ខេត្តស្វាយរៀង ៖ នារសៀលថ្ងៃទីពុធ ០៨កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែមិថុនា ឆ្នាំ២០១៨នេះ នៅបន្ទប់ VIP សាលាខេត្ត លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានទទួលជួបពិភាក្សាការងារ និងសម្ដែងគួរសមជាមួយប្រតិភូអគ្គនាយកដ្ឋានពាណិជ្ជកម្មខេត្តសានដុង នៃសាធារណរដ្ឋប្រជាមានិតចិន ដឹកនាំដោយលោក Zhang Xing Cheng អគ្គនាយក នៃអគ្គនាយកដ្ឋានពាណិជ្ជកម្មខេត្តសានដុង ។
នៅក្នុងជំនួបពិភាក្សានេះ ក៏មានការអញ្ជើញចូលរួមពីលោកអភិបាលរងខេត្ត ប្រតិភូខេត្តសានដុង រួមនិងតំណាងអ្នកវិនិយោគខេត្តសានដុងដែលកំពុងដំណើរការវិនិយោគក្នុងទឹកដីនៃខេត្តស្វាយរៀង ។
ក្នុងឱកាសនោះ លោក Zhang Xing Cheng អគ្គនាយក នៃអគ្គនាយកដ្ឋានពាណិជ្ជកម្ម ខេត្តសានដុង បានជម្រាបជូនពីគោលបំណងដែលគណៈប្រតិភូរបស់លោកអញ្ជើញមកខេត្តស្វាយរៀង គឺចុះមកសិក្សាស្វែងយល់ពីសក្ដានុពលរបស់ខេត្តស្វាយរៀង ដើម្បីធ្វើការជំរុញវិនិយោគិនខេត្តសានដុងមកវិនិយោគឲ្យបានកាន់តែច្រើនថែមទៀតនៅក្នុងភូមិសាស្ត្រខេត្ត ។ ជាមួយនេះ លោកអគ្គនាយក ក៏បានថ្លែងនូវការអរគុណចំពោះអាជ្ញាធរខេត្ត ជាពិសេសឯកឧត្ដមអភិបាលខេត្ត ដែលតែងតែផ្ដល់នូវភាពកក់ក្ដៅ តាមរយ:ការជួយសម្របសម្រួល សហការ និងគាំទ្រនូវរាល់សកម្មភាពវិនិយោគរបស់ក្រុមហ៊ុនមកពីខេត្តសានដុង ព្រមទាំងបានសំណូមពរឲ្យអាជ្ញាធរខេត្តបន្តជួយការពារ ផ្ដល់នូវភាពកក់ក្ដៅ និងបង្កលក្ខណៈងាយស្រួលដល់វិនិយោគិនរបស់ខេត្តសានដុង ហើយលោកសង្ឃឹមថានៅពេលខាងមុខនេះ តាមរយៈទំនាក់ទំនង និងសកម្មភាពដ៏ល្អប្រសើរនេះ នឹងជួយជំរុញឲ្យអ្នកវិនិយោគខេត្តសានដុង ក៏ដូចជាអ្នកវិនិយោគចិន មកវិនិយោគកាន់តែច្រើននៅក្នុងទឹកដី នៃខេត្តស្វាយរៀង ។
មានប្រសាសន៍ក្នុងជំនួបនេះ លោកអភិបាលខេត្ត បានជម្រាបជូនអំពីស្ថានភាពទូទៅ និងសក្ដានុពលសំខាន់ៗរបស់ខេត្តស្វាយរៀង ព្រមទាំងបានសម្ដែងនូវការអរគុណចំពោះគណៈប្រតិភូអគ្គនាយកដ្ឋានពាណិជ្ជកម្មខេត្តសានដុង ដែលមានការចាប់អារម្មណ៍ និងមកបំពេញទស្សនកិច្ចក្នុងទឹកដីនៃខេត្តស្វាយរៀង ។
ទន្ទឹមនេះ លោកអភិបាលខេត្ត ក៏បានបញ្ជាក់បន្ថែមថា អាជ្ញាធរខេត្ត សូមស្វាគមន៍ គាំទ្រ និងសម្របសម្រួលសហការជានិច្ច ដើម្បីផ្ដល់ភាពកក់ក្ដៅ ជំនឿទុកចិត្ត និងបង្កលក្ខណៈងាយស្រួលគ្រប់សព្វបែបយ៉ាង និងគាំទ្រយ៉ាងពេញទំហឹងចំពោះអ្នកវិនិយោគទាំងអស់ដែលមានបំណងចង់មកវិនិយោគក្នុងទឹកដីនៃខេត្តស្វាយរៀង រួមទាំងអ្នកវិនិយោគមកពីប្រទេសចិនផងដែរ ។
តាមរយៈការបំពេញទស្សនកិច្ចនេះ លោកអភិបាលខេត្ត ក៏មានសេចក្ដីសង្ឃឹមជឿជាក់ថា នឹងអាចជួយជំរុញឲ្យសកម្មភាពវិនិយោគនៅក្នុងខេត្តស្វាយរៀងកាន់តែមានកំណើនច្រើនឡើងថែមទៀត ជាពិសេសការវិនិយោគរបស់ពាណិជ្ជករមកពីខេត្តសានដុង ហើយអាជ្ញាធរខេត្តគឺត្រៀមទទួលស្វាគមន៍ដោយក្ដីរីករាយ ៕ វ៉ៃកូ
