កណ្តាល ៖ យុវជនម្នាក់បានសម្រេចលោតពីលើទូកដរ ចូលក្នុងទឹកទន្លេបាសាក់ ខណៈកំពុងឆ្លងទន្លេ ហើយ២ថ្ងៃក្រោយមកគឺនៅថ្ងៃតី២៤ខែមិថុនានេះ ទើបសាកសពអណ្តែត ដោយមានសភាពហើមប៉ោង ។ សពឈ្មោះ ទាងហោ ស៊ុយ អាយុ១៩ឆ្នាំ ជនជាតិខ្មែរ នៅភូមិព្រែកឃុំ ត្រើយស្លា ស្រុកស្អាង ខេត្តកណ្តាល មុខរបរ កសិករ ។
នគរបាលស្រុកស្អាង បានឲ្យដឹងថា តាមសាក្សី(សុំមិនបញ្ចេញឈ្មោះ)ជាអ្នកបើកបររ៉ឺម៉ក បានប្រាប់សមត្ថកិច្ចអោយដឹងថាៈ នៅថ្ងៃទី ២២មិថុនា២០១៨ វេលាម៉ោង ២៤ គាត់ឃើញជនរងគ្រោះបានជិះម៉ូតូមកឆ្លងទូកដរ(កំពង់ចម្លងព្រែកតូច) ដោយមានសភាពស្រវឹងខ្លាំង ពេលនោះគាត់អង្គុយមើលទូរស័ព្ទ មិនបានមើលស្គាល់មុខ ជនរងគ្រោះថាជាអ្នកណាទេ ។ ឯជនរងគ្រោះចេះតែឈររេរា ក្បែររ៉ឺម៉ករបស់គាត់ លុះទូកដរចេញដំណើរឆ្លងដល់ចំងាយប្រហែលជាង ៣០ម៉ែត្រ ពីច្រាំងទន្លេ ជនរងគ្រោះបាននិយាយថា ខ្ញុំទៅមុនហើយ រួចក៏បានលោតទៅក្នុងទឹកបាត់ខ្លួនតែម្ដង ពេលនោះអ្នកបើកទូកដរ បានស្រែកហៅ និងបានបើកទូកក្រឡឹងរកមើលជាច្រើនលើកច្រើនសារ តែមិនឃើញជនរងគ្រោះឡើយ ។ បន្ទាប់ពីរកជនរងគ្រោះមិនឃើញ ម្ចាស់ទូកដរក៏បានរាយការណ៍ និងប្រគល់ម៉ូតូរបស់ជនរងគ្រោះ ទៅសមត្ថកិច្ចប៉ុស្តិ៍នគរបាលស្វាយប្រទាល ដើម្បីជួយស្រាវជ្រាវរក ។
ចំណែកក្រុមគ្រួសារ ដោយបាត់ដំណឹងកូនយូរពេក រហូតដល់ទៅមួយយប់មួយថ្ងៃ ក៏ខិតខំស្វែងដើររក ក្រែងមានដំណឹង លុះទទួលបានព័ត៌មានថា មានមនុស្សលោតទឹកសម្លាប់ខ្លួន នៅចំណុចខាងលើ ពួកគាត់ក៏បានមកពិនិត្យមើលម៉ូតូជនរងគ្រោះ ដែលរក្សាទុកនៅប៉ុស្តិ៍នគរបាលស្វាយប្រទាល ទើបឃើញហើយស្គាល់ច្បាស់ថា ជាម៉ូតូរបស់កូនគាត់ជិះប្រាកដមែន ចំណែកឯសមត្ថកិច្ចប៉ុស្តិ៍ ក៏បានសួរនាំបញ្ជាក់អំពីអត្តសញ្ញាណរបស់ជនរងគ្រោះអោយបានច្បាស់លាស់ និងបានប្រគល់ម៉ូតូនោះ ជូនក្រុមគ្រួសារយកទៅវិញដែរ ។
លុះដល់ថ្ងៃទី ២៤មិថុនា២០១៨ វេលាម៉ោង៨ ទើបប្រទះឃើញសាកសពអណ្តែកទឹកក្នុងទន្លេបាសាក់ ស្ថិតនៅភូមិពោធិលើ ឃុំត្រើយស្លា ស្រុកស្អាង ខេត្តកណ្តាល ។
ក្រោយបានទទួលព័ត៌មានភ្លាម សម្ថកិច្ចប៉ុស្តិ៍ត្រើយស្លា ស្វាយប្រទាល បានសហការជាមួយផ្នែកជំនាញពិនិត្យកន្លែងកើតហេតុស្រុក ក្រុមប្រឹក្សាឃុំ មេភូមិ បានចុះពិនិត្យសាកសព ឃើញថា ពុំមានស្លាកស្នាម អ្វីគួរឲ្យកត់សម្គាល់ឡើយ ដោយសន្និដ្ឋានថា ជននោះ ស្លាប់ដោយសារឈ្លក់ទឹក៕ ដោយ៖បញ្ញាស័ក្តិ