ស្វាយរៀង ៖ លោកបណ្ឌិត សៅ សុវណ្ណី ប្រធានក្រុមការងារចុះជួយឃុំថ្នាធ្នង់បានអំពាវនាវឲ្យប្រជាពលរដ្ឋទាំងអស់ ត្រូវត្រៀមឯកសារដែលពាក់ព័ន្ធ ដើម្បីទៅបោះឆ្នោត ឲ្យបានគ្រប់ៗគ្នា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយមិនត្រូវជឿតាមការញុះញង់ របស់បុគ្គលមួយចំនួននោះឡើយ។
ជាមួយគ្នានោះលោកបណ្ឌិតសៅ សុវណ្ណី ថែមទាំងបានអំពាវនាវឲ្យប្រជាពលរដ្ឋបោះឆ្នោត ជូនគណបក្សប្រជាជនកម្ពុជា ដើម្បីបន្តរក្សាបាននូវសុខសន្តិភាព និងការអភិវឌ្ឍ។
ការអំពាវនាវយ៉ាងដូច្នេះ ត្រូវបានធ្វើឡើងនៅព្រឹកថ្ងៃទី២១ ខែមិថុនា ឆ្នាំ២០១៨នេះ ក្នុងឱកាសដែលលោកបានអញ្ជើញ ចុះជួបសំណេះសំណាល ជាមួយសមាជិកបក្ស នៅឃុំថ្នាធ្នង់ស្រុករំដួលខេត្តស្វាយរៀងប្រមាណជិត៣០០០នាក់នៅក្នុងពិធីនេះក៏មានការចូលពីលោក ជា សាមឿន អនុប្រធានយុវជនគណបក្សចុះជួយស្រុករំដួលផងដែរ។
ប្រធានក្រុមការងារបក្សរូបនេះ ក៏បានធ្វើការអំពាវនាវដល់ប្រជាពលរដ្ឋទាំងអស់ កុំឲ្យជឿការញុះញង់របស់បុគ្គលមួយចំនួន ដែលឃោសនាមិនឲ្យប្រជាពលរដ្ឋទៅបោះឆ្នោត ហើយសមត្ថកិច្ច ត្រូវចាត់វិធានការចំពោះបុគ្គលទាំងនោះ មកអប់រំផងដែរ។
បន្ថែមលើនេះ លោកបណ្ឌិត សៅ សុវណ្ណី ក៍បានឲ្យដឹងទៀតថាៈ គណបក្សប្រជាជនកម្ពុជា គឺជាគណបក្សចាស់ទុំមួយ ដែលប្រកាន់យកនូវការធ្វើអំពើល្អ និងតែងតែនៅរួមសុខរួមទុក្ខ ជាមួយប្រជាពលរដ្ឋ ហើយបានកសាងប្រទេសតាំងពីបាតដៃទទេរ ឲ្យមានភាពរីកចម្រើនលើគ្រប់វិស័យ។
លោកបានមានប្រសាសន៍ថា ជាពិសេសគឺគណបក្សប្រជាជនបាននាំមកនូវសុខសន្តិភាពពេញផ្ទៃប្រទេស ដែលគ្មានគណបក្សណាមួយអាចធ្វើបាននោះឡើយ ហើយការបោះឆ្នោតជ្រើសរើសតំណាងរាស្ត្រ ខាងមុខនេះ គណបក្សប្រជាជនកម្ពុជា ចាប់ឆ្នោតបានលេខរៀងទី២០ ដែលជាលេខនាំមកសំណាង ដល់គណបក្សប្រជាជនយើង។
ក្នុងឱកាសនោះ សមាជិកបក្ស ក៏បានបង្ហាញការជឿទុកចិត្តផងដែរ ចំពោះការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងនាំគ្នាទៅចូលរួមបោះឆ្នោត ជូនគណបក្សប្រជាជនកម្ពុជាដែលមានលេខរៀងទី២០ឲ្យបានគ្រប់ៗគ្នា។
លោកបណ្ឌិត សៅសុវណ្ណី និងក្រុមការងារ ចែកជូនខោអាវបញ្ជាការពារចំនួន៣៥ កំប្លេ ព្រមទាំងថវិកាក្នុងម្នាក់ៗ១ម៉ឺនរៀលផងដែរ៕វ៉ៃកូ
