កាលពីថ្ងៃចន្ទ ឥណ្ឌូណេស៊ី បានជួបគ្រោះលិចកប៉ាល់ ដ៏ធ្ងន់ធ្ងរបំផុតមួយនៅក្នុងបឹង Toba ដែលជាមណ្ឌលទេសចរណ៍ដ៏ពេញនិយម របស់ប្រជាពលរដ្ឋឥណ្ឌូណេស៊ី ប្រចាំកោះស៊ូម៉ាត្រា។មានប្រជាពលរដ្ឋឥណ្ឌូណេស៊ី តែ១៨នាក់គត់បានរួចជីវិត ក្នុងនោះមានម្នាក់ជាអ្នកបើកបរ ដែលអាជ្ញាធរទើបចាប់ខ្លួនបាន។
រូប:ក្រុមសង្គ្រោះកំពុងបន្តរុករកជនបាត់ខ្លួន ក្នុងបឹង Toba
ក្រុមសង្គ្រោះ បានបញ្ជាក់ព័ត៌មាននៅថ្ងៃព្រហស្បតិ៍ថា រាប់ឃើញមានស្លាប់ដោយជាក់ស្តែងចំនួន៤នាក់ និង ប៉ាន់ស្មានថា ចំនួនជនបាត់ខ្លួនអាចមានដល់ទៅជាង១៩០នាក់។ នេះបើផ្អែកលើសេចក្តីប្រកាសរបស់សាច់ញាតិ។កប៉ាល់នេះជាមធ្យោបាយដឹកជញ្ជូន ដែលរកស៊ីចម្លងមនុស្សបែបបូរាណ ដោយខុសច្បាប់ គ្មានលក់សំបុត្រ គ្មានបញ្ជីឈ្មោះអ្នកដំណើរទេ។
កប៉ាល់បានក្រឡាប់លិចនៅកណ្តាលបឹង តូបា ក្រោយពីមានខ្យល់និងរលកធំៗបោកបក់ខ្លាំងពេក។ ម្យ៉ាងទៀត អាជ្ញាធរសង្ស័យថា កប៉ាល់នេះទំនងជាបានផ្ទុកអ្នកដំណើរ ព្រមទាំងទោចក្រយានយន្តជាច្រើនគ្រឿង ហួសចំណុះ ដល់ទៅប្រមាណបួន ឬ៥ដងលើសកំរិតអនុញ្ញាត។
ពេលនេះប៉ូលិសចាប់បានអ្នកបើកបរ ដែលបានរួចពីស្លាប់ ដូចអ្នកដំណើរចំនួន១៨នាក់ផ្សេងទៀត។ ប៉ុន្តែ សមត្ថកិច្ចពុំទាន់អាចសួរចម្លើយបាននៅឡើយទេ ព្រោះ ទួអា សាហ្កាឡា កំពុងស្ថិតក្នុងសភាពតក់ស្លុតខ្លាំងនៅឡើយ៕
សូយន
