អត្តសញ្ញាណរបស់ស្ត្រីម្នាក់ដែលបំណែកសាកសពរបស់នាង ត្រូវបានគេរកឃើញនៅផ្លូវដាច់ស្រយាលមួយក្នុងសង្កាត់ Klong Samwa នៃទីក្រុងបាងកក កាលពីល្ងាចថ្ងៃសុក្រ ត្រូវបានគេបញ្ជាក់ថាមានឈ្មោះ Roi Et woman Lakkhana Kamlangkeng អាយុ ២៤ ឆ្នាំ ដែលធ្វើការនៅហាងបោះពុម្ភមួយកន្លែងនៅតំបន់ ។
ចំណែកឃាតកររបស់នាង ត្រូវបានដឹងថាជាអតីតមិត្តប្រុសរបស់នាង មានឈ្មោះថា Thanakrit Prakob ដែលក៏ជាបុគ្គលិកធ្វើការនៅហាងបោះពុម្ភនោះផងដែរ ត្រូវបានចាប់ខ្លួននៅយប់ថ្ងៃសៅរ៍ និងបានសារភាពថា រូបគេពិតជាបានសម្លាប់ Lakkhana មែន ។
ឃាតកររូបនេះបានប្រាប់ប៉ូលីសថា នាងវិលត្រឡប់មកបន្ទប់របស់ខ្លួន ដើម្បីប្រមូលយករបស់របររបស់នាងវិញ ហើយពួកគេក៏កើតមានជម្លោះខ្លាំងក្លាមួយ បន្ទាប់ពីនាងបានប្រាប់ខ្លួនថា នាងសុំបែកពីខ្លួន ដើម្បី «រួមរស់ជាមួយបុរសផ្សេងម្នាក់» នៅក្នុងខេត្ត Nonthaburi ។
Thanakrit បន្តថា ពួកគេបន្ទាប់មក បានឈ្លោះប្រកែកគ្នាកាន់តែខ្លាំងឡើងៗ ដែលធ្វើឲ្យគាត់ទ្រាំលែងបាន ក៏កើតគំនិតសម្លាប់នាងតែម្តង ដោយវាយទៅលើក្បាលរបស់នាងច្រើនដង មុនពេលកាត់បំបែកសាកសពរបស់នាង ដើម្បីលាក់បាំងអំពើឃាតកម្មរបស់ខ្លួន ។
យោងតាមវីដេអូពីកាមេរ៉ាផ្ទះល្វែងរបស់ Thanakrit នោះនារីរងគ្រោះ Lakkhana ត្រូវបានឃើញធ្វើដំណើរទៅកាន់បន្ទប់មួយ នៅវេលាម៉ោង ៦ និង ៤៤ នាទីល្ងាចថ្ងៃទី១២ មិថុនា និងបន្ទាប់មក នៅម៉ោង ៤ និង២៤ នាទីព្រឹកថ្ងៃទី១៤ ជនសង្ស័យត្រូវបានឃើញយូរស្បោងមួយ (ផ្ទុកបំណែកសាកសពរបស់នាង) ចេញពីអាគារនោះ ។
យ៉ាងណាមិញ នៅក្នុងវីដេអូមួួយ បានបង្ហាញឲ្យឃើញមហាជនពោរពេញដោយកំហឹង នៅកន្លែងរកឃើញសាកសព នាំបុកទម្លុះខ្សែហាមឃាត់របស់ប៉ូលីស ក្នុងបំណងដើម្បីសម្លាប់ឃាតករដោយផ្ទាល់ដៃរបស់ពួកគេតែម្តង ខណៈព្យាយាមរារាំងពួកគេស្ទើរតែពុំជាប់ ៕ ចន្ទី