កណ្តាល៖ នគរបាលស្រុកមុខកំពូល បានឲ្យដឹងថា នគរបាលបានបង្ក្រាប ករណីហិង្សាដោយចេតនា ដោយម្នាក់ដេកពេទ្យ ម្នាក់ដេកគុក ខណៈពេលពួកគេទាំងពីរនាក់ ធ្លាប់មានទំនាស់ជាមួយគ្នា ជនដៃដល់ កាន់ដែក ចំពុះទុង ចាក់ជនរងគ្រោះ បណ្តាលឲ្យរងរបួស កើតហេតុថ្ងៃទី១៩.០៦.២០១៨ វេលាម៉ោង១៨ ចំណុចក្រោមផ្ទះឈ្មោះណៃ ចែ ភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្តាល។
នគរបាលស្រុកមុខកំពូល បានបញ្ជាក់ថា ជនរងគ្រោះ ឈ្មោះឆាំ ឈឿន ភេទប្រុស អាយុ៣២ ឆ្នាំ នៅភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្តាល មុខរបរ កសិករ ។ ជនសង្ស័យ ឈ្មោះហេង សំណាង ភេទប្រុស អាយុ២៦ឆ្នាំ នៅភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្តាល មុខរបរមិនពិតប្រាកដ (ឃាត់ខ្លួន)។ វត្ថុតាងចាប់យក ដែកចំពុះទុងចំនួន១។
កន្លងមក នៅឆ្នាំ២០១៦ ជនសង្ស័យ និងជនរងគ្រោះ ធ្លាប់មានទំនាស់ជាមួយគ្នា ហើយក្រោយមកជនសង្ស័យ តែងតែជេរប្រមាថ ដល់ជនរងគ្រោះថែមទៀតផង។ នៅថ្ងៃទី១៩ ខែមិថុនា ឆ្នាំ២០១៨ វេលាម៉ោង១៧.៣០នាទី ជនរងគ្រោះកំពុងដេកមើលទូរទស្សន៍ នៅចំណុចកើតហេតុ ស្រាប់តែជនសង្ស័យបាន ដើរចូលទៅដល់កន្លែងកើតហេតុនោះដែរ ដោយកាន់ដែក ចំពុះទុងនៅនឹងដៃ ហើយបានដកដែកចំពុះទុងនោះចេញពី ស្រោមបំណងចាក់ជនរងគ្រោះ តែត្រូវបានឈ្មោះ ពៅ និង ឈ្មោះវង ចាប់ដកយកដែកចំពុះទុងនោះចេញ ពេលនោះជនសង្ស័យ បាននិយាយគំរាម ជនរងគ្រោះថា (ចាំមើលថ្ងៃណាមួយ ពូជអ្ហែង អញចាក់សម្លាប់ទាំងអស់) បន្ទាប់មកជនសង្ស័យ ក៏បានស្ទុះចូលទៅវាយជនរងគ្រោះ១ដៃ ចំក្រោមភ្នែកខាងឆ្វេងបណ្ដាល ឲ្យហើមជាំហើយក៏ត្រូវបានអ្នកជិត ខាងចូលឃាត់បំបែកចេញ។ ក្រោយមកជនរងគ្រោះ បានរាយការណ៍ មកនគរបាលប៉ុស្តិ៍ព្រែកអញ្ចាញ ហើយកម្លាំងបាន ក៏ចុះទៅដល់កន្លែង កើតហេតុនិងបាននាំខ្លួន ជនសង្ស័យមកធ្វើការសាកសួរនៅប៉ុស្តិ៍។
នៅចំពោះមុខសមត្ថកិច្ច ជនសង្ស័យ ឆ្លើយបំភ្លឺបាន ដោយសារស្រវឹងស្រាជោកជាំ ហើយក៏បានបញ្ជូនជនសង្ស័យ មកអធិការដ្ឋាននគរបាលស្រុកមុខកំពូល ដើម្បីកសាងសំណុំរឿង បន្តចាត់ការតាមនីតិវិធី៕ ដោយ៖បញ្ញាស័ក្តិ