ស្ត្រីម៉ាឡេស៊ីវ័យៗក្មេង៣រូប បានធ្វើឲ្យប្រជាជននៅក្នុងប្រទេសភ្ញាក់ផ្អើល និងកោតសរសើរជាខ្លាំង បន្ទាប់ពីពួកគេបានប្រែក្លាយក្តីសុបិន្តហោះហើររបស់ពួកគេ ហើយឥឡូវនេះ ពួកគេបានក្លាយជាអ្នកបើកបរយន្តហោះជាស្រ្តីលើកដំបូង សម្រាប់ក្រុមហ៊ុនអាកាសចរណ៍ Malaysia Airlines ។
ពីមុន វាជារឿងដ៏សាមញ្ញមួយសម្រាប់ស្ត្រីក្នុងការដាក់ពាក្យសុំចូលបម្រើការងារនៅក្នុងវិស័យអាកាសចរណ៍នេះ ក្នុងនាមត្រឹមតែជាអ្នកបម្រើលើយន្តហោះ ឬ បុគ្គលិកនៅលើដី ប៉ុណ្ណោះ ។ យោងតាមការប៉ាន់ប្រមាណរបស់អង្គការសង្គមស៊ីវិលអន្តរជាតិនៅឆ្នាំ ២០១៧ នោះមានអ្នកបើកបរយន្តហោះចំនួន ១៣០,០០០ នាក់ នៅក្នុងពិភពលោក ដែលក្នុងនោះ មានតែ ៣,០០០ (៣%) នាក់ប៉ុណ្ណោះ ជាស្ត្រី ។
ទោះយ៉ាងណា រឿងទាំងនេះ វាហាក់ដូចប្រែក្លាយសន្សឹមៗ ខណៈដែលស្ត្រីឥឡូវនេះ កំពុងទទួលបានឱកាសច្រើន ក្នុងការចូលរួមក្នុងវិស័យអាកាសចរណ៍ ក្នុងនាមជាអ្នកបើកបរយន្តហោះ នៅក្នុងប្រទេសម៉ាឡេស៊ី ។ គិតត្រឹមពាក់កណ្តាលឆ្នាំ២០១៧ ក្រុមហ៊ុនអាកាសចរណ៍ AirAsia ដែលមានតម្លៃទាបមានអ្នកបើកយន្តហោះស្រីចំនួន ៥៥ នាក់ ។
ហើយឥឡូវនេះ ក្រុមហ៊ុនអាកាសចរណ៍ Malaysia Airlines បានចាប់យកបន្ទាប់ AirAsia ហើយថ្មីៗនេះ បានចាប់ផ្តើមដំណើរការកម្មវិធីភីឡុតស្រីរបស់ខ្លួនហើយ ។
តោះ! ជាមួយជាមួយស្ត្រីទាំង៣នាក់ ដែលគឺជាអ្នកបើកបរយន្តហោះស្រីលើកដំបូង សម្រាប់ Malaysia Airlines៖
១- Vivian Foo Hooi Wen អាយុ ២២ ឆ្នាំ
នាងបានបញ្ចប់ការសិក្សាហោះហើរម៉ាឡេស៊ី នៅក្នុងខែមករា ឆ្នាំ២០១៧ ហើយបានចូលរួមជាមួយ Malaysia Airlines ក្នុងនាំជាអ្នកបើកបរនៅខែតុលា ឆ្នាំ២០១៧ ។
២- Wang Wen Chien អាយុ ២៥ ឆ្នាំ
សម្រាប់ Wang គឺនាងបានឈានជើងឡើងលើយន្តហោះ នៅពេលនាងយកនាងទៅរៀនបញ្ជាការហោះហើរលេង១ថ្ងៃ នៅ Subang ខណៈពេលនាងនៅវ័យជំទង់ ។
Wang បានបញ្ចប់ការសិក្សាហោះហើរម៉ាឡេស៊ី នៅក្នុងឆ្នាំ២០១៦ ហើយបានក្លាយជាអ្នកបើករយន្តហោះសម្រាប់ Malaysia Airlines នៅក្នុងខែសីហា ឆ្នាំ២០១៧ បន្ទាប់ពីស្ថិតក្រោមវគ្គបណ្តុះបណ្តាលនៅក្នុងទីក្រុង Sydney មុននោះ ។
៣- Nur Waie Hidayah Mohamad Rasidin អាយុ ២១ ឆ្នាំ
នាងធំដឹងក្តីនៅ Abu Dhabi ទីកន្លែង ដែលឪពុករបស់នាងចង់ឲ្យនាងក្លាយជាអ្នកបើកបរយន្តបន្ត ខណៈគាត់ក៏ជាអាកាសយានិកម្នាក់ផងដែរ ។
នាងនិយាយថា៖ «បន្ទាប់បញ្ចប់ការសិក្សាថ្នាក់វិទ្យាល័យ នៅ Abu Dhabi ក្នុងឆ្នាំ២០១៣ ខ្ញុំបានវិលត្រលប់មកម៉ាឡេស៊ីវិញ ហើយបានចូលសាលាហោះហើរនៅ Melaka» ។
ក្នុងនាមសិស្សប្អូនរបស់ Foo និង Wang នៅក្នុងសាលាហោះហើរ Hidayah បានបញ្ចប់ការសិក្សា៣ឆ្នាំមកហើយ មុនពេលវិលត្រលប់ទៅកាន់ Abu Dhabi ដើម្បីរស់នៅជួបជុំគ្រួសាររបស់នាង ហើយបានចូលរួមជាមួយ Malaysia Airlines ក្នុងនាមជាអ្នកបើកបរយន្តហោះ នៅក្នុងខែធ្នូ ឆ្នាំ២០១៧ ៕ ចន្ទី
