ខេត្តព្រះសីហនុ ៖ សមត្ថកិច្ចស្នងការនគរបាលខេត្តព្រះសីហនុ បានឲ្យដឹងថា មានក្រុមចោរប្លន់ប្រដាប់អាវុធជនជាតិចិន បានចេញធ្វើសកម្មភាពប្លន់ដោយប្រើមធ្យោបាយរថយន្តទំនើបម៉ាកRolls Royce និងអាវុធខ្លីម៉ាករ៉ូឡូ។
ករណីនេះ លោកឧត្តមសេនីយ៍ទោ ជួន ណារិន្ទ ស្នងការដ្ឋាននគរបាលខេត្តព្រះសីហនុ បានឲ្យដឹងថា កម្លាំងនគរបាលលោកបានចាប់ខ្លួនជនសង្សយ័ជនជាតិចិនម្នាក់ ទៅតាមពាក្យបណ្តឹងរបស់ប្រជាពលរដ្ឋ ពីបទប្លន់ប្រដាប់អាវុធ។
លោកបន្តថា កាលពីយប់ថ្ងៃទី២២ ខែមិថុនា ឆ្នាំ២០១៨ វេលាម៉ោង១០បយប់ ការិយាល័យជំនាញ ស្នងការនគរបាលខេត្តព្រះសីហនុ បានទទួលពាក្យបណ្តឹងពីប្រជាពលរដ្ឋឈ្មោះ គង់ ទីប៉ោ ភេទប្រុស អាយុ៣១ឆ្នាំ មុខរបររត់រថយន្តឈ្នួល មានទីលំនៅសង្កាត់ដង្កោរ រាជធានីភ្នំពេញ ពីបទប្លន់ដោយអាវុធខ្លីម៉ាករ៉ូឡូ វេលាម៉ោង ៨ និង៤០នាទី នៅភូមិ១ សង្កាត់៣ ក្រុង/ខេត្តព្រះសីហនុ។
លោក ជួន ណារិន្ទ បញ្ជាក់ថា ជនសង្ស័យមានគ្នា៤នាក់ ជនជាតិចិន បានផ្ញើសារតាម វីឆាត ” Wechat ” ហៅជនរងគ្រោះមកយកលិខិតឆ្លងដែនទៅបន្តទិដ្ឋាការ ឲ្យពួកគេ។ ហើយសម្ភារៈបាត់បង់រួមមាន៖ លុយចំនួន៥០០ដុល្លារអាមេរិក- បណ្ណ័បើកបរ១សន្លឹក -បណ្ណ័សំគាល់រថយន្ត១សន្លឹក និងអត្តសញ្ញាណប័ណ្ណសញ្ជាតិខ្មែរ១សន្លឹក។
បន្ទាប់ពីទទួលបានពាក្យបណ្តឹងរួច និងចូលរួមសម្របសម្រួលនីតិវិធីច្បាប់ពីព្រះរាជ្ញារងអមសាលាដំបូងខេត្តព្រះសីហនុ កម្លាំងជំនាញផែននគរបាលព្រហ្មទណ្ឌ សហការជាមួយកម្លាំងអធិការដ្ឋានក្រុង ប៉ុស្តិ៍ និងកងអន្តរាគមន៍ពិសេស បានចុះស្រាវជ្រាវ រហូតដល់ម៉ោង២៣:០០នាទី ទើបកម្លាំងជំនាញ បានកំណត់មុខសញ្ញាជនសង្ស័យបានម្នាក់ ដែលកំពុងផឹកស៊ីនៅក្លឹបកំសាន្ត CASA ស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ។
លោក ជួន ណារិន្ទ បន្តថា កម្លាំងជំនាញបានព័ទ្ធចាប់ខ្លួនជនសង្ស័យបានម្នាក់ឈ្មោះ Ly Ker Xing ភេទប្រុស អាយុ២៤ឆ្នាំ ជនជាតិចិន មុខរបរបើកបររថយន្តកាស៊ីណូ។
វត្ថុតាងចាប់យកបាន៖ លុយដុល្លា ៥០០ដុល្លា (របស់ជនរងគ្រោះ)។ អាវុធខ្លី១ដើម ម៉ាករ៉ូឡូ លេខ38.SWPL មានគ្រាប់ ៣គ្រាប់ ផលិតនៅសហរដ្ឋអាមេរិកសម្រាប់ជនសង្ស័យធ្វើសកម្មភាពប្លន់ និង រថយន្តម៉ាក Rolls Royce ពណ៌ស្លែ ពាក់ស្លាកលេខភ្នំពេញ ២BP-៦៦៦៦ សម្រាប់ជាមធ្យោបាយធ្វើសកម្មភាពប្លន់។
លោកឧត្តមសេនីយ៍ទោ ជួន ណារិន្ទ បានឲ្យដឹងថា ជនសង្ស័យ ៣នាក់ទៀតជាជនជាតិចិន ដូចគ្នាពេលនេះ កម្លាំងជំនាញស្នងការនគរបាលខេត្តព្រះសីហនុ កំពុងបន្តស្រាវជ្រាវ ដើម្បីឈានទៅចាប់ខ្លួនជនសង្ស័យ ក្នុងបទល្មើសប្លន់ប្រដាប់អាវុធខាងលើយកមកផ្តន្ទាទោសតាមច្បាប់។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តព្រះសីហនុ កំពុងបំពេញនីតិវិធីបញ្ជូនទៅកាន់សាលាដំបូងខេត្ត ដើម្បីអនុវត្តនីតិវិធីបន្តតាមផ្លូវច្បាប់៕ ដោយ ៖ ដែនសីមា