ព្រះវិហារ៖ អាជ្ញាធរខេត្តរតនគិរី និងខេត្តព្រះវិហារ រួមជាមួយនឹងមន្ត្រីរាជការ បានដាំកូនឈើ កូនគគីរ ៦០ដើម និងឈើធ្នង់ដែលដឹកមកពីខេត្តព្រះវិហារ ចំនួន ៥០ដើម សរុបចំនួន ១១០ដើម កាលពីព្រឹកថ្ងៃទី១១ វិច្ឆិកា ឆ្នាំ២០១៧នេះ ដើម្បីរិតចំណងមិត្តភាព រវាងខេត្តរតនគិរី និងខេត្តព្រះវិហារ និងចង់បង្ហាញឱ្យកូនចៅជំនាន់ក្រោយ ចេះស្រឡាញ់បរិស្ថាន និងការពារថែរក្សាដើមឈើ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ ដែលអមដំណើរអភិបាលខេត្តព្រះវិហារ ដាំកូនឈើបានឱ្យដឹងថា៖ ពិធីដាំកូនឈើមិត្តភាពខាងលើនេះ ប្រារព្ធឡើងក្នុងបរិវេណពហុកីឡដ្ឋានខេត្តរតនគិរី ដើម្បីរឹតចំណងមិត្តភាពរវាងខេត្តរតនគិរី និងខេត្តព្រះវិហារ ក្រោមវត្តមាន លោក ថង សាវុន អភិបាលខេត្តរតនគិរី និង លោក អ៊ុន ចាន់ដា អភិបាលខេត្តព្រះវិហារ ព្រមទាំងមានការអញ្ជើញចូលរួមពី លោកប្រធានមន្ទីរ អង្គភាពជុំវិញខេត្ត ក្រុមកាយរិទ្ធ ក្រុមកាកបាទក្រហម ក្រុមសហភាពសហព័ន្ធយុវជនកម្ពុជា ចំនួនជាង២០០នាក់ផងដែរ។
លោកប្រធានមន្ទីរ បានបញ្ជាក់ដែរថា៖ “ការដាំដើមឈើជាមិត្តភាពនាពេលនេះ ចង់បង្ហាញឱ្យកូនចៅ ឬយុវជនជំនាន់ក្រោយ ចេះស្រឡាញ់បរិស្ថាន និងការពារថែរក្សាដើមឈើ និងការពាព្រៃ និងជាការសហការគ្នា រវាងអាជ្ញាធរខេត្តនិងខេត្តព្រំដែន បង្កើនជម្រកពណ៌បៃតង ឱ្យបានច្រើនសម្រាប់កូនចៅជំនាន់ក្រោយ”៕ ដោយ៖បញ្ញាស័ក្តិ
