ភ្នំពេញ ៖ ម្ចាស់ឡាំប្រឺតាផលិតនៅប្រទេសឥណ្ឌា ដែលបានរត់ឈ្នួលគិតគីឡូម៉ែត្រ ហើយត្រូវបានកម្លាំងសមត្ថកិច្ច ចាប់ឃាត់ទុកពាក់ព័ន្ធនឹងអត់មានស្លាកលេខចំនួន១៧០គ្រឿង នៅព្រឹកថ្ងៃទី១២ ខែវិច្ឆិកា ឆ្នាំ២០១៧នេះ បាននាំគ្នាកាន់ឯកសារពាក់ព័ន្ធទៅជួបជាមួយ លោកនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញនិងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ និងមន្ដ្រីពាក់ព័ន្ធ ដើម្បីពិនិត្យ និងធ្វើស្លាកលេខជូនភ្លាមៗ នៅស្នងការដ្ឋាននគរបាលរាជធានីភ្នំពេញ។
លោកនាយឧត្តមសេនីយ៍ ជួន សុវណ្ណ បានឲ្យដឹងថា “ម្ចាស់ឡាំប្រឺតា មិនមានឯកសារត្រឹមត្រូវ តម្រូវឲ្យទំនាក់ទំនង ទៅម្ចាស់ឃ្លាំងរកឯកសារ ដើម្បីធ្វើបែបបទស្នើសុំស្លាកលេខ ហើយសម្រាប់ម្ចាស់ឡាំប្រឺតា ដែលជួលគេ តម្រូវឲ្យជួបម្ចាស់អាជីវកម្ម ដើម្បីរកឯកសារពាក់ព័ន្ធមកបង្ហាញ ស្នើសុំធ្វើបែបបទ ពាក់ស្លាកលេខ”។
នាយឧត្តមសេនីយ៍ ជួន សុវណ្ណ ក៏បានប្រកាសថា សូមឲ្យបងប្អូនដែលនៅសេសសល់នោះកុំគេចវ៉េសអញ្ជើញចូលមកធ្វើស្លាកលេខក្នុងតម្លៃតែ៤៧០០០រៀលប៉ុណ្ណោះ បើម៉ូតូបងប្អូនមានក្រដាស់ពន្ធត្រឹមត្រូវគឺខាងមន្ទីរសាធារណការនៅចាំធ្វើស្លាកលេខភ្លាមជូនបងប្អូន។ ចំពោះបងប្អូននៅខេត្តក៏អាចធ្វើស្លាកលេខជូនបានដូចគ្នា ហើយក៏គ្មានសេវាក្រោមតុអ្វីទាំងអស់។ នាយឧត្តមសេនីយ៍ក៏បានបន្ថែមថា ចំពោះបងប្អូនខ្លះបានជួលគេយកមករត់ធ្វើអាជីវកម្មវិញនោះ បងប្អូនមិនបាច់បង់លុយស្លាកលេខនោះទេគឺទុកឲ្យភាគីក្រុមហ៊ុន ឬហាងដែលជួលឲ្យបងប្អូននោះចេញមុខបង់ថ្លៃធ្វើស្លាកលេខជូនបងប្អូន។
នាយឧត្តមសេនីយ៍ ជួន សុវណ្ណ ថ្លែងថា “អ្វីដែលអាជ្ញាធរចុះប្រមូលមកទីនេះ គឺបងប្អូនកំពុងល្មើសច្បាប់ហើយ។ ពាក្យថាល្មើសច្បាប់នេះគឺល្មើសច្បាប់ចរាចរណ៍ផ្លូវគោក ព្រោះថាច្បាប់តម្រូវឲ្យបងប្អូនមានស្លាកលេខសម្គាល់យានយន្ត ចៀសវាងជនខិលខូចមួយចំនួនខ្លះគាត់គៀបស៊ីភ្ញៀវទេសចរណ៍ ភ្ញៀវភ្លេចសម្ភារៈលើរ៉ឺម៉កបងប្អូនគាត់មកប្តឹងសមត្ថកិច្ច ហើយពេលសមត្ថកិច្ចម៉ូតូនោះស្លាកលេខប៉ុន្មាន? តែភ្ញៀវអត់ស្គាល់ស្លាកលេខ ចឹងឲ្យសមត្ថកិច្ចទៅរកឯណាឃើញ? នេះជាបញ្ហា។ សូមឲ្យបងប្អូនរួមសង្គមជាតិទាំងអស់គ្នា”។
មកទល់ពេលនេះ មន្ដ្រីជំនាញនៃមន្ទីរសាធារណការរាធានីភ្នំពេញ បាននិងកំពុងពិនិត្យឯកសារពាក់ព័ន្ធផ្សេង ដើម្បីរៀបចំធ្វើស្លាកលេខ និងកិបជូនភា្លមៗផងដែរ។ ជាមួយគ្នានោះ ម្ចាស់កង់បីឥណ្ឌា (ឡាំប្រឺតា) មួយចំនួនទៀត បានស្ម័គ្រចិត្តបើកចូលមកស្នងការដ្ឋាននគរបាលរាជធានីភ្នំពេញ ហើយក៏បានកាន់ឯកសារ មកស្នើសុំធ្វើស្លាកលេខតែម្ដង ក្រោយពីកម្លាំងនគរបាលតាមបណ្ដាខណ្ឌ ចាប់ឃាត់កាលពីម្សិលមិញ។
សូមជម្រាបថា ម៉ូតូកង់បីដែលផលិតនៅប្រទេសឥណ្ឌា ដែលគេស្គាល់ថា ជាកង់បីរត់ឈ្នួលគិតគីឡូនោះ ត្រូវបានកម្លាំងសមត្ថកិច្ចរាជធានីភ្នំពេញ ចាប់ឃាត់ទុកប្រមាណ១៧០គ្រឿង ព្រោះតែពុំបានចុះបញ្ជី និងបំពាក់ស្លាកលេខបានត្រឹមត្រូវបានច្បាប់កំណត់ នៅថ្ងៃទី១១ ខែវិច្ឆិកា ឆ្នាំ២០១៧នេះ ទុកនៅស្នងការដ្ឋាននគរបាលរាជធានីភ្នំពេញ ហើយទន្ទឹមនឹងនេះ រដ្ឋបាលរាជធានីភ្នំពេញក៏បានសេចក្តីជីនដំណឹង អោយម្ចាស់ម៉ូតូកង់បីទាំងនេះ មកបំពេញឯកសារ ដើម្បីធ្វើស្លាកលេខជូនដោយមិនគិតលុយផងដែរ ដែលក្នុងសេចក្តីជូនដំណឹងនោញបានបញ្ជាក់ថា រដ្ឋបាលរាជធានីភ្នំពេញសូមជម្រាបជូនដំណឹងដល់សាធារណជនទាំងអស់មេត្តាជ្រាបថា នៅព្រឹកថ្ងៃទី១១ ខែវិច្ឆិកា ឆ្នាំ២០១៧ នេះ អាជ្ញាធរមានសមត្ថកិច្ចបានធ្វើការឃាត់ម៉ូតូកង់បី (ផលិតនៅប្រទេសឥណ្ឌា) ប្រមាណជា ១៧០គ្រឿង ដែលកំពុងប្រកបអាជីវកម្មរត់ឈ្នួលនៅរាជធានីភ្នំពេញ ដោយពុំបានចុះបញ្ជី និងពុំមានស្លាកលេខសម្គាល់ត្រឹមត្រូវ មករក្សាទុកជាបណ្តោះអាសន្ននៅស្នងការដ្ឋាននគរបាលរាជធានីភ្នំពេញ។
ក៏ប៉ុន្តែ ដោយមើលឃើញពីការខ្វះខាតជីវភាពរបស់ម្ចាស់ម៉ូតូកង់បីមួយចំនួន ក៏ដូចជាដើម្បីសម្រួលការងារដល់បងប្អូន រដ្ឋបាលរាជធានីភ្នំពេញ បានណែនាំឱ្យមន្ទីរសាធារណការ និងដឹកជញ្ជូនរាជធានីភ្នំពេញ សហការជាមួយស្នងការដ្ឋាននគរបាលរាជធានីភ្នំពេញ ចាត់មន្ត្រីជំនាញរៀបចំបំពេញបែបបទចុះបញ្ជីធ្វើស្លាកលេខជូនម៉ូតូកង់បីទាំងអស់នៅស្នងការដ្ឋាននគរបាលរាជធានីភ្នំពេញផ្ទាល់ ដោយពុំមានការផាកពិន័យ ចាប់ពីព្រឹកថ្ងៃអាទិត្យ ទី១២ ខែវិច្ឆិកា ឆ្នាំ២០១៧ ស្អែកនេះតែម្តង។
អាស្រ័យហេតុនេះ សូមបងប្អូនម្ចាស់ម៉ូតូកង់បីកំពុងរក្សាទុកនៅស្នងការដ្ឋាននគរបាលរាជធានីភ្នំពេញទាំងអស់ត្រៀមឯកសារពាក់ព័ន្ធ និងទៅចុះបញ្ជីធ្វើស្លាកលេខឱ្យបានត្រឹមត្រូវទាំងអស់គ្នា។ ជាមួយគ្នានេះ រដ្ឋបាលរាជធានីភ្នំពេញសូមបញ្ជាក់ជូនថា រដ្ឋបាលរាជធានីភ្នំពេញពុំមានចេតនាបង្កការរំខាន ឬធ្វើឱ្យរាំងស្ទះដល់ដំណើរការប្រកបអាជីវកម្មប្រចាំថ្ងៃរបស់បងប្អូនម្ចាស់ម៉ូតូកង់បីខាងលើនេះឡើយ ផ្ទុយទៅវិញ នេះជាការអនុវត្តច្បាប់ ពិសេសច្បាប់ចរាចរណ៍ផ្លូវគោក ដើម្បីពង្រឹងនីតិរដ្ឋតែប៉ុណ្ណោះ៕ ដោយ៖កូឡាប