កោះកុង៖ “ស្ត្រីគឺជាឆ្អឹងខ្នងនៃការអភិវឌ្ឍសង្គម ហើយស្ត្រីក៏ជាតួអង្គសំខាន់ ក្នុងការអប់រំបន្តនិងបណ្តុះ មនសិការកុមារតូចៗឱ្យចេះស្រឡាញ់បរិស្ថាន និងការពារបរិស្ថាន តាំងពីកុមារភាព”។ ដោយមានកិច្ចសហការជាមួយអាជ្ញាធរខេត្តកោះកុងក្រសួងបរិស្ថានបានរៀបចំ សិក្ខាសាលាបណ្តុះបណ្តាលស្តីពី “ការលើកកម្ពស់ការយល់ដឹង និងការអប់រំបរិស្ថាន ដល់ស្ត្រីនិងកុមារ”រយៈពេល២ថ្ងៃ ចាប់ពីថ្ងៃទី២០-២១ ខែមិថុនា ឆ្នាំ២០១៨ នៅសណ្ឋាគារបុប្ផាកោះកុង ខេត្តកោះកុង ដើម្បីជំរុញនិងលើកទឹកចិត្តស្ត្រីឱ្យមានតួនាទីកាន់តែប្រសើរ ក្នុងសកម្មភាពសំខាន់ៗ ពាក់ព័ន្ធនឹងកិច្ចគាំពារបរិស្ថាន កិច្ចការពារធនធានធម្មជាតិ និងជីវៈចម្រុះការអភិវឌ្ឍដោយចីរភាព និងមានទំនាក់ទំនងទៅនឹងសេដ្ឋកិច្ច និងនយោបាយ។
វគ្គណ្តុះបណ្តាលដែលមានការអញ្ជើញ ចូលរួមពីស្ត្រីជាជនបង្គោល តំណាងក្រសួងកិច្ចការនារី មន្ទីរអប់រំ យុវជន និងកីឡាខេត្តមន្ទីរបរិស្ថានខេត្ត មន្ទីរកិច្ចការនារីខេត្ត និងសិស្សានុសិស្សថ្នាក់ទី១២ មកពីគ្រឹះស្ថានសិក្សាសាធារណជុំវិញខេត្តចំនួនសរុបប្រមាណ១២០នាក់ បានប្រព្រឹត្តទៅក្រោមអធិបតីភាពលោក សាបូ អូហ្សាណូ រដ្ឋលេខាធិការក្រសួងបរិស្ថាន និងលោកអន ភារៈ អភិបាលរង នៃគណៈអភិបាលខេត្តកោះកុង ក្រោមកិច្ចសម្របសម្រួល រៀបចំដោយនាយកដ្ឋាន អប់រំបរិស្ថាន នៃអគ្គនាយកដ្ឋានចំណេះដឹង និងព័ត៌មានបរិស្ថាន។
ថ្លែងក្នុងឱកាសនោះ លោក សាបូ អូហ្សាណូ រដ្ឋលេខាធិការក្រសួងបរិស្ថាន បានចាត់ទុកវគ្គបណ្តុះបណ្តាល និងការដាំកូនឈើនាថ្ងៃនេះគឺជា “មេរៀនផ្តើមចេញពីការអនុវត្ត” ដើម្បីផ្តល់ឱកាសដល់ស្ត្រីអាចក្លាយជាមន្ត្រីអប់រំបរិស្ថានបន្ត និងចូលរួមកាន់តែសកម្មជាមួយរាជរដ្ឋាភិបាលទាំងផ្នែកបរិស្ថាននៃការរស់នៅ និងគោលនយោបាយ។ លោកបានបន្តថា ដើម្បីឈានឆ្ពោះទៅរកសង្គមដែលមានបរិស្ថានស្រស់បំព្រង យើងមិនអាចកាត់ផ្តាច់ ពីការចូលរួមរបស់ស្ត្រីបានឡើយ ហើយកុមារនិងយុវជនក៏ត្រូវចូលរួមទាំងអស់គ្នា ជាមួយយើងដែរ៕ ដោយ៖កូឡាប
