ភ្នំពេញ៖ មន្ត្រីនគរបាលសង្កាត់ចាក់អង្រែលើ ខណ្ឌមានជ័យ នៅព្រឹកថ្ងៃទី២២ ខែមិថុនា ឆ្នាំ២០១៨ បានយកដីកាកោះហៅជនសង្ស័យ សម រង្ស៊ី ទៅបិទនៅផ្ទះលេខ៥៧៦ ផ្លូវជាតិលេខ២ ភូមិព្រែកតាគង់២ សង្កាត់ចាក់អង្រែលើ ខណ្ឌមានជ័យ ដែលជាទីតាំងអតីតទីស្នាក់ការគណបក្សសង្គ្រោះជាតិ។ ដីកានេះ ពាក់ព័ន្ធការប្រមាថ ព្រះមហាក្សត្រ ។
កាលពីថ្ងៃទី២០ ខែមិថុនា ឆ្នាំ២០១៨ លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅជនសង្ស័យ សម រង្ស៊ី ចូលបំភ្លឺនៅព្រឹកថ្ងៃទី១២ ខែកក្កដា ឆ្នាំ២០១៨ នៅអយ្យការអមសាលាដំបូងរាជធានីភ្នំពេញពាក់ព័ន្ធករណីប្រមាថ ព្រះមហាក្សត្រ តាមគណនីហ្វេសប៊ុកឈ្មោះ Sam Rainsy ជាបន្តបន្ទាប់ចាប់ពីខែមិថុនា ឆ្នាំ២០១៨៕ ដោយ៖បញ្ញាស័ក្តិ
