ខេត្តព្រះសីហនុ៖ មន្ត្រីមួយចំនួនកំពុងបំរើការងារនៅកំពង់ផែស្វយ័តក្រុងព្រះសីហនុ បង្ហាញចម្ងល់ថា នៅក្នុងស្ថាប័នមួយនេះ មានមន្ត្រីថ្នាក់ដឹកនាំខ្លះបានគ្រប់អាយុចូលនិវត្តន៍ ឬបានចូលនិវត្តន៍ទៅហើយ ប៉ុន្តែហេតុអ្វីបានជា ពួកគាត់ទាំងនោះអាចនៅបន្តធ្វើកិច្ចការងារទៅតាមតួនាទី ឬតាមជំនាញរៀងៗខ្លួនបានដោយរលូនទៅវិញ..?។
មន្ត្រីស្វយ័តមួយចំនួនដែលមើលទៅទំនងជាច្រណែន ឬក៏អាចចង់មានតួនាទីខ្ពស់ ឬមុខតំណែងចំកន្លែងរកលុយបានច្រើនហើយមើលទៅ បានជាកើតទុកមិនសុខចិត្តលើករណីដែលថា នៅកំពង់ផែស្វយ័តក្រុងព្រះសីហនុរាល់ថ្ងៃនេះ មានមន្ត្រីគ្រប់អាយុចូលនិវត្តន៍ ឬមន្ត្រីចូលនិវត្តន៍ខ្លះ អាចបន្តធ្វើការជាធម្មតា វាខុសប្លែកពី មន្ត្រីគ្រប់អាយុចូលនិវត្តន៍បំរើការងារនៅតាមក្រសួងស្ថាប័នពាក់ព័ន្ធផ្សេងៗ នៃរាជរដ្ឋាភិបាលកម្ពុជា..។
ផ្តើមពីបញ្ហានេះមន្ត្រីមួយចំនួនបានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលគ្រោងអញ្ជើញចុះជួបសំណេះសំណាលជាមួយថ្នាក់ដឹកនាំគណបក្សប្រជាជនកម្ពុជា និងមន្ត្រីរាជការនៅខេត្តព្រះសីហនុសប្តាហ៍ខាងមុខនេះ។ មន្ត្រីទាំងនោះបានសំណូមពរឲ្យសម្តេតេជោ ជួយពិនិត្យអន្តរាគន៍ និងបកស្រាយចម្ងល់ដែលថា កំពង់ផែស្វយ័តក្រុងព្រះសីហនុ អាចមានមន្ត្រីគ្រប់អាយុចូលនិវត្តន៍ ឬបានចូលនិវត្តន៍រួចហើយ ប៉ុន្តែអាចបន្តធ្វើការងារតាមតួនាទីរៀងៗខ្លួនជាធម្មតា។
ទោះជាបែបនេះក្តី អ្នកយកព័ត៌មានគេហទំព័រ cen.com.kh ប្រចាំខេត្តព្រះសីហនុ មិនទាន់អាចទាក់ទង ឯកឧត្ដម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកកំពង់ផែស្វយ័តក្រុងព្រះសីហនុបានទេតាមទូរស័ព្ទ នៅរសៀលថ្ងៃសុក្រ ទី២២ ខែមិថុនា ឆ្នាំ២០១៨។
យ៉ាងនេះក្តីនៅក្នុងផេក (Page) ឬបណ្តាញសង្គមហ្វេសប៊ុក (Facebook) របស់កំពង់ផែស្វយ័តក្រុងព្រះសីហនុ ឯកឧត្តម លូ គឹមឈន់ បានបញ្ជាក់ថា កំពង់ផែស្វយ័តក្រុងព្រះសីហនុ (កសស) ទទួលបានលទ្ធផលអាជីវកម្មគួរជាទីពេញចិត្តក្នុងរយៈពេលប៉ុន្មានឆ្នាំថ្មីៗនេះ។ ភាពជោគជ័យទាំងនេះ ស្តែងឡើងតាមរយៈការអនុវត្តទស្សនៈវិស័យជាមូលដ្ឋាន និងទិសដៅអភិវឌ្ឍន៍ របស់ខ្លួនស្របតាមគោលនយោបាយ របស់រាជរដ្ឋាភិបាលកម្ពុជា។
ឯកឧត្តម លូ គឹមឈន់ ឲ្យដឹងដូច្នេះ រួចបង្ហាញថា សមិទ្ធិផលដែលកំពង់ផែស្វយត្នសម្រេចបាន គឺដោយសារមានការគាំទ្រជានិច្ចកាល និងការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងអាណាព្យាបាលទាំងពីរ និងក្រុមប្រឹក្សាភិបាល របស់ កសស។ លោកបន្តថា ដោយសេដ្ឋកិច្ចជាតិ មានការរីកចម្រើនឥតឈប់ឈរ បរិមាណទំនិញឆ្លងកាត់កំពង់ផែកាន់តែមានកំណើនខ្ពស់ ដូច្នេះដើម្បីឆ្លើយតបនឹងកំណើនដ៏ខ្ពស់នេះ កសស បានបំពាក់បន្ថែមគ្រប់គ្រាន់នូវមធ្យោបាយលើកដាក់ទំនិញធុនធ្ងន់ ហើយទន្ទឹមនឹងនេះ កសស នឹងសាងសង់ចំណតផែកុងតឺន័រថ្មីមួយទៀត..។
របាយការណ៍ហិរញ្ញវត្ថុរបស់កំពង់ផែស្វយ័តក្រុងព្រះសីហនុ បង្ហាញថា ក្នុងត្រីមាសទី១ ឆ្នាំ២០១៨ កំពង់ផែស្វយ័តក្រុងព្រះសីហនុ មានចំណូលសរុបចំនួន៥៩.២៧០.៤៥៦.០០០រៀល កើនជាងត្រីមាសទី១ឆ្នាំ២០១៧ ចំនួន ៩.៤៨៩.៤៤៨.០០០រៀល ឬស្មើ១៩,០៦% និងខាតសុទ្ធក្នុងការិយបរិច្ឆេទសរុបចំនួន ១១.២៦១.៧៦១.០០០រៀល ដែលប្រាក់ខាតបានកើនឡើងចំនួន៨.៤៨១.៦៤៩.000រៀល ឬស្មើ ៣០៥,០៨% បើធៀបត្រីមាសទី១ ឆ្នាំ២០១៧។
កាលពីថ្ងៃទី៣១ ខែមីនា ឆ្នាំ២០១៨កន្លងទៅ ទ្រព្យសកម្មសរុប របស់កំពង់ផែស្វយ័តក្រុងព្រះសីហនុមានចំនួន ១.២៦៨.៤២១.៦៦០.០០០រៀល ថយចុះចំនួន ១២.០៨៨.៣៧៨.០០០រៀល ឬស្មើ០,៩៤% និងមូលធនសរុបមានចំនួន ៦៣៥.៣៤៨.៧៩៣.០០០រៀល ថយចុះចំនួន ១១.២៦១.៧៦១.០០០រៀល ឬស្មើ១,៧៤%។
សូចនករសំខាន់ៗសម្រាប់ត្រីមាសទី៣ ឆ្នាំ២០១៧ មានដូចខាងក្រោម៖
១.
អនុបាតចរន្ត
៣,៧៦ ដង
២.
អនុបាតចរន្តលឿន
៣,៥៨ ដង
៣.
អនុបាតចំណេញធៀបនឹងទ្រព្យសកម្ម
-០,៨៩ %
៤.
អនុបាតចំណេញធៀបនឹងមូលធន
-១,៧៧ %
៥.
អនុបាតគំលាតចំណេញដុល
២៦,៧៤ %
៦.
អនុបាតគំលាតចំណេញភាព
-១៩,០០ %
៧.
ចំណេញក្នុងមួយឯកតាមូលបត្រកម្មសិទ្ធិ
១៣១,៣០ រៀល
៨.
ភាគលាភក្នុងមួយឯកតាមូលបត្រកម្មសិទ្ធិ
……………. រៀល
សូមអានរបាយការណ៍ត្រីមាសទី ១ ឆ្នាំ ២០១៨ ទាំងស្រុងដោយទាញយក (Download) ខាងក្រោមនេះ៖
១- របាយការណ៏ប្រចាំត្រីមាសទី ១ ឆ្នាំ ២០១៨ (ភាសាខ្មែរ)
២- របាយការណ៍ហិរញ្ញវត្ថុប្រចាំត្រីមាសទី ១ ឆ្នាំ ២០១៨ (ភាសាអង់គ្លេស)
៣- ព័ត៌មានទាន់ពេលទម្រង់ទី ៣៣-ក ស្តីពី ការកើនឡើងនៃចំណូល ចំនួន ១៩.០៦%
៤- ព័ត៌មានទាន់ពេលទម្រង់ទី ៣៣-ខ ស្តីពី ការខាតសុទ្ធ ចំនួន ៣០៥.០៨%
ទោះជាបែបនេះក្តី ក៏នៅមានមន្ត្រីឬបុគ្គលិកមួយចំនួនកំពុងបំរើការងារនៅកំពង់ផែស្វយ័តក្រុងព្រះសីហនុ បង្ហាញអារម្មណ៍មិនពេញចិត្ត ចំពោះស្ថាប័ននេះ ដែលមានមន្ត្រីគ្រប់អាយុចូលនិវត្តន៍ ឬបានចូលនិវត្តន៍ហើយ ប៉ុន្តែពួកគាត់អាចនៅបន្តដឹកនាំការងារនៅតាមតួនាទីរៀងៗខ្លួនដដែលដោយមិនបានឈប់សំរាកទេ។ ពោលគឺមន្ត្រីចូលនិវត្តន៍មួយចំនួននោះ អាចពន្យាកំណើតបន្តការងារជាធម្មតា ទៅតាមតួនាទី ក្នុងតំណែងធ្លាប់កាន់កាប់របស់ខ្លួននាពេលកន្លងមក នៅក្នុងកំពង់ផែស្វយ័តក្រុងព្រះសីហនុដោយរលូនទៅវិញ៕ ដោយ ៖ ដែនសីមា