អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា បានផ្ញើសារទៅអ្នកគាំទ្ររបស់លោកស្រី ក្នុងថ្ងៃប្រារព្ធខួបកំណើតលើកដំបូងរបស់លោកស្រី ដែលចាប់តាំងពីលោកស្រីបាននិរទេសខ្លួនពីប្រទេសថៃកាលពីចុងខែសីហា ឆ្នាំ២០១៧ ។
ឈានចូលវ័យ ៥១ ឆ្នាំ កាលពីថ្ងៃព្រហស្បតិ៍ នៅលើគណនីហ្វេសប៊ុករបស់ខ្លួន លោកស្រី យីងឡាក់ បាននិយាយថា នេះជាលើកដំបូងហើយ ដែលលោកស្រីបានប្រារព្ធខួបកំណើតនៅឯក្រៅប្រទេស ។ លោកស្រីក៏បានថ្លែងអំណរគុណយ៉ាងជ្រាលជ្រៅបំផុត ដល់បងប្អូនអ្នកស្រលាញ់គាំទ្រលោកស្រីទាំងអស់ទាំងក្នុង និងក្រៅប្រទេស ដែល «នៅតែនឹកអាឡោះអាឡៃ និងពុំភ្លេច» លោកស្រី ។ លោកស្រីបាននិយាយនៅក្នុងសារថា៖ «មានមនុស្សអ្នកគាំទ្រជាច្រើន បានផ្ញើសារជូនពរល្អៗជូនចំពោះរូបខ្ញុំ ហើយក៏មានជនរួមជាតិថៃនៅឯនាយសមុទ្រជាច្រៀនទៀត បានបើករថយន្តមកពីផ្នែកជាច្រើន ដើម្បីយកកាដូជូនខ្ញុំផងដែរ ។
លោកស្រីបន្តថា៖ «ខ្ញុំតែងតែផ្តល់តម្លៃ ចំពោះការរាប់អាន, ក្តីស្រាលាញ និងការជូនពរល្អៗរបស់អ្នកទាំងអស់គ្នា! ខ្ញុំពុំដែលភ្លេចអ្នកទាំងអស់គ្នាទេ» ។ លើសពីនេះ លោកស្រី យីងឡាក់ ក៏បានថ្លែងអំណរគុណដល់បងប្រុសរបស់លោកស្រី លោក ថាក់ស៊ីន ស៊ីណាវ៉ាត្រា ដែលបានជូនពរលោកស្រីនូវពាក្យពេចន៍ដ៏ល្អៗ លើកទឹកចិត្តលោកស្រីនៅក្នុងថ្ងៃខួបកំណើតនេះ ។
លោក ថាក់ស៊ីន បានបង្ហោះសារជូនពរប្អូនស្រីខ្លួន នៅលើគណនីហ្វេសប៊ុករបស់លោកយ៉ាងដូច្នេះថា៖ «រីករាយថ្ងៃខួបកំណើត! ប្អូនស្រីជាទីស្រលាញ់ បងពិតជារីករាយខ្លាំងណាស់ សម្រាប់ខួបកំណើតប្អូននៅឆ្នាំនេះ ខណៈប្អូនមករស់នៅជាមួយបងនៅក្នុងប្រទេសគេ ។ បងនឹងមើលថែប្អូន ហើយនឹងធ្វើឲ្យជីវិតរបស់ពួកយើងនៅក្រៅប្រទេសឲ្យមានតម្លៃ និងមានប្រយោជន៍ ចំពោះក្រុមគ្រួសារ និងប្រជាជនរបស់យើង ដែលបានស្រលាញ់ពួកយើង» ។
គួរបញ្ជាក់ថា តុលាការកំពូលថៃ បានប្រកាសសាលក្រម កាលពីថ្ងៃទី២៧ ខែកញ្ញា សម្រេចផ្ដន្ទាទោសអ្នកស្រី យីងឡាក់ ស៊ីណាវ៉ាត្រា ដោយកំបាំងមុខឲ្យជាប់ពន្ធនាគារ៥ឆ្នាំ ពីបទធ្វេសប្រហែល ក្នុងការប្រើប្រាស់ថវិការដ្ឋ នៅក្នុងនយោបាយឧបត្ថម្ភស្រូវអង្ករ ៕ ឧត្តម