ស្ត្រីជាម្តាយម្នាក់នៅក្នុងទីក្រុង Peth ប្រទេសអូស្ត្រាលី បានអំពាវនាវឲ្យហាមឃាត់ការប្រើប្រាស់ទូរស័ព្ទដៃ នៅបណ្តាសាលារៀន បន្ទាប់ពីកូនស្រីរបស់នាង ត្រូវបានវាយដុំដោយក្មេងស្រីមួយក្រុមយ៉ាងសាហាវ ខណៈថតវីថតវីដេអូពីសកម្មភាពនេះនៅលើទូរស័ព្ទរបស់ពួកគេ ។
ក្មេងស្រីរងគ្រោះអាយុ ៩ ឆ្នាំ ត្រូវបានក្មេងស្រីមួយក្រុមដែលជាសិស្សដូចគ្នា បាននាំគ្នាព្រួតវាយប្រហារ ខណៈនាងដើរនៅក្នុងសាលប្រជុំ ក្នុងអំឡុងម៉ោងសម្រាក កាលពីថ្ងៃច័ន្ទ ។
នាងបានប្រាប់ 9NEWS ថា៖ «ពួកគេបានព្រួតវាយទាត់ធាក់ និងរុញខ្ញុំរហូតកប់នឹងជញ្ជាំង ហើយបន្ទាប់មក បានទាញបោចសក់របស់ខ្ញុំ និងអុកខ្ញុំ១ជង្គង់នៅត្រង់មុខ ដែលជាហេតុធ្វើឲ្យខ្ញុំដួលទៅកម្រាលតែម្តង» ។
ស្ត្រីជាម្តាយរូបនោះបានឲ្យដឹងថា របួសស្នាមរបស់កូនស្រីនាង នៅតែពុំទាន់ជាសះស្បើយនៅឡើយ ហេតុនេះ នាងពុំទាន់អាចវិលត្រឡប់ទៅរៀនវិញបានទេ ។
ចំណែកសិស្សស្រី២នាក់ដែលបានប្រព្រឹត្តអំពើហិង្សានេះ ត្រូវបានផ្អាកការសិក្សាហើយៗ ប៉ូលីសក៏កំពុងបើកការស៊ើបអង្កេតផងដែរ ។
ទោះយ៉ាងណា ម្តាយរបស់ក្មេងស្រីរងគ្រោះ កំពុងទាមទារសាលារៀនបណ្តេញពួកចូលចិត្តសម្លុតគំរាមគេទាំងនេះ ហើយរឹបអូសទូរស័ព្ទពីពួកគេ ដែលត្រូវបានរកឃើញធ្វើរឿងមិនល្អបែបនេះ ។
នាងបាននិយាយថា៖ «រៀងរាល់សប្តាហ៍ មានអ្នកដទៃទៀត ដែលទទួលការប្រើអំពើហិង្សា ហើយត្រូវគេថតវីដេអូ ខណៈមនុស្សដែលដើរឆ្លងកាត់ជុំវិញ បានត្រឹមសើចដាក់ប៉ុណ្ណោះ» ។
នាយកដ្ឋានអប់រំ និយាយថា ការប្រើប្រាស់ទូរស័ព្ទដៃពីសំណាក់កូនសិស្ស កំពុងមានការកើនឡើង នៅឯសាលារៀន ។
អ្នកនាំពាក្យសាលាម្នាក់និយាយថា៖ «ខណៈវានៅតែមានផលវិបាកសម្រាប់សិស្សដែលប្រើប្រាស់ទូរស័ព្ទ ដើម្បីប្រព្រឹត្តទង្វើមិនល្អនេះទៅលើដៃគូរបស់ពួកគេនៅក្នុងសាលា នោះមានកូនសិស្សជាច្រើនទៀត ក៏ត្រូវការរៀនយល់ដឹងអំពីលក្ខណៈនៃការប្រើប្រាស់ទូរស័ព្ទ និងឧបករណ៍អនឡាញដទៃទៀត ក្នុងគោលបំណងប្រកបដោយសុវត្ថិភាព និងឥរិយាបថគួរឲ្យគោរពផងដែរ» ៕ ឧត្តម
