៉ាងណាគឺធ្វើទៅតាមលក្ខណៈបច្ចេកទេសដើម្បីឱ្យសំណង់មានគុណភាពប្រើប្រាស់បានយូរអង្វែង មិនងាយខូច ហើយម្យ៉ាងទៀតត្រូវធ្វើឱ្យបានឆាប់រហ័ស ងាយស្រួលឱ្យសិស្សានុសិស្សបានលេងកីឡាដើម្បីសុខភាព ជៀសឆ្ងាយពីគ្រឿងញៀន បង្កើនប្រាជ្ញានិងស្រលាញ់កីឡាផងដែរ។
លោក ហុង វិណុល បានមានប្រសាសន៍បន្ថែមទៀតថាៈចំពោះសមិទ្ធផលទាំងអស់នេះយើងទាំងអស់គ្នាត្រូវចូលរួមថែរក្សាឱ្យបានយូរអង្វែងដើម្បីទុកជាគុណប្រយោជន៍ដល់កូនចៅជំនាន់ក្រោយៗទៀតនិងត្រូវជួយជំរុញឱ្យសិស្សានុសិស្សទាំងអស់ដែលជាទំពាំងស្នងឬស្សីចេះស្រលាញ់កីឡានិងចេះលេងកីឡានិងជៀសឆ្ងាយពីគ្រឿងញៀន ។
ជាប្រវត្តិសាស្ត្រនៅលើទឹកដីឃុំដូងស្រុករមាសហែកខេត្តស្វាយរៀង ដែលនឹងមានទីលានបាល់ទាត់ រួមមានបន្ទប់ទឹកនិងកន្លែងអង្គុយទស្សនាដ៏ស្រស់ស្អាតជាអំណោយរបស់ក្រុមការងារថ្នាក់ជាតិចុះជួយឃុំដូងស្រុករមាសហែក បាននឹងកំពុង សាងសង់ទុកសម្រាប់ជាចំណងដៃជូនដល់អនុវិទ្យាល័័យដូងដើម្បីឱ្យសិស្សានុសិស្សកូនចៅរបស់ប្រជាពលរដ្ឋនៅក្នុងមូលដ្ឋានបានលេងកីឡាបាល់ទាត់ផងនិងដើម្បីលើកស្ទួយវិស័យកីឡានៅក្នុងខេត្តស្វាយរៀងផងដែរ។
លោក ពៅ យ៉ុក នាយកសាលាអនុវិទ្យាល័យ ដូង បានមានប្រសាសន៍ឱ្យដឹងថាៈជាមួយនឹងសមិទ្ធផលនានាដែលបាននឹងកំពុងកសាង ជាពិសេសគឺទីលានបាល់ទាត់ប្រកបដោយសោភ័ណភាពទៅតាមលក្ខណៈស្តង់ដាបច្ចេកទេសនោះគឺជាមោទនភាពបំផុតសំរាប់សាលាហើយនៅក្នុងភូមិសាស្ត្រឃុំដូងនាពេលកន្លងមកគឺពុំធ្លាប់មានទីលានបាល់ទាត់ ដូច្នេះឡើយសំរាប់ឃុំ.ក៏ដូចជាលោកគ្រូ.អ្នកគ្រូ រួមនិងសិស្សានុសិស្សគឺមានទឹកចិត្តរីករាយក្រៃលែងដោយសារសមិទ្ធផលទាំងអស់នេះបានកកើតឡើងយ៉ាងព្រោងព្រាតមិននឹកស្មានដល់ថាមានអ្វីៗដូចសព្វថ្ងៃនេះនោះទេ។
លោកនាយកសាលាក៏បានថ្លែងអំណរគុណយ៉ាងជ្រាលជ្រៅចំពោះលោក ហុង វិណុល ប្រធានក្រុមការងារចុះជួយឃុំដូងនិងសហការី ដែលនាពេលកន្លងមកក៏ដូចជានាពេលបច្ចុប្បន្នតែងតែមានការយកចិត្តទុកដាក់ខ្ពស់ក្នុងការជួយទំនុកបំរុងក៏ដូចជាការកសាងនូវរាល់ហេដ្ឋារចនាសម្ព័ន្ធនានានៅមូលដ្ឋានឱ្យមានការរីកចម្រើនលើគ្រប់វិស័យសក្ដិសមជាមន្ត្រីដែលបំរើរាស្ត្រយ៉ាងពិតប្រាកដ។
សូមបញ្ជាក់ផងដែរថាៈ ទីលានបាល់ទាត់ដែលបាននឹងកំពុងកសាងនាពេលនេះគឺបានចាប់ផ្តើមសាងសង់អស់រយៈពេលជិត២ខែកន្លងមកហើយ.ហើយបានចំណាយក្នុងការសាងសង់អស់ថវិការាប់រយលានរៀលនឹងត្រូវធ្វើពិធីសម្ពោធដាក់ឱ្យប្រើប្រាស់ជាផ្លូវការនាពេលឆាប់ៗខាងមុខនេះ ៕
វ៉ៃកូ
