ភ្នំពេញ៖ លោក សាយ សំអាល់ រដ្ឋមន្ត្រីក្រសួងបរិស្ថាន កាលពីថ្ងៃទីពុធទី២០ ខែមិថុនា ឆ្នាំ២០១៨ បានចែករំលែកចំណេះដឹងស្តីពីការគ្រប់គ្រងបរិស្ថាន និងធនធានធម្មជាតិ ដល់សាកលវិទ្យាល័យជាតិគ្រប់គ្រង។
ថ្លែងក្នុងឱកាសនេះ លោករដ្ឋមន្ត្រី សាយ សំអាល់ មានប្រសាសន៍ថា ក្រសួងបរិស្ថានខិតខំប្រឹង ប្រែងក្នុងការពង្រឹងសមត្ថភាពមន្ត្រីរាជការ ចំណុះក្រសួងបរិស្ថាន និងការពង្រឹងការអនុវត្តច្បាប់ ការពង្រឹងការងារគ្រប់គ្រង វិស័យបរិស្ថាន។ក្នុងវេទិកានេះ លោករដ្ឋមន្ត្រី បានលើកឡើងផងដែរ លើស្ថានភាពជាក់ស្តែង នៃសង្គមជាតិ ក្នុងដំណាក់កាល ដែលមានសុខ សន្តិភាពមានការអភិវឌ្ឍ និងកំណើនសេដ្ឋកិច្ច រយៈពេល២០ឆ្នាំជាប់ៗគ្នា នាពេលកន្លងមកនេះ ការរីកចម្រើន ផ្នែកប្រព័ន្ធបច្ចេកវិទ្យាវិស័យសារព័ត៌មាន ដែលយុវជន ជាពិសេសសិស្ស និស្សិតអាចស្វែងរកព័ត៌មាន ជុំវិញពិភពលោកងាយស្រួល ក៏ដូចជាសិក្សារៀនសូត្រតាមជំនាញរៀងៗខ្លួនៗ។
លោករដ្ឋមន្ត្រី បានបញ្ជាក់ឱ្យដឹងថា ដើម្បីដោះស្រាយបញ្ហាប្រឈម និងការកែទម្រង់ បានជោគជ័យក្នុងកិច្ច ការពារបរិស្ថានអាស្រ័យដោយប្រជាពលរដ្ឋ ជាពិសេសយុវជនចូលរួម និផ្សព្វផ្សាយថែមទៀត ក្នុងកិច្ចគាំពារបរិស្ថាន ការការពារ និងអភិរក្សធនធានធម្មជាតិ ចូលរួមទប់ស្កាត់ការប្រែប្រួលអាកាសធាតុ និងរួមគ្នាកាត់បន្ថយ ការប្រើប្រាស់ប្លាស្ទិកដែលកំពុងមានការប្រឈមខ្លាំង ទាមទាឱ្យយើងចូលរួមទាំងអស់គ្នា នៅពេលបច្ចុប្បន្ន។ ជាមួយគ្នានេះ លោករដ្ឋមន្ត្រី ក្រសួងបរិស្ថាន បានលើកឡើងពីការធ្វើកំណែទម្រង់សំខាន់ៗ នៅក្នុងវិស័យបរិស្ថាន ក៏ដូចជាជំរុញ ឱ្យអ្នកពាក់ព័ន្ធទាំងអស់ ចូលរួមអនុវត្តន៍កម្មវិធីកំណែទម្រង់ទាំងនេះឱ្យមានប្រសិទ្ធភាព ដើម្បីធានារក្សាឱ្យបាននូវតុល្យភាព រវាងការអភិរក្ស និងការអភិវឌ្ឍផងដែរ។
លោករដ្ឋមន្ត្រី បានបញ្ជាក់ដែរថា ការងារបរិស្ថាន ជាកិច្ចការសកល និងមានលក្ខណៈអន្តរវិស័យ ដែលត្រូវបានពិភពលោកយកចិត្តទុកដាក់យ៉ាងខ្លាំង ក្នុងពេលបច្ចុប្បន្ននេះ ហើយកត្តានាំឱ្យជោគជ័យ លើវិស័យបរិស្ថាន គឺអាស្រ័យលើមនុស្សគ្រប់រូបចូលរួមអនុវត្តពីតួនាទីភារកិច្ចរបស់ខ្លួន ដើម្បីឱ្យការគ្រប់គ្រង ថែរក្សាបរិស្ថានប្រកបដោយប្រសិទ្ធភាព៕ ដោយ៖កូឡាប
